ەلگە كىرەتىن شەتەلدىكتەرگە ەلەكتروندى رۇقسات الۋ مىندەتتەلەدى

قاۋلىعا سايكەس، ەرەجەدە كورسەتىلگەن ەلدەردىڭ، ەۋرازيالىق ەكونوميكالىق وداققا مۇشە مەملەكەتتەردىڭ جانە قازاقستانمەن ۆيزاسىز ساپارلار تۋرالى حالىقارالىق كەلىسىم جاساسقان ەلدەردىڭ ازاماتتارى ەلەكتروندى رۇقسات بولعان جاعدايدا قازاقستانعا كىرىپ، ەل اۋماعى ارقىلى ترانزيتپەن وتە الادى.

بۇل رەتتە ۆيزاسىز ءجۇرۋ مەرزىمى وزگەرمەيدى. اتاپ ايتقاندا، ا ق ش، ۇلى بريتانيا، گەرمانيا، فرانسيا، جاپونيا جانە وڭتۇستىك كورەيا ازاماتتارى قازاقستاندا ءبىر ساپار كەزىندە 30 كۇنگە دەيىن، ءبىراق 180 كۇن ىشىندە جيىنتىعى 90 كۇننەن اسپايتىن مەرزىمدە بولا الادى. ءۇندىستان مەن يران ازاماتتارى ءۇشىن ءبىر ساپارعا 14 كۇنگە دەيىن، ال 180 كۇن ىشىندە جيىنتىعى 42 كۇنگە دەيىن بولۋ مەرزىمى بەلگىلەنگەن. تۇركيا ازاماتتارى ءاربىر 180 كۇندىك كەزەڭدە قازاقستاندا ۆيزاسىز 90 كۇنگە دەيىن جۇرە الادى.

جاڭا تالاپ قاشان ەنگىزىلەدى؟

2026 -جىلعى 1-قاراشادان باستاپ ەلەكتروندى رۇقسات بەرۋ جۇيەسى اقتاۋ حالىقارالىق اۋەجايىندا جانە ءتورت اۆتوموبيل وتكىزۋ پۋنكتىندە قولدانىلا باستايدى. ولار: پاۆلودار وبلىسىنداعى «ۇرلىتوبە»، جامبىل وبلىسىنداعى «اۋقاتتى»، تۇركىستان وبلىسىنداعى «اتامەكەن» جانە جەتىسۋ وبلىسىنداعى «نۇرلى جول» وتكىزۋ پۋنكتتەرى.

2027 -جىلعى 1 -قاڭتاردان باستاپ جۇيە استانا مەن الماتىنىڭ حالىقارالىق اۋەجايلارىندا، ال 2027 -جىلعى 1-ناۋرىزدان باستاپ قازاقستاننىڭ قالعان مەملەكەتتىك شەكارا وتكىزۋ پۋنكتتەرىندە ەنگىزىلەدى.

2027 -جىلعى 1 -شىلدەگە دەيىنگى وتپەلى كەزەڭدە ەلەكتروندى رۇقساتتىڭ بولماۋى شەتەلدىك ازاماتقا ەلگە كىرۋدەن باس تارتۋعا نەگىز بولمايدى.

ەلەكتروندى رۇقساتتى قالاي الۋعا بولادى؟

ەلەكتروندى رۇقساتتى ىشكى ىستەر ورگاندارى ۇلتتىق قاۋىپسىزدىك ورگاندارىمەن كەلىسۋ ارقىلى شەتەلدىكتەر مەن ازاماتتىعى جوق ادامدارعا ارنالعان سيفرلىق پلاتفورما ارقىلى بەرەدى.

شەتەلدىك ازامات قازاقستانعا كىرۋدى جوسپارلاعان كۇننەن كەمىندە 72 ساعات بۇرىن پلاتفورمادا ءوتىنىش بەرۋى كەرەك. ءوتىنىش سيفرلىق فورماتتا تولتىرىلىپ، ءوتىنىش بەرۋشىنىڭ جەكە باسىن سايكەستەندىرۋ جانە (نەمەسە) اۋتەنتيفيكاتسيالاۋ راسىمدەرى جۇرگىزىلەدى.

ەلەكتروندى رۇقسات 180 كۇنتىزبەلىك كۇنگە بەرىلەدى. ونى راسىمدەۋ اقىسىز.

قازاقستان شەكاراسىنان وتكەن كەزدە پاسپورتتىق باقىلاۋ جەلىسىندە شەتەلدىك ازامات ەلەكتروندى رۇقسات الۋ ءۇشىن ءوتىنىش بەرگەن كەزدە پايدالانعان جارامدى پاسپورتىن نەمەسە جەكە باسىن كۋالاندىراتىن قۇجاتىن كورسەتۋگە ءتيىس.

