كورەيلەر «ءيت اشۋى-جان اشۋى» دەپ اشىنىپ جاتىر

وڭتۇستىك كورەيا بيلىگى ءيتتىڭ ەتىن جەۋگە تىيىم سالعالى جاتىر. بۇل باستامانى اۋەلدە وپپوزيتسيا كوتەرىپ، كەيىن ونى بيلىك باسىنداعى «حالىق كۇشى» پارتياسى قولداعان. ولار «ءيت ەتىن جەۋ وڭتۇستىك كورەيانىڭ حالىقارالىق ارەناداعى يميدجىنە نۇقسان» دەيدى.

ءيتتىڭ ەتىن «ءيتتىڭ ەتىنەن جەك كورەتىندەر» كوبەيگەن

بيلىك باستاما كوتەرسە دە، زاڭ جوباسىن قابىلداتۋ وڭايعا سوقپاي جاتىر. ويتكەنى ءيتتىڭ ەتىن ساتۋ- بۇل ەلدە وتە ۇلكەن بيزنەس. ونى كاسىپ قىلعاندار قاتتى اشىنىپ، ءتىپتى ەل استاناسى سەۋلدىڭ كوشەلەرىنە 3 ميلليون سالپاڭقۇلاقتى قويا بەرەمىز دەپ سەس كورسەتتى. بيلىك زاڭ جوباسى جىل اياعىنا دەيىن قابىلدانۋعا ءتيىس دەيدى.

ءيت ەتىن جەۋگە جانە ساتۋعا بىردەن تىيىم سالىنبايدى. كاسىپكەرلەر بۇل ساۋدادان 2027-جىلعا دەيىن بىرتىندەپ باس تارتۋى كەرەك. ءتىپتى بيزنەسمەندەرگە 20 ميلليون ۆون وتەماقى تولەۋى دە ىقتيمال. بۇل ءبىزدىڭ ۆاليۋتاعا شاققاندا 7 ميلليون تەڭگە.

ان بيۋن-گيل، «حالىق كۇشى» پارتياسىنىڭ زاڭگەرى:

- بۇل زاڭ ءيتتى ءۇي جانۋارى رەتىندە وسىرۋگە، سويۋعا، تاراتۋعا جانە جەۋگە تىيىم سالۋدى كوزدەيدى. يت ەتىن ساتۋمەن اينالىسىپ كەلگەن بيزنەسمەندەرگە 2024-جىلدان باستاپ 3 جىل مەرزىمدە كاسىبىن تولىق وزگەرتۋگە مۇمكىندىك بەرىلەدى.

قازاق «مال اشۋى- جان اشۋى» دەسە، كورەيلەر «ءيت اشۋى- جان اشۋى» دەپ اشىنادى. ءيتتىڭ ەتىن ساتىپ، قىرۋار پايدا تاۋىپ وتىرعاندار جاعا جىرتىسۋعا دايىن. اتىشۋلى زاڭ جوباسى قوعام تالقىسىنا ۇسىنىلعان ساتتەن باستاپ قىپ-قىزىل توبەلەستىڭ بولارى ايقىن ەدى. ويتكەنى ءيت ساتۋ بيزنەسى تۇرالاسا، ءتورت اياقتىنى باعىپ- قاعاتىن 3500 شارۋا قوجالىعى، 34 سويىس ورنى، 219 جەتكىزۋ كومپانياسى مەن 3 مىڭ مەيرامحانا شىعىنعا باتقالى تۇر. ستاتيستيكا بويىنشا، وڭتۇستىك كورەيادا جىل سايىن 2 ميلليون سالپاڭقۇلاق سويىلىپ، 100 مىڭ توننا ەت جەلىنەدى.

نام سۋن- گۋ، ءيت ەتى مەيرامحاناسىنىڭ يەسى:

- ءيت ەتىن ساتۋمەن اينالىسقانىما باقانداي 30 جىل بولدى. بۇل اقشا تاباتىن جاي عانا بيزنەس ەمەس، بۇل -ءبىزدىڭ اتا كاسىبىمىز. ەندى اياق استىنان 3 جىل ىشىندە ودان بىرتىندەپ بولسىن باس تارتىڭدار دەپ جاتىر. بۇل اقىلعا قونىمسىز نارسە. ەشكىم دە ويناپ جۇرگەن جوق.

