كەيبىر ەل ۆەنەسۋەلاداعى پرەزيدەنت سايلاۋىنىڭ ناتيجەسىن مويىنداماي جاتىر
استانا. قازاقپارات - ۆەنەسۋەلادا 3 كۇننەن بەرى مازا جوق. رەسمي مالىمەت بويىنشا 51 داۋىس جينادى دەگەن قازىرگى مەملەكەت باسشىسى نيكولاس مادۋرونىڭ قۋانىشى ۇزاققا بارمادى. سايلاۋ ناتيجەسى بۇرمالاندى دەگەن وپپوزيتسيا باس كوتەردى. ولار جەڭىستى وزىنە تەلىپ وتىر.
ماريا كورينا ماچادو، وپپوزيتسيا جەتەكشىسى:
«بارلىق ۆەنەسۋەلا ازاماتتارىنا جانە بۇكىل الەمگە «ءبىزدىڭ قولىمىزدا سايلاۋ تۋرالى شىندىققا ناقتى دالەلدەر بارىن ايتقىم كەلەدى. ءبىز داۋىستىڭ 73,2 پايىزىنا يە بولدىق. وسىلايشا وپپوزيتسيا اتىنان تۇسكەن ۇمىتكەر ەدمۋندو گونسالەس پرەزيدەنت بولىپ سايلاندى. ءبىز جەڭىسكە جەتتىك».
بەيبىت شەرۋ سوڭى قاقتىعىسقا ۇلاسقان. اقپارات قۇرالدارى تارتىپسىزدەر سالدارىنان 6 ەرەۋىلشى كوز جۇمعانىن مالىمدەدى. ال ەلدىڭ باس پروكۋراتۋراسى 48 پوليتسيا مەن سارباز جارالانعانىن جانە 749 بەلسەندىنىڭ قاماۋعا الىنعانىن جاريالادى. ءبىراق وپپوزيتسيا بەرىلەر ەمەس. رەيتەر اگەنتىگى نارازى توپ ءارتۇرلى قالادا بۇرىنعى پرەزيدەنت ۋگو چاۆەستىڭ 5 ەسكەرتكىشىن قۇلاتىپ تاستادى دەگەن حابار تاراتتى.
ن. مادۋرو: قامالعانداردىڭ كوبى قىلمىسكەرلەر مەن ناشاقورلار
ۆەنەسۋەلا پارلامەنتى ەلدى بۇلىك شىعارعان وپپوزيتسيا باسشىلارىن فاشيستەر دەپ اتاپ، ولاردى قاماۋعا الۋدى تالاپ ەتتى. پرەزيدەنت نيكولاس مادۋرو قاماۋعا الىنعانداردىڭ كوبى - قىلمىسكەرلەر مەن ناشاقورلار، ولارعا ارانداتۋشى سىرتقى كۇشتەر شەرۋگە شىققانى ءۇشىن 150 دوللاردان اقشا بەرىپ وتىر دەپ ايىپتادى.
نيكولاس مادۋرو، ۆەنەسۋەلا پرەزيدەنتى:
«ۆەنەسۋەلادا قازىر بولىپ جاتقان بارلىق وقيعا ءۇشىن تاريح، كونستيتۋتسيا جانە ەلدىڭ الدىندا ەدمۋندو گونسالەس مىرزا جاۋاپتى.»
ساراپشىلار: ن. مادۋرو بيلىگى كەزىندە ەلدەن كەتۋشىلەر كوبەيدى
مادۋرو ۆەنەسۋەلانى 11 جىلدان بەرى باسقارىپ كەلەدى. ساراپشىلاردىڭ ايتۋىنشا، وسى ارالىقتا ەلدەن باس ساۋعالاپ قاشقاندار سانى كوبەيگەن. بىرىككەن ۇلتتار ۇيىمى 7 ميلليون 700 مىڭ ۆەنەسۋەلا ازاماتىنىڭ شەتەل اۋعانىن ايتادى. بۇل 34 ميلليون حالىقتىڭ 22 پايىزى. سالىستىرۋ ءۇشىن مىسال كەلتىرەيىك. سيرياداعى سوعىستان 5 ميلليون، ال ۋكرايناداعى قىرعىننان 6 جارىم ميلليون تۇرعىن شەكارا اسقان.
ۆەنەسۋەلالىقتاردىڭ ەلدەن كەتۋىنە نەگىزىنەن اۋىر ەكونوميكالىق داعدارىس، گيپەرينفلياتسيا سەبەپ. ۆەنەسۋەلاداعى پرەزيدەنت سايلاۋىنىڭ ناتيجەسىنە بايلانىستى الەمدە 2 لاگەر پايدا بولدى. لاتىن امەريكانىڭ 9 ەلى - ارگەنتينا، گۆاتەمالا، دومينيكان، كوستا- ريكا، پاناما، پاراگۆاي، پەرۋ، ۋرۋگۆاي مەن ەكۆادور سايلاۋ ناتيجەسىنە كۇمان كەلتىرگەن. مادۋرو وسى مەملەكەتتەردەگى ەلشىلەرىن بىردەن كەرى شاقىرىپ الدى. ال يران، رەسەي، كۋبا مەن قىتاي مادۋرونى جەڭىسىمەن قۇتتىقتادى.
لين جيان، ق ح ر سىرتقى ىستەر مينيسترلىگىنىڭ رەسمي وكىلى:
«قىتاي ۆەنەسۋەلانى پرەزيدەنت سايلاۋىن تابىستى وتكىزۋىمەن جانە پرەزيدەنت مادۋرونى قايتا سايلانۋىمەن قۇتتىقتايدى. قىتاي مەن ۆەنەسۋەلا - جاقسى دوستار جانە ءبىرىن-ءبىرىن قولداۋشى سەرىكتەستەر. بيىل ەكى ەلدىڭ اراسىنداعى ديپلوماتيالىق قارىم- قاتىناستىڭ ورناعانىنا 50 جىل تولادى. ءبىز ەكىجاقتى ىنتىماقتاستىقتى ءارى قاراي دا دامىتۋعا دايىنبىز. »
ا ق ش- تا دا پرەزيدەنت سايلاۋىنا دايىندىق ناۋقانى وتە قىزۋ ءجۇرىپ جاتىر. ساياسي دودادان ءوز ەركىمەن باس تارتقان دجو بايدەن ءالى دە ات ۇستىندە. ول ۆەنەسۋەلاداعى جاعداي بويىنشا برازيليا پرەزيدەنتى لۋلا دا سيلۆامەن تەلەفون ارقىلى سويلەسىپ، ىقپالدى 2 ەلدىڭ باسشىلارى ۆەنەسۋەلاداعى جاعدايدى باقىلاۋ ۇستاۋعا ۋاعدالاستى.
24.kz
