ەل ىشىندە 2 مەن 17 جاس ارالىعىنداعى بالالار تەگىن ۇشادى

استانا. KAZINFORM - پرەمەر-مينيستر ولجاس بەكتەنوۆ Kids go free باعدارلاماسىن جالعاستىرۋدى تاپسىردى.

ۇكىمەت وتىرىسىندا پرەمەر-مينيستر تۋريزم جانە سپورت ءمينيسترى ەرمەك مارجىقپايەۆتان Kids go free باعدارلاماسى بيىل دا جالعاسۋ مۇمكىن بە ەكەندىگىن سۇراعان ەدى.

«جالعاستىرامىز. 2022 -جىلى باعدارلامانى 700 بالا قولدانسا، وتكەن جىلى ولاردىڭ سانى 2 مىڭعا جەتتى»، - دەپ جاۋاپ بەردى مينيستر.

وسى ورايدا ۇكىمەت باسشىسى دا Kids go free باعدارلاماسىن جالعاستىرۋ قاجەتتىگىن باسا ايتتى.

«بۇل ىشكى تۋريزمدى دامىتۋعا باعىتتالعان جاقسى باعدارلاما دەپ ويلايمىن. جالعاستىرىڭىز»، - دەدى ولجاس بەكتەنوۆ.

Kids go free باعدارلاماسىنىڭ مىناداي باسىمدىقتارى بار:

• ەل ىشىندە كەز كەلگەن قالاعا 2 مەن 17 جاستى قوسا العانداعى ارالىقتاعى بالالار تەگىن ۇشادى.

• ۇشاق بيلەتى تۋريستىك كومپانيالار ارقىلى الىنادى.

• تەگىن بيلەت بالا سانىنا قارامايدى، ياعني اتا-انا قانشا بالامەن ۇشسا دا، ول تەگىن بولماق. باعدارلامانىڭ بۇل ارتىقشىلىعى اسىرەسە، كوپبالالى وتباسىلارعا وتە ءتيىمدى.

• Kids Go Free باعدارلاماسى ەنگىزىلگەن تۋريستىك كومپانيالار سانى كۇننەن-كۇنگە ارتىپ كەلەدى.

• جوبا قولدانۋشىلارى وسسە، تەگىن ۇشۋدى راسىمدەپ بەرەتىن تۋرفيرا سانى دا ارتادى.

تەگىن اۋە بيلەتتەرىن الۋدا ەش كەدەرگى جوق. سەبەبى اتا-اناسىمەن بىرگە ساياحاتتايتىن بالا سانى مەن ساياحاتتاۋ كولەمىنە شەكتەۋ بولمايدى. ساياحاتقا شىققان ءار بالانىڭ جول ءجۇرۋ بيلەتىن مەملەكەت ءوز موينىنا الدى.

اۆتور

مارلان جيەمباي