ەلدە جۇرگىزۋشى كۋالىگىن الۋ ءتارتىبى وزگەردى

بۇرىن جۇرگىزۋشى كۋالىگىن الۋعا ۇمىتكەرلەر پراكتيكالىق ەمتيحاننان ءۇش مارتە وتە الماعان جاعدايدا تەوريالىق سەرتيفيكاتىنىڭ كۇشى جويىلاتىن ەدى. ال تەوريالىق ەمتيحاننان ءۇش رەت سۇرىنگەندەر 6 ايعا تەستىلەۋدەن ءوتۋ مۇمكىندىگىنەن ايىرىلاتىن. قازىر تالاپ وزگەردى.

 اقتوتى بورانوۆا، ق ر ءى ءى م اكىمشىلىك پوليتسيا كوميتەتى باسقارما باستىعىنىڭ ورىنباسارى:

- ءۇشىنشى رەت ەمتيحاننان وتە الماعان جاعدايدا دا اقىلى تۇردە قايتا تاپسىرۋعا ەشكىم مىندەتتەمەيدى. بۇل - حالىقتىڭ ءوز تاڭداۋى. ەنگىزىلگەن وزگەرىستەردىڭ باستى ماقساتى - ازاماتتاردىڭ ۋاقىتىن ۇنەمدەۋ، جۇرگىزۋشى كۋالىگىن الۋ كەزىندە ەمتيحان تاپسىرۋ راسىمدەرىن جەڭىلدەتۋ جانە قوسىمشا مۇمكىندىكتەر بەرۋ. ەڭ باستىسى، بۇل وزگەرىستەر سىبايلاس جەمقورلىقتىڭ الدىن الۋعا باعىتتالعان.

قاسىمحان ەرجان استاناداعى اۆتومەكتەپتەردىڭ بىرىندە مۇعالىم ءارى نۇسقاۋشى بولىپ جۇمىس ىستەيدى. ونىڭ ايتۋىنشا، وقۋشىلاردىڭ 70 پايىزى - ايەلدەر. جۇرگىزۋشى كۋالىگىن الۋعا ۇمىتكەرلەردىڭ باسىم بولىگى ەمتيحاندى ءبىرىنشى نەمەسە ەكىنشى رەت تاپسىرعاندا-اق ءساتتى وتەدى. ماماننىڭ پىكىرىنشە، بۇل سالاداعى باستى ماسەلەلەردىڭ ءبىرى - اۆتودرومدار سانىن ارتتىرۋ. سونداي-اق مامانداندىرىلعان حالىققا قىزمەت كورسەتۋ ورتالىقتارىنداعى ۇزىن-سونار كەزەكتى قىسقارتۋ قاجەت.

قاسىمحان ەرجان، اۆتومەكتەپ مۇعالىمى:

 - ەڭ سوڭعى وزگەرىسكە سايكەس، ءۇشىنشى سىناقتان وتە الماعان ۇمىتكەر 10 كۇننەن كەيىن ەمتيحاندى اقىلى تۇردە قايتا تاپسىرا الادى. بۇل اركىمگە قارجىلىق مۇمكىندىگىنە قاراي دايىندالىپ كەلۋگە كومەكتەسەتىن شىعار.

الايدا قازىر مامانداندىرىلعان حالىققا قىزمەت كورسەتۋ ورتالىقتارىندا كەزەك كوپ. ەمتيحانعا جازىلۋ ءۇشىن ءبىر اي بۇرىن كەزەككە تۇرۋ قاجەت. ماسەلەن، قازان ايىنىڭ سوڭىندا جەلتوقسانعا جازىلۋ اشىلادى. سوندىقتان ءقازىر كوپتەگەن وقۋشى ەمتيحاندى بىردەن تاپسىرىپ، وتۋگە تىرىسادى. بۇگىندە ەلدە 750-دەن استام اۆتومەكتەپ جۇمىس ىستەيدى. 2027 -جىلدان باستاپ ولاردىڭ قىزمەتىنە باقىلاۋ كۇشەيتىلەدى. سونىڭ ناتيجەسىندە ءبىلىم بەرۋ ساپاسى مەن تەحنيكالىق بازاسى تالاپقا ساي كەلمەيتىن ۇيىمداردىڭ سانى ەداۋىر قىسقارۋى مۇمكىن. بۇل تۋرالى اكىمشىلىك پوليتسيا كوميتەتىنىڭ وكىلدەرى مالىمدەدى.