كىمدەر ەلەكتروندى رۇقسات المايدى؟

راستايتىن قۇجاتتارى بولعان جاعدايدا ەلەكتروندى رۇقسات الۋ تالابىنان مىنا ساناتتاعى ادامدار بوساتىلادى:

شەت مەملەكەتتەردىڭ، ۇكىمەتتەردىڭ جانە حالىقارالىق ۇيىمداردىڭ باسشىلارى، سونداي-اق ولاردىڭ وتباسى مۇشەلەرى؛

شەت مەملەكەتتەر مەن حالىقارالىق ۇيىمداردىڭ پارلامەنتتەرى مەن ۇكىمەتتەرىنىڭ مۇشەلەرى جانە ولاردىڭ وتباسى مۇشەلەرى؛

قازاقستاننىڭ قۇرمەتتى كونسۋلدارى جانە ولاردىڭ وتباسى مۇشەلەرى؛

ديپلوماتيالىق جانە قىزمەتتىك پاسپورتتاردىڭ، سونداي-اق ديپلوماتيالىق اگەنتتەرگە تەڭ مارتەبەسى بار حالىقارالىق ۇيىمدار پاسپورتتارىنىڭ يەلەرى؛

قازاقستاندا اككرەديتتەلگەن شەت مەملەكەتتەردىڭ كونسۋلدىق مەكەمەلەرىنىڭ قىزمەتكەرلەرى؛

قازاقستان سىرتقى ىستەر مينيسترلىگىنىڭ اككرەديتتەۋ كۋالىگى بار ادامدار؛

ديپلوماتيالىق پوشتانى الىپ جۇرەتىن ديپلوماتيالىق كۋرەرلەر؛

قازاقستان پرەزيدەنتى اكىمشىلىگىنىڭ، قۇرىلتايدىڭ، جوعارعى سوتتىڭ، ۇكىمەت اپپاراتىنىڭ، قۇقىق قورعاۋ جانە ارناۋلى مەملەكەتتىك ورگانداردىڭ، قورعانىس مينيسترلىگىنىڭ نەمەسە سىرتقى ىستەر مينيسترلىگىنىڭ شاقىرۋىمەن كەلەتىن شەتەلدىكتەر؛

16 جاسقا تولماعان جانە 65 جاسقا تولعان نەمەسە ودان اسقان ادامدار؛

قازاقستاننىڭ مەملەكەتتىك شەكاراسىنان وتپەي، حالىقارالىق اۋەجايلاردىڭ ترانزيتتىك ايماعىندا بولاتىن جولاۋشىلار؛

قازاقستاننىڭ جارامدى ۆيزاسى، ۋاقىتشا تۇرۋعا رۇقساتى نەمەسە تۇرۋعا ىقتيارحاتى بار شەتەلدىكتەر؛

قازاقستان زاڭناماسىنا سايكەس بوسقىن دەپ تانىلعان جانە باسپانا ىزدەپ جۇرگەن ادامدار؛

ۇشۋ قۇجاتتارىندا ءتيىستى جازباسى بار اۋە كەمەلەرىنىڭ ەكيپاج مۇشەلەرى؛

كەمە تىزىمىندە كورسەتىلگەن تەڭىز جانە وزەن كەمەلەرىنىڭ ەكيپاج مۇشەلەرى؛

ءتيىستى قۇجاتتارى بار پويىز، رەفريجەراتور جانە لوكوموتيۆ بريگادالارىنىڭ مۇشەلەرى؛

مەملەكەتارالىق فەلدەگەرلىك بايلانىس قىزمەتكەرلەرى؛

كۇدىكتىلەردى، ايىپتالۋشىلاردى جانە سوتتالعانداردى الىپ جۇرەتىن قۇقىق قورعاۋ ورگاندارىنىڭ قىزمەتكەرلەرى؛

رەسمي مەملەكەتتىك جانە ۇكىمەتتىك دەلەگاتسيالاردىڭ مۇشەلەرى مەن ولاردى الىپ جۇرەتىن ادامدار؛

قازاقستان اۋماعىنداعى ترانسشەكارالىق نىساندارعا قىزمەت كورسەتەتىن ماماندار؛

قازاقستاننىڭ حالىقارالىق اۋەجايلارىنا نەمەسە پورتتارىنا ءماجبۇرلى نە شۇعىل تۇردە قونعان اۋە جانە تەڭىز كەمەلەرىنىڭ جولاۋشىلارى؛

قازاقستان راتيفيكاتسيالاعان حالىقارالىق كەلىسىمدەردە كوزدەلگەن ىزدەستىرۋ- قۇتقارۋ وپەراتسيالارىنا قاتىسۋ ءۇشىن شەكارادان وتەتىن ادامدار؛

مەملەكەتتىك ورگانداردىڭ شاقىرۋىمەن گۋمانيتارلىق ميسسيالارعا نەمەسە توتەنشە جاعدايلاردىڭ سالدارىن جويۋعا كەلگەن ادامدار؛

شۇعىل مەديسينالىق كومەك كورسەتۋ ءۇشىن قازاقستانعا كەلگەن مەديسينالىق بريگادالاردىڭ قىزمەتكەرلەرى؛

حالىقارالىق جۇك تاسىمالىن جۇزەگە اسىراتىن جۇك كولىكتەرىنىڭ جۇرگىزۋشىلەرى، سونداي-اق حالىقارالىق جولاۋشىلار تاسىمالىمەن اينالىساتىن، جۇرگىزۋشىنىڭ ورنىن ەسەپتەمەگەندە، 12-دەن استام وتىراتىن ورنى بار اۆتوبۋستاردىڭ جۇرگىزۋشىلەرى؛

جەرلەۋ ءۇشىن مارقۇمنىڭ دەنەسىن الىپ جۇرەتىن، ونىڭ ىشىندە قازاقستان اۋماعى ارقىلى ترانزيتپەن وتەتىن ادامدار.