ۇكىمەت پرەزيدەنت جولداۋىن ىسكە اسىرۋ شارالارىن قاراستىرادى

ەسكە سالايىق، ۆيتسە-پرەزيدەنت ەرلان قارين قۇرىلتايداعى پارتيا فراكسيالارىنىڭ جەتەكشىلەرىمەن كەزدەسىپ، پرەزيدەنت جولداۋىنداعى ستراتەگيالىق باستامالاردى زاڭنامالىق تۇرعىدان قامتاماسىز ەتۋ ماسەلەلەرىن تالقىلادى.

ەرلان قارين پرەزيدەنت سويلەگەن سوزىندە كەلەر ۇرپاقتىڭ مۇددەسى ءۇشىن جۇزەگە اسىرىلاتىن جۇيەلى وزگەرىستەرگە باسا نازار اۋدارعانىن اتاپ ءوتتى. «حالىقتىق قۇرىلىس» مىندەتتەرى حالىقتىق تسيفرلىق ەكونوميكانى دامىتۋمەن تىعىز ساباقتاستىرىلىپ، جولداۋدىڭ ءون بويىنان كورىنىس تاپتى. مەملەكەت كۇش- جىگەرىن بۇكىل ازاماتتىق ينفراقۇرىلىمدى جاڭعىرتۋدىڭ ىرگەلى ماسەلەلەرىنە شوعىرلاندىرىپ وتىر.

ۆيتسە- پرەزيدەنتتىڭ ايتۋىنشا، مەملەكەت قوردالانعان جۇيەلى پروبلەمالاردى بىرتىندەپ شەشىپ، بولاشاقتاعى دامۋدىڭ بەرىك نەگىزىن قالاۋدا.

— پرەزيدەنت جولداۋدا ستراتەگيالىق ماڭىزى بار جاڭا باستامالاردى كوتەردى. ولار قۇرىلتاي تاراپىنان ساپالى زاڭنامالىق قامتاماسىز ەتۋدى تالاپ ەتەدى. وسى باعىتتا پارتيا فراكسيالارىمەن بىرلەسىپ، ءتيىمدى جۇمىس ىستەۋگە دايىنبىز، — دەدى ەرلان قارين.

پارتيا فراكسيالارىنىڭ جەتەكشىلەرى جولداۋدا كوتەرىلگەن باستامالاردى قولداپ، اشىق ءارى سىندارلى ىنتىماقتاستىققا جانە بىرلەسكەن جۇمىسقا دايىن ەكەنىن مالىمدەدى.

سونىمەن قاتار، كەشە قۇرىلتاي وتىرىسىندا ءتوراعا ايبەك دادەباي پرەزيدەنت جولداۋىنىڭ ماڭىزى جونىندە مالىمدەمە جاساعان ەدى.

ونىڭ سوزىنشە، مەملەكەت باسشىسىنىڭ جولداۋى — ەلىمىزدىڭ جاڭا جاعدايداعى الداعى ناقتى ناقتى دامۋ باعدارىن ايقىندايتىن باعدارلامالىق قۇجات.

— بۇل — كونستيتۋتسيا قابىلدانىپ، بۇكىل ساياسي جۇيە جاڭعىرتىلعاننان كەيىنگى العاشقى جولداۋ. ەندى مەملەكەت باسشىسى جاڭا ساياسي ينستيتۋتتاردىڭ الدىنا ناقتى مىندەتتەر قويىپ وتىر، ياعني — جۇرگىزىپ جاتقان رەفورمالاردى ناقتى مازمۇنمەن بايىتىپ، ولاردىڭ جۇزەگە اسىرىلۋىن قامتاماسىز ەتۋ. وسى ورايدا، قۇرىلتاي دەپۋتاتتارىنا دا زور ءۇمىت ارتىپ وتىر، — دەدى ايبەك دادەباي.

سونىمەن قاتار، پرەزيدەنتىمىزدىڭ باستى نازارىندا ءاردايىم ادام، ونىڭ ءال اۋقاتى جانە وڭىرلەردى دامىتۋ ماسەلەلەرى تۇرعانىن اتاپ ءوتتى. قۇرىلتاي ءتوراعاسىنىڭ سوزىنشە، ءاربىر قازاقستاندىق جولداۋدان ءوزى ءۇشىن ماڭىزدى شەشىمدەردى تابا الادى. ەڭ باستىسى، جولداۋ ەلىمىز بەن ازاماتتاردىڭ يگىلىگى جولىندا بارلىق مەملەكەتتىك جانە قوعامدىق قۇرىلىمداردىڭ جۇيەلى ءارى قارقىندى جۇمىس ىستەۋىنە تىڭ سەرپىن بەرەدى. پرەزيدەنت ۇزاق ۋاقىت بويى ءتيىستى شەشىمىن تاپپاي كەلگەن تۇيتكىلدى ماسەلەلەرگە تاعى دا ناقتى جاۋاپ بەردى. ولار ەلىمىزدىڭ الداعى ۇزاق جىلعا ارنالعان تابىستى ءارى ورنىقتى دامۋىنىڭ بەرىك نەگىزىن قالادى.

