ۇكىمەت «الاتاۋ قالاسىنىڭ ارناۋلى قۇقىقتىق رەجيمى تۋرالى» كونستيتۋتسيالىق زاڭعا قاجەتتى وزگەرىستەر دايىندايدى
استانا. KAZINFORM - بۇگىن قازاقستان حالقىنا جولداۋىن جاريالاۋ كەزىندە پرەزيدەنت قاسىم-جومارت توقايەۆ الاتاۋ قالاسىنا قاتىستى تاپسىرما بەردى.
مەملەكەت باسشىسىنىڭ ايتۋىنشا، ينۆەستيتسيالار مەن كاسىپكەرلىك ءۇشىن قولايلى ورتا رەتىندە قاراستىرىلعان الاتاۋ جەدەل دامۋ قالاسىن قۇرۋدىڭ زور ماڭىزى كوپشىلىككە ايقىن بولدى. كەز كەلگەن حالىقارالىق يۋريسديكتسيانىڭ ۇزاق مەرزىمدى تارتىمدىلىعىن قامتاماسىز ەتەتىن باستى شارت - ءتيىمدى سوت جۇيەسى.
سوندىقتان «الاتاۋ» قالاسىندا سوت تورەلىگىن جۇزەگە اسىرۋدىڭ جوعارى ساپاسىن قامتاماسىز ەتەتىن سوت جۇيەسى قۇرىلۋى ءتيىس. كوممەرتسيالىق داۋلاردى اعىلشىن جالپى قۇقىعى ۇلگىسىنە نەگىزدەلگەن ينۆەستيتسيالىق سوت قارايتىن بولادى.
ارنايى قۇقىقتىق رەجيمگە قاتىستى باسقا بارلىق ماسەلەلەر ازاماتتىق سوتتىڭ قۇزىرەتىنە جاتادى.
مەملەكەت باسشىسىنىڭ سوزىنە قاراعاندا، ۇكىمەت 2027-جىلعى قاڭتار ايىنىڭ سوڭىنا دەيىن «الاتاۋ قالاسىنىڭ ارناۋلى قۇقىقتىق رەجيمى تۋرالى» كونستيتۋتسيالىق زاڭعا قاجەتتى وزگەرىستەر مەن تولىقتىرۋلاردى قۇرىلتايدىڭ قاراۋىنا ۇسىنۋى ءتيىس.
ايتا كەتەلىك توقايەۆ ينۆەستور تارتۋداعى جۇيەسىزدىكتى سىنعا العان ەدى.
