ۇكىمەت ەكونوميكانىڭ وسىمىنە سالىنعان ينۆەستيتسيا كولەمىن 9,6 تريلليون تەڭگەگە باعالايدى
استانا. KAZINFORM - پرەمەر-ءمينيستردىڭ ورىنباسارى -ۇلتتىق ەكونوميكا ءمينيسترى نۇرلان بايبازاروۆ ەكونوميكاداعى ءوسىمدى قامتاماسىز ەتۋ ءۇشىن 9,6 تريلليون تەڭگە ينۆەستيتسيالاۋ جوسپارلانىپ وتىرعانىن ايتتى. بۇل تۋرالى ۇكىمەتتىڭ باسپا ءسوز قىزمەتى حابارلادى.
بۇل سوماعا بيۋدجەتتە قاراستىرىلعان بيۋدجەتتىك ينۆەستيتسيالار جانە بيۋدجەتتەن تىس ينۆەستيتسيا كوزدەرى كىرەدى.
«نەگىزگى بولىگىن 7 تريلليون تەڭگە كولەمىندەگى بيۋدجەتتەن تىس ينۆەستيتسيا كوزدەرى الادى. بىرىنشىدەن، بۇل ءبىزدىڭ ۇلتتىق حولدينگتەرىمىزدىڭ قاراجاتى. «سامۇرىق-قازىنا» مەن «بايتەرەكتىڭ» بارلىق ەركىن وتىمدىلىگى وسى ءوسۋ باعدارلاماسىنا باعىتتالعان. ەكىنشى كوزى - ىشكى جانە سىرتقى كاپيتال نارىعى. ءبىز قازىر ىشكى رەسۋرستاردى بەلسەندى تۇردە تارتىپ جاتىرمىز. بۇل ەكىنشى دەڭگەيدەگى بانكتەر مەن باسقا دا ينستيتۋتسيونالدىق ىشكى ينۆەستورلاردىڭ قاراجاتى»، - دەپ اتاپ ءوتتى نۇرلان بايبازاروۆ.
حالىقارالىق قارجى ۇيىمدارىمەن دە ماڭىزدى جۇمىس جۇرگىزىلىپ جاتىر. جوبالارعا ۇزاق جەڭىلدىكتى قارجىلاندىرۋ كوزدەرى تارتىلىپ جاتىر. سونداي- اق وتاندىق جانە شەتەلدىك ينۆەستورلاردىڭ جەكە ينۆەستيتسيالارى ماڭىزدى ءرول اتقارادى.
اۆتور
ەلميرا ورالبايەۆا
