كينو - ۇلتتىق ۇستانىم ميسسياسىن اتقارۋ كەرەك - دەپۋتات

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات جاناربەك ءاشىمجان ەلىمىزدە ۇلتتىق كينونى كورگىسى كەلەتىندەردىڭ قاتارى ارتقانىن ايتتى.

- سوڭعى جىلدارى ەلىمىزدە ءتۇرلى باعىتتا تۇسىرىلگەن فيلمدەر از ەمەس. الايدا، سول فيلمدەردىڭ ساپاسىنا قاتىستى سۇراق-ساۋالدار ءپىسىپ جەتىلىپ، ارناسىنان اسىپ تۇر… كينو - يدەولوگيا، كينو - ساياسات، كينو - كەرەك دەسەڭىز ۇلتتىڭ قاۋىپسىزدىگى. جاپونيا 2- دۇنيەجۇزىلىك قىرعىننان كەيىن ۇرپاق ساناسى مەن ۇلتتىق بولمىسىن ءدال وسى ۇلتتىق كينو ارقىلى جۇيەلەپ العانى ايداي اقيقات.

كينو -ءبۇتىن ۇلتتى ۇيىتاتىن، سول ارقىلى جاس ۇرپاقتىڭ ساناسىنا اسەر ەتەتىن كۇشتى قارۋ. ءار حالىقتىڭ ۇلتتىق بولمىسى، تاريحى، سالت-ءداستۇرى، ءدىني ۇستانىمى، الەۋمەتتىك جىكتەلىسى بار. اسىرەسە، ءدال قازىرگىدەي قازاق قوعامى شەتەلدىك سەريالداردى تامسانا تاماشالاپ، جاستاردىڭ ساناسىن بوتەن جۇرتتىڭ مادەنيەتى جاۋلاپ جاتقان تۇستا ۇلتتىق كينوعا كوڭىل ءبولۋدىڭ ماڭىزدىلىعى ءسات سايىن ارتىپ تۇر. كينو ساياساتى قوعام كوشىن باستاۋى كەرەك ەدى، ال ءبىزدىڭ بۇل ونەرىمىز قوعامنىڭ جەتەگىندە كەتىپ بارادى، - دەدى ج. ءاشىمجان ۇكىمەت باسشىسىنىڭ اتىنا جولداعان ساۋالىندا.

بۇل تۇرعىدا ول كەيىنگى جىلدارى مەملەكەتتىك تاپسىرىسپەن تاريحي تۇلعالارعا ارنالعان سەريالدار مەن كوركەم فيلمدەر ءتۇسىرىلىپ جاتقانىن ەسكە سالدى.

- كينو - ءبىرىنشى كەزەكتە بيزنەس ەمەس، ونەر، ۇلتتىق ۇستانىم ميسسياسىن اتقارۋ كەرەك. سوندىقتان رەجيسسەرلەر مەن سسەناريستەر ەڭ اۋەلى كينوفەستيۆالداردان سىيلىق الۋدى ەمەس، كينونىڭ ۇلتقا اكەلەر پايداسىن، ۇرپاققا بەرەر ءتالىمىن كوبىرەك ويلاعانى لازىم. ءابجىلانداي ىسقىرعان بۇگىنگى جاھاندانۋ ءداۋىرى ەلىمىزدىڭ ۇلتتىق كينو ساياساتىن تۇبەگەيلى قايتا قاراۋعا ماجبۇرلەپ وتىر. ءتىپتى، بالا-شاعامىزبەن قاتار وتىرىپ فيلم كورسەڭ، بەتىڭنەن وتىڭ شىعىپ كىرەرگە تەسىك تاپپايسىڭ. انايى ەپيزودتار مەن سۇيەگىڭنەن وتەتىن بەيپىل ديالوگتار، شۇپ-شۇبار ءتىل، اتىس-شابىس، جاداعاي جارگون سوزدەر، ودان قالسا ءار جەردەن ۇرلاپ-جىرلاپ، كوشىرىپ العان ينكۋباتور- فيلمدەر. كەرەك دەسەڭىز، مۇنداي تەرىس يميدج تۋدىراتىن فيلمدەر جۇرتتىڭ اشۋىن تۋعىزۋدا. ەڭ قيىنى - قاتاڭ سۇزگىنىڭ جوقتىعىنان قازاقتىڭ كوركەم دە شۇرايلى ءتىلى كۇيرەپ جاتىر. ەكران مەن ەفيردە كوشەنىڭ ءتىلى ۇستەمدىك الا باستادى. سونىمەن قاتار، ءداستۇرىڭدى ءدالدۇرىش قىپ، تەرىس ءدىني اعىمداردىڭ ناسيحاتىن كۇيتتەپ جۇرگەن تاسپالار دا جوق ەمەس، - دەدى دەپۋتات.

ونىڭ سوزىنە قاراعاندا، 2024 -جىلى قازاقستاندىق 90 فيلم پروكاتقا شىعىپتى. سونىڭ 56-سى - كومەديا. كارتينالار جىل سايىن 30 فيلمگە تولىققان. كاسسادان تۇسكەن تۇسىمدەر دە از ەمەس. 6 فيلم ميلليارد تەڭگەدەن استام كاسسا جيناعان. ءبىراق كوپشىلىگىنىڭ ساپاسى سىن كوتەرمەيدى.

- 2024 -جىلى قازاقستاندىقتار 17 ميلليون 47 مىڭ 524 رەت كينوعا بارسا، سونىڭ ۇشتەن ءبىرى - التى ميلليونعا جۋىعى وتاندىق فيلمدەردى تاماشالاعان. سۇرانىس جوق ەمەس، بار! الەۋمەتتىك ساۋالناما بويىنشا ۇلتتىق كينونى كورگىسى كەلەتىندەردىڭ قاتارى ارتقان. ءسوز جوق، كينو نارىعى كوممەرتسيالىق تۇرعىدان ءوزىن ءوزى قارجىلاندىرۋ كەرەك. الايدا، الەمدە ۇلتتىق كينو ونەرىنە مەملەكەتتىك دەڭگەيدە قولداۋ جاساپ وتىرعان ەلدەر بار. ماماندار دايارلاۋدا ارنايى مەملەكەتتىك ساياسات بەلگىلەنگەن. ماسەلەن، گەرمانيانىڭ كينو سالاسىنا مامان دايىنداۋ ءۇشىن جىل سايىن 76 ميلليون ەۋرو بولەدى، - دەدى ول.

ونىڭ پايىمىنشا، بۇكىل مەملەكەت بويىنشا تۇسىرىلەتىن فيلمدەردىڭ يدەولوگيالىق، تىلدىك، ۇلتتىق ۇستانىمىن رەتتەۋ تەتىگىن قاراستىراتىن ارنايى كوركەمدىك-ساراپتامالىق كەڭەس قۇرۋ كەرەك.

- ەكىنشىدەن، مەملەكەتتىك تىلدەگى ۇلتتىق فيلمدەردىڭ ۇلەس سالماعىنا باسىمدىق بەرۋ ماڭىزدى. ۇشىنشىدەن، فيلمدەردە مەملەكەتتىك ءتىلدىڭ نورمالارىن بۇزۋدى قاتاڭ قاداعالاۋ قاجەت، - دەدى جاناربەك ءاشىمجان.

ەسكە سالساق، تۇركيالىق كينوكومپانيا جوشى حان تۋرالى سەريالدى تەك قانا قازاقستاندا تۇسىرەتىن بولدى.

اۆتور

رۋسلان عابباسوۆ