ەلگە امان ورالساق دەگەن ءۇمىتىمىزدى ۇزبەدىك - اۋعان سوعىسىنىڭ ارداگەرى

اتىراۋ. KAZINFORM - بۇگىن - كەڭەس اسكەرىنىڭ اۋعانستاننان شىعارىلعان كۇنى. بيىل وعان 35 جىل تولدى. كەڭەس اسكەرىنىڭ قۇرامىندا اۋعان سوعىسىنا قازاقستاننان 22 مىڭ 269 ادام قاتىسقان. سولاردىڭ قاتارىندا اتىراۋلىق رافحات احمەتوۆ تە بار.

اتىراۋ وبلىسىنىڭ رەسەي فەدەراتسياسىمەن شەكارالاس قۇرمانعازى اۋدانىندا تۇراتىن رافحات احمەتوۆ مەكتەپتى 1986 -جىلى بىتىرگەن. سول جىلى رەسەيدىڭ استراحان قالاسىنداعى ۋچيليشەگە وقۋعا ءتۇسىپ، اۆتوكران جۇرگىزۋشىسى ماماندىعىن العان. ال، 1987-جىلدىڭ كۇزىندە ءوزى تۋىپ-وسكەن اۋداننىڭ اسكەري كوميسسارياتى ارقىلى ارميا قاتارىنا شاقىرىلعان.

«سول جىلدارى جاس جىگىتتەردىڭ ءبارى دەرلىك اسكەرگە بارۋدى ويلاپ جۇرەتىن. دەنساۋلىعىندا كىناراتى بار جىگىتتەر عانا اسكەرگە شاقىرىلمايتىن. ءبىز اسكەرگە بارۋدان قاشقان ادامدى كورمەدىك. ويتكەنى، سول كەزدەگى جاستار اسكەرگە بارماي قالۋدى ۇيات سانايتىن ەدى. ءبىراق، اۋعانستانداعى سوعىسقا بارامىن دەپ ويلامادىم»، - دەيدى سول كۇندەردى ەسكە العان رافحات احمەتوۆ.

ول العاشىندا تۇركىمەنستان رەسپۋبليكاسىنىڭ استاناسى - اشحاباد قالاسىنداعى اسكەري بولىمگە تۇسكەن. مۇندا ب م پ-2 اسكەري ماشيناسىنىڭ اتقىش- وپەراتورى بولۋى ءۇشىن ارنايى كۋرستان وتكەن. ال، كەڭەس اسكەرلەرىنىڭ اۋعانستانداعى شەكتەۋلى كونتينگەنتىنىڭ قۇرامىنا 1988-جىلدىڭ باسىندا بارعان.

«سوعىستىڭ اتى - سوعىس. ونىڭ زاردابىن ايتىپ جەتكىزۋ مۇمكىن ەمەس. اۋعانستانعا 18-20 جاستاعى جىگىتتەر سوعىسامىز دەپ ەمەس، اسكەري بۇيرىقتى ورىنداۋ ءۇشىن باردى. ءبىراق، ءبىراز جىگىت وققا ۇشتى، كەيبىرى ءىز-ءتۇزسىز جوعالىپ كەتتى. ماپەلەپ وسىرگەن ۇلىن اسكەردەن تىرىلەي ەمەس، تابىتپەن كۇتىپ العان اتا- انانىڭ مۇڭىن، قايعى- قاسىرەتىن سول سوعىسقا بارعاندار عانا تۇسىنەتىن شىعار. ويتكەنى، بۇل سوعىس ءبىزدىڭ دە، اتا- انامىز بەن تۋىستارىمىزدىڭ دا جۇرەگىنە جازىلماس جارا سالدى. اۋعانستانداعى ءار كۇنىمىز ۇرەيمەن ءوتتى. ەلگە امان- ەسەن جەتسەك دەگەن ءۇمىتىمىزدى ۇزبەدىك» ، - دەيدى رافحات احمەتوۆ.

اۋعان سوعىسىنىڭ ارداگەرى وزگە ەلدەگى اسكەري ءومىرىن ەسكە الۋدىڭ قيىن ەكەنىن ايتادى. سەبەبى، بۇل - سول ۇرىسقا قاتىسقاندار ءۇشىن ۇمىتىلمايتىن سوعىس.

«ءبىز اۋعانستاندا قاي ەلدىڭ مۇددەسى ءۇشىن سوعىستىق؟ كىمنىڭ وتانىن قورعادىق؟ بۇل ساۋالدارعا ەشكىم ەشقاشان جاۋاپ بەرمەيدى. ءبىراق، ءبىز - سولداتپىز، اسكەري بۇيرىقتى ورىنداۋعا ءماجبۇر بولدىق»، - دەيدى ول.

كەڭەس وداعى كەزىندە قاتارداعى جاۋىنگەرلەرگە «ەرلىگى ءۇشىن» مەدالى بەرىلە قويمايتىن. اۋعان سوعىسىنىڭ ارداگەرى رافحات احمەتوۆ «ەرلىگى ءۇشىن» مەدلىمەن ناگرادتالعان. بۇل مەدال وعان جاۋىنگەرلىك تاپسىرمانى ورىنداۋداعى باتىلدىعى، اسكەري وپەراتسيانى وتكىزۋ كەزىندەگى ەرلىگى ءۇشىن بەرىلگەن.

اسكەردەن 1989-جىلى ورالىپ، كولحوزعا جۇمىسقا ورنالاسقان. كەيىن 2000-جىلى قۇرمانعازى اۋداندىق ىشكى ىستەر بولىمىنە اۋىسىپ، قوعامدىق ءتارتىپتىڭ ساقتالۋىنا ۇلەسىن قوسقان. ال، 2013 -جىلى زەينەت دەمالىسىنا شىققان.

اۆتور

جولداسبەك شوپەعۇل