كيم چەن ىن سولتۇستىك كورەيا اسكەرىن سوعىسقا تولىق دايىن بولۋعا شاقىردى
استانا. KAZINFORM - سولتۇستىك كورەيا باسشىسى كيم چەن ىن ارميا بولىمشەلەرىن سوعىسقا تولىق ءازىر ەتۋ ءۇشىن جاۋىنگەرلىك دايىندىقتى اياقتاۋعا شاقىردى. ول اسكەري دايارلىقتى تۇبەگەيلى جەتىلدىرۋ قاجەتتىگىن اتاپ ءوتتى، دەپ حابارلايدى ك ح د ر ورتالىق تەلەگراف اگەنتتىگى.
كيم چەن ىن بۇل تۋرالى كورەيا حالىق ارمياسى روتالارى كومانديرلەرىنىڭ ءۇشىنشى سەزى اياسىندا ۇيىمداستىرىلعان ءىس-شارادا ايتتى.
ك ح د ر باسشىسىنىڭ سوزىنشە، روتا كومانديرلەرىنىڭ باستى مىندەتى - ءوز بولىمشەلەرىنىڭ سوعىسقا تولىق دايىن بولۋىن قامتاماسىز ەتۋ ءۇشىن جاۋىنگەرلىك ازىرلىك جۇمىستارىن اياقتاۋ. ونىڭ ايتۋىنشا، بۇعان وقۋ-جاتتىعۋلار مەن جاۋىنگەرلىك دايىندىقتى تۇبەگەيلى جاقسارتۋ ارقىلى قول جەتكىزۋگە بولادى.
كيم چەن ىن روتا كومانديرلەرى ەلدىڭ قارۋلى كۇشتەرىنىڭ نەگىزىن نىعايتۋدى جالعاستىراتىنىن ايتتى. سونداي-اق ولاردىڭ ارقاسىندا ارميانىڭ بولاشاعى زور ەكەنىن اتاپ ءوتتى.
ەكى كورەيا شەكاراسىنداعى شيەلەنىس كۇشەيدى
سوڭعى ۋاقىتتا سولتۇستىك جانە وڭتۇستىك كورەيا اراسىنداعى جاعداي 21-قىركۇيەكتە دەميليتاريزاتسيالانعان ايماقتا بولعان وقيعادان كەيىن قايتا شيەلەنىستى. سول كۇنى جاياۋ اسكەرگە قارسى مينا جارىلىپ، وڭتۇستىك كورەيانىڭ ءۇش اسكەري قىزمەتشىسى جاراقات الدى. سەۋل بۇل وقيعاعا پحەنياندى ايىپتادى.
سولتۇستىك كورەيا جارىلىسقا جاۋاپتى ەكەنىن جوققا شىعارىپ، ءوز اسكەري قىزمەتشىلەرىنە وق اتىلعان جاعدايدا «دەرەۋ ءارى اياۋسىز» جاۋاپ بەرەتىنىن مالىمدەدى.
ك ح د ر باسشىسىنىڭ اپكەسى، كورەيانىڭ ەڭبەك پارتياسى جالپى ىستەر دەپارتامەنتىنىڭ جەتەكشىسى كيم يە چجون 19 -قازانداعى مالىمدەمەسىندە وڭتۇستىك شەكارادا «وڭتۇستىك كورەيالىق اسكەري بۇزاقىلاردىڭ» ارەكەتتەرىنە بايلانىستى «ەلەۋلى» تۇراقسىزدىق قالىپتاسقانىن ايتتى. ول سونداي-اق سەۋل ۇكىمەتىن ارانداتۋشىلىق جاسادى دەپ ايىپتادى.
كيم يە چجوننىڭ ايتۋىنشا، پحەنيان وڭتۇستىك شەكاراعا ورنالاستىرىلعان تاكتيكالىق سوققى قۇرالدارىنىڭ سانىن ارتتىرۋ مۇمكىندىگىن قاراستىرىپ جاتىر. بۇعان قوسا، بىلتىر توقتاتىلعان ۇگىت-ناسيحات حابارلارىن داۋىس زورايتقىشتار ارقىلى قايتا تاراتۋ ماسەلەسى دە قاراستىرىلۋدا.
ءوز كەزەگىندە وڭتۇستىك كورەيا بىرىككەن شتابتار باستىقتارى كوميتەتىنىڭ باسشىسى چين يەن سون الدىڭعى شەپتەگى اسكەري بولىمشەگە بارعان كەزدە اسكەري قىزمەتشىلەرگە سولتۇستىك كورەيا تاراپىنان جاڭا ارانداتۋشىلىقتار بولعان جاعدايدا باتىل تويتارىس بەرۋدى تاپسىردى.
ەسكە سالا كەتسەك، بۇعان دەيىن سولتۇستىك كورەيا سۋ استىنان ۇشىرىلاتىن ەكى جاڭا زىمىرانىن سىناقتان وتكىزگەنىن حابارلادىق.
بۇدان بولەك، جۋىردا سولتۇستىك كورەيا جاساندى ينتەللەكتىسى بار تورپەدانى سىناقتان ءساتتى وتكىزگەنىن مالىمدەدى.