ءبىراق Gallup ينستيتۋتى جۇرگىزگەن ساۋالناماعا قاراساق، وڭتۇستىك كورەيالىقتاردىڭ 60 پايىزى ءيتتىڭ ەتىن جەۋگە قارسى ەكەنىن اشىق بىلدىرگەن. اسىرەسە جاسى 45 كە دەيىنگى تۇرعىندار ءتورت اياقتىنىڭ ەتىن مۇلدە جەمەيتىن بولعان.

بريتانيا بۋلليمەن «سوعىسادى»

بريتانيادا امەريكالىق بۋللي دەگەن ازۋى كەرە قارىس يتتەرگە قارسى «سوعىس» جاريالاندى. 31-جەلتوقساننان باستاپ تۇمسىعىنا تۇمىلدىرىق سالىنباعان بۋلليمەن كوشەدە جۇرۋگە بولمايدى. ال كەلەر جىلدىڭ اقپانىنان باستاپ ولاردى اسىراۋعا ءبىرجولا تىيىم سالىنادى. رۇقسات الۋ ءۇشىن بۋلليدى رەسمي تىركەتىپ، چيپتەۋ قاجەت.

كريستين ميددلميس، باس مال دارىگەرى:

- امەريكالىق بۋللي - تابيعاتىنان قاباعان ءيت. سوندىقتان ولاردى قاتاڭ باقىلاۋعا الىپ، تالاپقا ساي ۇستاۋ قاجەت. بۇل شارتتار ورىندالماسا، قاباعان ءيتتى ەۆتانازيامەن ولتىرگەننەن باسقا جول جوق. ءبىز حالىقتى قورعاۋىمىز كەرەك. ونسىز دا بۋلليگە تالانعان ادامدار جەتىپ-ارتىلادى.

ال يسپانيانىڭ بارسەلونا قالاسىندا قارعىباۋى جوق يتپەن كوشەدە جۇرگەندەر جازالانادى. ايىپپۇل كولەمى 2400 ەۋروعا دەيىن جەتۋى مۇمكىن. بۇل زاڭ نەگىزى 9 جىل بۇرىن ماقۇلدانعان ەدى. ءبىراق ودان كەيىن بىردەن موراتوري جاريالانىپ، ونىڭ كۇشى ەندى عانا جويىلدى.

بالاسىنان ءيتى كوپ يسپانيا

يسپانيادا بالاعا قاراعاندا يت كوپ. ەلدە جاسى 13-كە تولماعان 5 ميلليون 400 مىڭ جەتكىنشەك بولسا، سالپاڭقۇلاقتاردىڭ سانى 9 ميلليون 300 مىڭنان اسادى. بۇل يسپانيانىڭ ءۇي جانۋارلارىنا ازىق وندىرۋشىلەر قاۋىمداستىعىنىڭ مالىمەتى. مۇنىڭ سەبەبى - ەكونوميكالىق داعدارىس جايلاعان ەلدە بالادان گورى ءيت اسىراۋ ءتيىمدى ۇردىسكە اينالعان.

ادام قىمبات پا، حايۋان قىمبات پا؟

كورشىلەس رەسەيدەگى التاي رەسپۋبليكاسىنىڭ بيلىگى دە يەسىز يتتەردى ەۆتانازيامەن ولتىرۋگە رۇقسات بەردى. ءبىراق بۇعان جانۋارلار قۇقىعىن قورعايتىن بەلسەندىلەر قارسى. ءتىپتى ولار پەتيتسيا جاريالاعان. ونلاين شاعىمعا وسى ساتكە دەيىن 141 مىڭنان استام ادام قول قويىپتى. جالپى رەسەيدە جىلىنا ادامدى ءيت قاۋىپ العان 300 مىڭ وقيعا تىركەلەدى ەكەن. ونىڭ 35-ءسى ومىرىمەن قوش ايتىسادى. وسىعان قاراپ ادامنىڭ ءومىرى قىمبات پا الدە حايۋان قۇندى ما دەگەن وي تۋادى.

ەرنات مەلس ۇلى، «24.KZ»

www.24.kz