ۇكىمەت قول جەتكىزىلگەن قازاقستان-كورەيا كەلىسىمدەرىن ءىس جۇزىندە جۇزەگە اسىرۋعا دايىن

استانا. KAZINFORM - استانادا كورەيا رەسپۋبليكاسىنىڭ پرەزيدەنتى يۋن سوك يەل مەملەكەتتىك ساپارى اياسىندا قازاقستان پرەمەر-ءمينيسترى ولجاس بەكتەنوۆپەن كەزدەسۋ وتكىزدى، دەپ حابارلايدى ۇكىمەتتىڭ رەسمي سايتى.

Президент Республики Корея Юн Сок Ёль провел встречу с Премьер-Министром Казахстана Олжасом Бектеновым
Фото: Правительство РК

مەملەكەت باسشىسى قاسىم-جومارت توقايەۆ پەن كورەيا پرەزيدەنتى يۋن سوك يەلدىڭ كەلىسسوزدەرى بارىسىندا قول جەتكىزىلگەن ۋاعدالاستىقتاردى ودان ءارى ىسكە اسىرۋ ماسەلەلەرى تالقىلاندى. ساۋدا-ەكونوميكالىق ىنتىماقتاستىقتى كەڭەيتۋگە، ونەركاسىپ، ەنەرگەتيكا، اۆياتسيا جانە باسقا دا سالالارداعى ءوزارا ءىس-قيمىلدى كۇشەيتۋگە نازار اۋدارىلدى.

«قازاقستان ساۋدا-ەكونوميكالىق ارىپتەستىكتى دامىتۋدا ۇلكەن پەرسپەكتيۆالاردى كورىپ وتىر. ەكىجاقتى ىنتىماقتاستىقتىڭ سەرپىندى دامۋىن قامتاماسىز ەتۋ ءۇشىن ۇكىمەت جوعارى دەڭگەيدە قول جەتكىزىلگەن بارلىق ۋاعدالاستىقتاردى جۇزەگە اسىرۋعا بىردەن كىرىسۋگە دايىن»، - دەپ اتاپ ءوتتى ولجاس بەكتەنوۆ.

قازاقستان ەنەرگەتيكا، سيرەك كەزدەسەتىن جەر مەتالدارىن يگەرۋ جانە قايتا وڭدەۋ، ينفراقۇرىلىم، اۆتوموبيلدەر مەن ولاردىڭ كومپونەنتتەرىن ءوندىرۋ، سۋ رەسۋرستارىن ءتيىمدى پايدالانۋ، قارجى جانە باسقا دا پەرسپەكتيۆالى سالالاردا بىرلەسكەن جوبالاردى ىسكە اسىرۋعا مۇددەلى.

وڭدەۋ سەكتورىن دامىتۋ - مەملەكەت باسشىسىنىڭ ەكونوميكانى ءارتاراپتاندىرۋ جونىندەگى تاپسىرماسىن ورىنداۋ ماقساتىنداعى قازاقستان ۇكىمەتى جۇمىسىنىڭ باسىم باعىتتارىنىڭ ءبىرى. بۇگىنگى تاڭدا كورەي كومپانيالارى قازاقستاندىق ماشينا جاساۋدى دامىتۋعا زور ينۆەستيتسيا سالىپ وتىر.

ەلىمىزدە اۆتوموبيل كلاستەرلەرى قۇرىلۋدا، قۇرامداس بولشەكتەر ءوندىرىسىن رەتكە كەلتىرۋ جوسپارلانۋدا. مىسالى، الماتىدا Hyundai ماركالى اۆتوموبيلدەردى شاعىن توراپتىق قۇراستىرۋ، قوستاناي وبلىسىندا KIA برەندى اۆتوموبيلدەرىنىڭ ءوندىرىسى، سەمەي قالاسىندا Daewoo Bus Global اۆتوبۋستارىنىڭ بىرلەسكەن ءوندىرىسى جولعا قويىلعان. جاقىن ارادا كورەيالىق كومپانيالار قازاقستاندا اۆتوموبيلدەرگە ارنالعان ورىندىقتار مەن مۋلتيمەديا شىعارا باستايدى.

