كەيىنگى ەكى جىلدا نەسيە الاتىندار كۇرت ارتتى - دەپۋتات

كەيىنگى 2 جىلدا تۇتىنۋشى كرەديتتەر ايتارلىقتاي ءوستى. بۇل تۋرالى پارلامەنت ماجىلىسىندە كرەديت بەرۋ كەزىندە تاۋەكەلدەردى ازايتۋعا ارنالعان زاڭ جوباسىنىڭ تانىستىرىلىمىندا پالاتا ءتوراعاسىنىڭ ورىنباسارى دانيا ەسپايەۆا ايتتى، دەپ حابارلايدى Kazinform.

پارلامەنتتىڭ ءبىر توپ دەپۋتاتتارى باستاماشى بولعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كرەديت بەرۋ كەزىندە تاۋەكەلدەردى ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ماجىلىسكە 20-جەلتوقساندا ەنگىزىلدى.

«كەيىنگى 2 جىلدا تۇتىنۋشى كرەديتتەردىڭ ءوسۋ قارقىنى بايقالدى. ەگەر 2021 -جىلعى 1-قاڭتاردا بۇل كورسەتكىش 5,8 تريلليون تەڭگە بولسا، 2023 -جىلعى 1-قاراشادا ونىڭ كولەمى 13 تريلليون تەڭگەنى قۇرادى، ياعني ءوسىم 2 ەسەدەن استى. كرەديت بەرۋ كولەمىنىڭ ارتۋىمەن قاتار پروبلەمالى قارىز الۋشىلاردىڭ دا سانى 1 ميلليون 200 مىڭنان 1 ميلليون 600 مىڭعا دەيىن (90 كۇن ىشىندە ءوز قارىزدارىن جابا الاماعاندار) ۇلعايدى»، - دەدى د. ەسپايەۆا.

سونىمەن قاتار، كوللەكتورلىق كومپانيالار پورتفەلىندەگى پروبلەمالى قارىز الۋشىلار سانى دا ءوستى. ماسەلەن، 2023 -جىلعى 1-قاراشاداعى جاعداي بويىنشا ولاردىڭ سانى - 836 مىڭ ادام، ونىڭ 670 مىڭى ميكروقارجىلىق ۇيىمداردان قارىز العان.

«وسىعان دەيىن 20-قازاندا ماجىلىستە حالىقتىڭ شامادان تىس كرەديت الۋىن ازايتۋ جانە قارجىلىق ساۋاتتىلىقتى ارتتىرۋعا ارنالعان پارلامەنتتىك تىڭداۋ ءوتتى. وسى تىڭداۋدىڭ قورىتىندىسى نەگىزىندە اۋقىمدى ۇسىنىستار ازىرلەندى. بۇل تۇرعىدا تۇتىنۋشى كرەديت بەرۋدى شەكتەۋ، تولەم قابىلەتتىلىكتى تيىسىنشە باعالاۋ، ونلاين- كرەديت بەرۋ شارتتارىن قاتاڭداتۋ، سونداي- اق پروبلەمالى قارىز الۋشىلارمەن جۇمىس جونىندەگى باسقا دا شارالار كىردى. ۇسىنىستاردى ورىنداۋ جونىندەگى شەشىمدەردىڭ ءبىر بولىگى قازىردىڭ وزىندە وسى زاڭ جوباسىنا ەنگىزىلدى»، - دەدى دەپۋتات.

اۆتور

رۋسلان عابباسوۆ