ەلدە جاڭا باسپاناعا سۇرانىس ازايدى

 قازاقستاندىقتار دايىن باسپانانى ءجيى تاڭداي باستاعان. ەكىنشى نارىقتاعى باسپانا جاڭا ۇيلەردى بىرتىندەپ ىعىستىرۋدا. سەبەبى ساتىپ الۋشىلار جيھازى بار پاتەرگە قوسىمشا شىعىنسىز بىردەن قونىستانۋدى قالايدى. دەگەنمەن باسپاناعا جالپى سۇرانىس ءالى دە جوعارى. بيىل قاڭتار-قىركۇيەك ايلارىندا جىلجىمايتىن مۇلىكتى ساتىپ الۋ-ساتۋ كەلىسىمدەرىنىڭ سانى بىلتىرعا قاراعاندا شامامەن 6 پايىزعا ازايعان. ساراپشىلار جىل سوڭىنا دەيىن ەلدە 410- 420 مىڭعا جۋىق مامىلە جاسالادى دەپ بولجايدى. ال بىلتىر بۇل كورسەتكىش 449 مىڭ بولعان. جاقىندا نارىقتا جاڭا پاتەرلەر ۇستەمدىك قۇرعان بولسا، قازىر ونىڭ ۇلەسى ەكىنشى نارىقتاعى باسپانامەن تەڭەستى. ساراپشىلاردىڭ پىكىرىنشە، بۇل ءۇردىس ءالى دە جالعاسادى.

 لەۆ تەتين، ينۆەستيتسيا جانە جىلجىمايتىن مۇلىك نارىعىنىڭ حالىقارالىق ساراپشىسى:

- ەكىنشى نارىقتاعى پاتەردىڭ ىشىندە جيھازدىڭ ءبىر بولىگى بولۋى مۇمكىن. ياعني پاتەرگە بىردەن كوشىپ كىرىپ، تۇرا بەرەسىز. ديزاينعا اقشا جۇمسامايسىز. جوندەۋ بىتكەنشە باسقا باسپانانى جالداپ تۇرۋدىڭ دا قاجەتى جوق. سەبەبى مۇنىڭ ءبارى قوسىمشا شىعىن. بۇعان قۇرىلىس كومپانيالارى ساۋداسىنىڭ تومەندەۋى دە سەبەپ.

ساراپشىلاردىڭ باعالاۋىنشا، 2026 -جىلى جاڭا پاتەرلەردىڭ ساتىلىمى شامامەن 40 پايىزعا قىسقارعان. كەيبىر كومپانيالار تۇرعىن ءۇي كەشەندەرىنىڭ تۇجىرىمداماسىن قايتا قاراپ، باسپانانىڭ ساناتىن وزگەرتۋگە، ءتىپتى جەكەلەگەن جوبالاردى كەيىنگە شەگەرۋگە ءماجبۇر.

 ۆيكتور ميكريۋكوۆ، قازاقستان قۇرىلىسشىلار قاۋىمداستىعىنىڭ پرەزيدەنتى:

 - بيىلعى جاعداي ادەتتەگىدەن مۇلدە باسقاشا. ءساۋىر ايىنا دەيىن مامىلەلەر سانى ءبىرشاما قالىپتى بولدى. ال سودان كەيىن ۇزاققا سوزىلعان قۇلدىراۋ باستالدى. ول ءالى توقتاعان جوق. سەبەبى سالىق كودەكسىندەگى تۇبەگەيلى وزگەرىستەر قۇرىلىس جوبالارىنىڭ قۇرىلىمىنا ايتارلىقتاي اسەر ەتتى. قۇرىلىس جۇرگىزۋ قىمباتتادى. سوعان سايكەس باعا دا ءوستى. ال باعا كوتەرىلگەندە سۇرانىستى بۇرىنعى دەڭگەيدە ۇستاپ تۇرۋ مۇمكىن ەمەس.

ۇلەستىك قۇرىلىس تۋرالى زاڭناماداعى وزگەرىستەر دە نارىققا قوسىمشا سالماق ءتۇسىردى. تۇزەتۋلەر كۇشىنە ەنگەننەن كەيىن ءبىرقاتار جوبا جاڭا تالاپتارعا ساي بولا المادى. ساراپشىلاردىڭ دەرەگىنشە، سول كەزدە نارىقتاعى ۇسىنىستىڭ شامامەن 62 پايىزى ساتىلىمنان الىنعان. قۇرىلىس كومپانيالارىنىڭ ءبارى بىردەي نارىققا قايتا ورالا العان جوق. بۇعان ينفراقۇرىلىمى دايىن، قۇرىلىسقا قولايلى جەر تەلىمدەرىنىڭ تاپشىلىعى دا اسەر ەتىپ وتىر. جاڭا اۋماقتاردى يگەرۋ ءۇشىن جولدارعا، ينجەنەرلىك جەلىلەرگە، مەكتەپتەر مەن الەۋمەتتىك نىساندارعا قوسىمشا قاراجات قاجەت.

لەۆ تەتين، ينۆەستيتسيا جانە جىلجىمايتىن مۇلىك نارىعىنىڭ حالىقارالىق ساراپشىسى:

- الدا ءالى ەكى اي بولسا دا، جىل قورىتىندىسى قازىردىڭ وزىندە ايقىندالا باستادى. جىلدى باعانىڭ 15- 16 پايىزدىق وسىمىمەن اياقتايمىز. باعانىڭ كوتەرىلۋىنە اسەر ەتەتىن نەگىزگى فاكتورلاردىڭ ءبىرى - جىل باسىندا كۇشىنە ەنگەن جاڭا سالىق كودەكسى. ول قۇرىلىسشىلارعا قوسىمشا 16 پايىزدىق جۇكتەمە اكەلدى. ەكىنشىدەن، ءبىز ءالى دە يمپورتقا تاۋەلدىمىز.

وسىلايشا، تۇرعىن ءۇي نارىعىندا كۇردەلى جاعداي قالىپتاستى. جاڭا باسپاناعا ۇسىنىس ازايىپ، قۇرىلىس قارقىنى باياۋلاپ كەلەدى. ال تۇرعىن ءۇيدىڭ قولجەتىمدىلىگى ءالى دە وزەكتى ماسەلە. قۇرىلىسشىلار قاۋىمداستىعى مۇنىڭ جۇمىسپەن قامتۋعا دا اسەر ەتەتىنىن ەسكەرتەدى. بۇگىندە قۇرىلىس سالاسىندا ميلليونعا جۋىق ادام ەڭبەك ەتەدى. جاڭا جوبالاردىڭ توقتاۋى قۇرىلىسشىلارمەن قاتار، وسى سالاعا قىزمەت كورسەتەتىن باسقا كاسىپ يەلەرىنە دە قيىندىق اكەلۋى مۇمكىن.

ساراپشىلاردىڭ بولجامىنشا، الداعى ەكى جىلدا ەكىنشى نارىقتاعى باسپانامەن جاسالاتىن مامىلەلەردىڭ ۇلەسى 60- 65 پايىزعا جەتۋى مۇمكىن. 

 24.kz