ۇكىمەت بۋرابايدى دامىتۋ جوسپارىن بەكىتتى

استانا. قازاقپارات - بۋرابايعا كەلۋشىلەر سانى 35 مىڭنان 94 مىڭعا دەيىن ۇلعايىپ، جەكە ينۆەستيتسيا كولەمى 22,7 ميلليارد تەڭگەگە جەتەدى. ايماقتاعى ساياحات سالاسىندا 32,5 مىڭ ادام جۇمىسپەن قامتىلادى.

 ۇكىمەت شۋچە-بۋراباي كۋرورتتىق ايماعىن دامىتۋ جوسپارىن بەكىتتى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى. جوسپار بويىنشا، دەمالىس ورىندارى جاڭعىرتىلادى، جىل بويى جۇمىس ىستەيتىن تۋريستىك نىساندار سالىنادى. ەكولوگيالىق جانە سپورتتىق تۋريزمدى دامىتۋعا ءمان بەرىلەدى.

اتاپ ايتقاندا، قاتاركول كولىنىڭ جانىندا بالالار ورتالىقتارىن، سپورتتىق-ساۋىقتىرۋ كەشەندەرىن جانە جىل بويى اكۆاپارك ۇيىمداستىرۋ قاراستىرىلىپ وتىر. جۇكەي كولىنىڭ ماڭىندا كەمپينگتەر، گلەمپينگتەر جانە جاڭا تۋريستىك باعىتتار اشىلادى، ال كىشى شاباقتى كولىندە جالعا بەرۋ ستانسالارى، قايىق تۇراعى، جاعالاۋ ينفراقۇرىلىمى مەن جاعاجايلار بولادى. بۇل باعىتقا 137,2 ميلليارد تەڭگە جۇمسالادى.