مەملەكەت باسشىسىنىڭ جولداۋىنا قاتىستى تەك لاۋازىمدى تۇلعالار عانا ەمەس، ءارتۇرلى سالا ماماندارى ءدا ۇن قوسىپ، ءوي بولىسىپ جاتىر.

ماسەلەن، استانا قالاسىنداعى № 101 مەكتەپ ديرەكتورىنىڭ ورىنباسارى قۋانار مەيمان پرەزيدەنت جولداۋىنداعى ءبىلىم بەرۋ سالاسىنا قاتىستى باستامالارعا پىكىر ءبىلدىردى.

ونىڭ ايتۋىنشا، مۇعالىمدەردى ارتىق قۇجاتتامادان بوساتۋ، مەكتەپتەردىڭ ماتەريالدىق بازاسىن نىعايتۋ جانە بالالاردى جاۋاپكەرشىلىككە تاربيەلەۋ ماڭىزدى.

— ءبىلىم بەرۋ سالاسىنداعى قاعازباستىلىقتى ازايتىپ، مۇعالىمدەردى ارتىق جۇمىستان بوساتۋ — وزەكتى ماسەلەلەردىڭ ءبىرى. ويتكەنى ۇستازدىڭ باستى مىندەتى — قۇجات تولتىرۋ ەمەس، بالاعا ساپالى ءبىلىم بەرىپ، سانالى ءارى جاۋاپكەرشىلىگى جوعارى ۇرپاق تاربيەلەۋ. سونىمەن قاتار وقۋشى مەن مۇعالىم اراسىنداعى ءوزارا تۇسىنىستىك پەن سىيلاستىقتى نىعايتۋ ماڭىزدى. بۇل قاعيدالار «ادال ازامات» ءبىرتۇتاس تاربيە باعدارلاماسىنىڭ قۇندىلىقتارىمەن دە ۇندەسەدى، — دەدى ول.

قۋانار مەيماننىڭ سوزىنشە، ءبىلىم بەرۋ سالاسىن دامىتۋ ءۇشىن مۇعالىمدەردىڭ جاعدايىن جاقسارتۋمەن قاتار، مەكتەپتەردىڭ ماتەريالدىق- تەحنيكالىق بازاسىن نىعايتۋ جانە زاماناۋي ءبىلىم بەرۋ ورتاسىن قالىپتاستىرۋ قاجەت.

وسى ورايدا ايتا كەتەيىك، سوڭعى جەتى جىلدا ءبىلىم سالاسىنا بولىنەتىن قارجى ءۇش ەسە ارتىپ، 6,4 تريلليون تەڭگەگە جەتتى. سوڭعى بەس جىلدا 1 ميلليوننان استام وقۋشىعا ارنالعان 1120 مەكتەپ سالىندى. سونىمەن قاتار 5 مىڭنان استام اۋىل مەكتەبىنىڭ ماتەريالدىق-تەحنيكالىق بازاسى جاڭارتىلىپ، ءبىلىم بەرۋ ۇيىمدارىندا 7 مىڭنان استام زاماناۋي ءپان كابينەتى جابدىقتالعان.

ال قۋانار مەيمان پرەزيدەنتتىڭ كەلەسى جىلدى جالپىحالىقتىق اۋقىمدى قۇرىلىس جىلى دەپ جاريالاۋى ءبىلىم بەرۋ ينفراقۇرىلىمىن دامىتۋعا دا سەرپىن بەرەتىنىن ايتادى. ونىڭ پىكىرىنشە، بۇل وسكەلەڭ ۇرپاقتىڭ ساپالى ءبىلىم الىپ، جان- جاقتى دامۋىنا جاعداي جاساۋ باعىتىنداعى جۇمىستاردىڭ جالعاساتىنىن كورسەتەدى.

ەسكە سالايىق، بۇعان دەيىن پرەزيدەنت جولداۋىنداعى ەكونوميكالىق باسىمدىقتار ەلگە قانداي مۇمكىندىك بەرەتىنى جونىندەگى ساراپشى پىكىرىن جاريالاعانبىز.

اۆتورلار

الپامىس فايزوللا