ەلدە باستاپقى جارناسى %10 بولاتىن يپوتەكا ازىرلەنەدى
استانا. قازاقپارات - ەلدە يپوتەكانىڭ باستاپقى جارناسىن 10 پايىزعا دەيىن تومەندەتۋ جوسپارلانىپ وتىر. ونەركاسىپ جانە قۇرىلىس مينيسترلىگى «وتباسى بانكپەن» بىرلەسىپ، جاڭا تۇرعىن ءۇي نەسيەسىنىڭ قارجىلىق تەتىكتەرىن ازىرلەۋدە.
جاڭا يپوتەكا بويىنشا قارىز الۋشىلارعا قويىلاتىن تالاپتار مەن ءوتىنىم قابىلداۋ مەرزىمى بەلگىسىز. بۇل شارتتار قارجىلىق مودەل تولىق ازىرلەنگەننەن كەيىن جاريالانباق. باعدارلاماعا قاتىستى ناقتى ۇسىنىستار 2027 -جىلى تانىستىرىلادى، دەپ حابارلايدى 24KZ.
ولجاس ساپاربەكوۆ، ق ر ونەركاسىپ جانە قۇرىلىس ۆيتسە-ءمينيسترى:
- قازىر تۇرعىندارعا قولجەتىمدى قارجىلىق مۇمكىندىكتەر ۇسىنۋ جولدارىن قاراستىرىپ جاتىرمىز. كەيبىر باعدارلامالارعا سۇرانىستىڭ كۇرت ءوسۋى حالىقتىڭ مۇنداي قولداۋ تەتىكتەرىنە مۇقتاج ەكەنىن دالەلدەدى. سوندىقتان ەڭ الدىمەن قازاقستاندىقتار ءۇشىن وسى قارجى قۇرالدارىنىڭ قانشالىقتى ماڭىزدى ەكەنىن ەسكەرۋ قاجەت.
ەسكە سالا كەتەيىك، 3-قاراشادا «وتباسى بانك» ايەلدەرگە ارنالعان «ۇماي» يپوتەكالىق باعدارلاماسى بويىنشا ءوتىنىم قابىلداۋدى باستاعان. ءبىر كۇندە جالپى سوماسى 20 ميلليارد تەڭگەگە جەتەتىن 850 ءوتىنىم ءتۇسىپ، بولىنگەن قاراجات ليميتى تاۋسىلعان. وسىعان بايلانىستى بانك ءوتىنىم قابىلداۋدى توقتاتۋعا ءماجبۇر بولدى.
بۇل باعدارلاما بويىنشا باستاپقى جارنا ءىرى قالالاردا 20 پايىز، ال وڭىرلەردە كەمىندە 15 پايىز بولادى. بۇعان دەيىنگى قارجىلاندىرۋ كەزەڭىندە دە بولىنگەن قاراجات نەبارى جەتى ساعات ىشىندە يگەرىلگەن.