ەكى ادامدى ولتىرگەن كوكشەتاۋلىق ءومىر بويىنا باس بوستاندىعىنان ايىرىلدى
كوكشەتاۋ. KAZINFORM - ەكى ادامدى پىشاقتاپ ولتىرگەن كوكشەتاۋ قالاسىنىڭ تۇرعىنى ءومىر بويىنا باس بوستاندىعىنان ايىرىلدى.
اقمولا وبلىسى پ د باسپا ءسوز قىزمەتىنىڭ مالىمەتىنشە، جانتۇرشىگەرلىك قىلمىس 2023-جىلى كوكشەتاۋ قالاسىندا بولعان. قىلمىستىق ءىس ماتەريالدارىندا كورسەتىلگەندەي، سوتتالۋشى مەن ەگدە جاستاعى ەر ادام جانە ايەل ۇشەۋى قوسىلىپ اراق ىشەدى. كەيىن ەكى ەر ادامنىڭ اراسىندا جانجال تۋىنداپ، سوڭى توبەلەسكە ۇلاسادى. ول كەزدە ايەل كورشى بولمەدە ۇيىقتاپ جاتادى. توبەلەس بارىسىندا سوتتالۋشى قارسىلاسىنا بىرنەشە رەت پىشاق سۇعىپ الادى. ول العان پىشاق جاراقاتىنان سول جەردە كوز جۇمادى. وسى كەزدە، قاتتى داۋىستان ايەل ويانادى. ونىڭ ايعايىن كورشىلەرى ەستىپ قالادى دەگەن قاۋىپپەن ەر ادام ونى دا پىشاقتاپ ولتىرەدى.
وسىلايشا، ءاپ-ساتتە ەكى ادامنىڭ ءومىرىن قيعان ول پاتەردەن شىعىپ، جاقىن ماڭداعى ءۇيدىڭ اۋلاسىنا پىشاقتى لاقتىرىپ كەتەدى. ارتىنشا، تەرگەۋ ورگاندارىنان قۇتىلا المايتىنىن تۇسىنگەن ول پوليتسياعا قوڭىراۋ شالىپ، بولعان وقيعانى ايتادى.
تەرگەۋ بارىسىندا ءبىرقاتار قاجەتتى تەرگەۋ ارەكەتتەرى، ساراپتامالار جۇرگىزىلدى، وقيعا ورنىندا كۇدىكتىنىڭ ايعاقتارى تەكسەرىلدى.
«اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ۇكىمىمەن سوتتالۋشى ەكى ادامدى ولتىرگەنى ءۇشىن كىنالى دەپ تانىلىپ، ءومىر بويىنا باس بوستاندىعىنان ايىرۋ تۇرىندەگى جازا تاعايىندالدى. ول جازاسىن توتەنشە قاۋىپسىزدىك قىلمىستىق-اتقارۋ جۇيەسى مەكەمەسىندە وتەيتىن بولادى. سوت جازانى تاعايىنداۋ كەزىندە سوتتالۋشىنىڭ ماس كۇيىندە اۋىر قىلمىس جاساعانىن ەسكەردى. سونىمەن بىرگە، ول 2008-جىلى كىسى ءولتىرىپ، 9 جىلعا باس بوستاندىعىنان ايىرىلعان»، - دەدى ۆەدومستۆودان.
ايتا كەتسەك، بۇدان بۇرىن ادام ولتىرگەن قىلمىسكەر 25 جىلدان كەيىن ۇستالعانىن جازعان ەدىك.
اۆتور
اسلان وسپانوۆ
