ۇكىمەت رەزەرۆىن پايدالانۋ قاعيدالارى وزگەردى

جاڭا قاعيدالارعا سايكەس، شۇعىل شىعىنداردى قارجىلاندىرۋ ءۇشىن رەزەرۆتەن قاراجات بىرنەشە جاعدايدا ءبولىنۋى مۇمكىن. اتاپ ايتقاندا، قارجىلاندىرۋ بيۋدجەت كودەكسىنىڭ 18-بابىنىڭ 1-تارماعىنا سايكەس جۇزەگە اسىرىلۋعا ءتيىس. سونىمەن قاتار قاراجاتقا دەگەن قاجەتتىلىك اعىمداعى قارجى جىلىندا تۋىنداۋى جانە بيۋدجەتتىك باعدارلاما اكىمشىسىنىڭ وتكەن كەزەڭدەردەگى مىندەتتەمەلەرىنە بايلانىستى بولماۋى كەرەك.

سونداي-اق ەلوردانىڭ، وبلىستاردىڭ جانە رەسپۋبليكالىق ماڭىزى بار قالالاردىڭ جەرگىلىكتى اتقارۋشى ورگاندارى رەزەرۆتەرىنىڭ قاراجاتىن كوممۋنالدىق مەنشىكتەگى ەنەرگيا ءوندىرۋشى ۇيىمداردىڭ زالالدارى مەن بەرەشەگىن وتەۋگە باعىتتاۋ مۇمكىندىگى جەكە قاراستىرىلعان. بۇل نورما وڭالتۋ راسىمىنەن ءوتىپ جاتقان، سونىمەن قاتار ەلەكتر جانە جىلۋ ەنەرگياسىن وندىرەتىن ءارى تەڭگەرىمىندە 20 دان استام جىلۋ كوزى بار كاسىپورىندارعا قاتىستى قولدانىلادى.

وزگەرىستەر بولىنگەن قاراجاتتىڭ جۇمسالۋى تۋرالى ەسەپتىلىككە قويىلاتىن تالاپتاردى دا قامتيدى. قارجى جىلى اياقتالعاننان كەيىن بيۋدجەتتىك باعدارلامالاردىڭ اكىمشىلەرى قاراجات قاي رەزەرۆتەن بولىنگەنىنە قاراي بيۋدجەتتىڭ اتقارىلۋى جونىندەگى ورتالىق نەمەسە جەرگىلىكتى ۋاكىلەتتى ورگاندارعا ەسەپ بەرۋگە مىندەتتى.

ەسەپتەردە قاراجاتتىڭ قانداي ماقساتقا بولىنگەنى جانە ونى پايدالانۋ ناتيجەسىندە قانداي كورسەتكىشتەرگە قول جەتكىزىلگەنى كورسەتىلۋگە ءتيىس. بۇدان بولەك، قارجىلاندىرۋدىڭ وزگە كوزدەرى بولماۋىنىڭ سەبەپتەرى نەگىزدەلىپ، ءتيىستى شىعىنداردى بيۋدجەتتى قالىپتاستىرۋ كەزىندە نەلىكتەن الدىن الا قاراستىرۋ مۇمكىن بولماعانى ءتۇسىندىرىلۋى قاجەت.

جاڭا قاعيدالار 2026 -جىلعى 3 -قاراشادان باستاپ قولدانىسقا ەنگىزىلەدى.

ەسكە سالا كەتسەك، 29-قاراشادا ەلىمىزدە كەزەكتەن تىس ءماسليحات سايلاۋى وتەدى. ساياسي ناۋقانعا ۇكىمەت رەزەرۆىنەن قارجى بولىنەدى.