ەلگە قىتايدان كوشىپ كەلەتىندەر كوبەيىپ جاتىر - كوشى-قون كوميتەتى
استانا. قازاقپارات - ەلىمىزدە شەتەلدەن كوشىپ كەلۋدىڭ وڭ ديناميكاسى بايقالادى. وتكەن جىلى ەلىمىزگە 23 مىڭ ادام كوشىپ كەلدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ءتوراعاسى اسقاربەك ەرتايەۆ ءمالىم ەتتى.
«بىلتىر سىرتتان كەلۋ كوشى-قونى بويىنشا وڭ ديناميكا بايقالدى. 2023 -جىلعى 1-جەلتوقسانداعى جاعدايى بويىنشا ەلگە 23 مىڭ ادام (8,3 مىڭ ادامعا ءوستى) كوشىپ كەلىپ، 15 مىڭ ادام ەلدەن شىقتى. سىرتتان كەلۋ كوشى-قون ءوسىمى نەگىزىنەن ت م د ەلدەرى مەن قىتايعا تيەسىلى»، - دەدى اسقاربەك ەرتايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ودان بولەك، سپيكەر ەلىمىزدەگى ىشكى كوشى-قونعا توقتالدى.
«وتكەن جىلى قاڭتار-قىركۇيەك ايى ارالىعىندا 733 مىڭ وتانداسىمىز ەل ىشىندە كوشىپ قوندى. ونىڭ ىشىندە 338 مىڭى وبلىسارالىق قونىس اۋداردى. كوبىسى مەگوپوليس قالالارعا كوشكەن، ياعني استاناعا - 74 مىڭ، الماتىعا - 67 مىڭ جانە شىمكەنتكە - 30 مىڭ ادام تۇراقتى تۇرۋعا كەلدى»، - دەپ تولىقتىردى كوشى-قون كوميتەتىنىڭ باسشىسى.
اۆتور
داۋلەت ىزتىلەۋ