تاياۋدا قول قويىلعان كەلىسىمدەردى ەسكەرە وتىرىپ، كورەيالىق كومپانيالاردىڭ قاتىسۋىن ودان ءارى كەڭەيتۋ جانە ءىرى كورپوراتسيالاردىڭ ءوندىرىسىن لوكاليزاتسيالاۋ ءۇشىن جاڭا پەرسپەكتيۆالار اشىلۋدا.

قازاقستاننىڭ وڭتۇستىك كورەيا تەحنولوگيالارىن قولدانا وتىرىپ، ەلەكتروكارلارعا ارنالعان اككۋمۋلياتورلاردى وندىرۋگە قىزىعۋشىلىعى بار. ولجاس بەكتەنوۆ اۆتوموبيل ونەركاسىبىندەگى ىنتىماقتاستىقتى ودان ءارى نىعايتۋعا جانە كورەيالىق تاراپ ەلىمىزدىڭ اۆتوموبيل ونەركاسىبى ءۇشىن قازاقستاندىق كادرلار دايارلاۋ ىسىنە كومەكتەسۋگە مۇددەلى ەكەنىن اتاپ ءوتتى.

سونىمەن قاتار قازاقستان مەن كورەيا باسىم سالالاردا تەحنولوگيالارمەن الماسۋدى جانە جوبالاردى بىرلەسىپ ىسكە اسىرۋدى جانداندىرۋدا. قالدىقتاردى سۇرىپتاۋ، قايتا وڭدەۋ جانە جويۋ سالاسىندا قوقىس وڭدەۋ زاۋىتىن سالۋ جوباسى پەرسپەكتيۆالى بولىپ وتىر.

مەتاللۋرگيا سالاسىندا فەرروقورىتپالار ءوندىرىسىن جولعا قويۋ كەرەك. گەولوگيا سالاسىندا سيرەك كەزدەسەتىن جەر مەتالدارىن بىرلەسىپ ءوندىرۋ جانە قايتا وڭدەۋ قاجەت، سونداي-اق كەيىننەن ءوزارا ءتيىمدى شارتتاردا كورەياعا جەتكىزىلەتىن جوعارى وڭدەلگەن ونىمدەردى قازاقستاندا شىعارۋ سالاسىندا ىنتىماقتاستىق ورناتۋ كوزدەلگەن.

سۋتەگى ەنەرگەتيكاسى دا ىنتىماقتاستىقتىڭ پەرسپەكتيۆالى باعىتتارىنىڭ بىرىنە اينالۋى مۇمكىن. ءوز كەزەگىندە، ليفت جابدىقتارىن ءوندىرۋدى لوكاليزاتسيالاۋ قۇرىلىس نىساندارىنىڭ قاۋىپسىزدىگىن ارتتىرادى. اۆياتسيادا مادەني- گۋمانيتارلىق بايلانىستار مەن ىسكەرلىك بايلانىستاردى نىعايتۋ ماقساتىندا جاڭا جولاۋشىلار اۋە باعىتتارىن اشۋ ماسەلەسى پىسىقتالادى. بۇل وتكەن جىلى قازاقستانعا كەلگەن كورەيلىك تۋريستەر سانىنىڭ ەكى ەسە ارتۋىنا بايلانىستى قاجەت بولىپ وتىر.

انىقتاما: قازاقستاندا كورەيا رەسپۋبليكاسىمەن ىنتىماقتاستىق جونىندەگى ارنايى قۇرىلعان جۇمىس توبى قىزمەت ىستەيدى. الماتى وبلىسىندا Lotte جاڭا كونديتەرلىك فابريكاسىنىڭ قۇرىلىسى، قاراعاندى وبلىسىندا Samsung تۇرمىستىق تەحنيكاسىنىڭ ءوندىرىسى، الماتى قالاسىندا Hi Air Korea مۇناي-گاز جابدىعى ءوندىرىسى جانە باسقالارى سەكىلدى ءبىرقاتار كەلەشەگى بار جوبالار پىسىقتالىپ جاتىر.

سوڭعى جاڭالىقتار