كورەيلىك ينۆەستورلار قازاقستاندا قايتالاما قايتا وڭدەۋ سالاسىن دامىتپاق
استانا. KAZINFORM - قازاقستاندىق «ونەركاسىپتى دامىتۋ قورى» وڭتۇستىك كورەيالىق ينۆەستورلارمەن قايتالاما شيكىزاتتى قايتا وڭدەۋ سالاسىندا ىنتىماقتاستىق كەلىسىمگە كەلدى.
«بۇگىنگى كونفەرەنسيا وتاندىق قايتا وڭدەۋ كاسىپكەرلەرىمەن ءوزارا ءىس-قيمىلدى كۇشەيتۋ ماقساتىندا وتكىزىلدى. ونىڭ بارىسىندا تۇيىق سيكل ەكونوميكاسىنىڭ اسپەكتىلەرى، قايتالاما شيكىزاتتى قايتا وڭدەۋ سالاسىنداعى سالىق مولشەرلەمەلەرى تۋرالى زاڭناما، شاعىن جانە ورتا بيزنەستى قارجىلاندىرۋ جانە سۋبسيديالاۋ ماسەلەلەرى تالقىلاندى»، - دەدى قازاقستاننىڭ قايتالاما شيكىزاتتى قايتا وڭدەۋشىلەر قاۋىمداستىعىنىڭ ءتوراعاسى باتىربەك اۋباكىروۆ.
كونفەرەنسيا بارىسىندا وڭتۇستىك كورەيادان كەلگەن ينۆەستورلارمەن B2B كەزدەسۋلەر ءوتتى، ونىڭ قورىتىندىسى بويىنشا «ونەركاسىپتى دامىتۋ قورى» ا ق- مەن ىنتىماقتاستىق تۋرالى مەموراندۋمعا قول قويىلدى.
«وڭتۇستىك كورەيانىڭ قايتالاما قايتا وڭدەۋ سالاسىن دامىتۋدا حالىقارالىق تاجىريبەسى مول. بۇگىنگى جيىندا كورەيلىك ينۆەستورلارمەن شيكىزات جانە لوگيستيكا پروبلەمالارى، قايتالاما شيكىزاتتى قايتا وڭدەۋ جانە قالدىقتاردى جيناۋ سالاسىن ودان ءارى دامىتۋ مەن قولداۋ ماسەلەلەرىن ءسوز ەتىپ، كەلىسىمگە كەلدىك»، - دەيدى قاۋىمداستىق ءتوراعاسى.
ايتا كەتسەك، ەلىمىزدە 100 مىڭ توننا پلاستيكتىڭ تەك 3,5 مىڭ تونناسى عانا قايتا وڭدەلەدى.
استانادا «قازاقستاندا قايتالاما شيكىزاتتى قايتا وڭدەۋ: دامۋ پروبلەمالارى مەن پەرسپەكتيۆالارى» تاقىرىبىندا گيبريدتى فورماتتاعى حالىقارالىق كونفەرەنتسيا ءوتتى.
اۆتور
داۋلەت ىزتىلەۋ
