كورەيا پرەزيدەنتى تەرگەۋشىلەردىڭ سۇراعىنا جاۋاپ بەرمەدى

استانا. قازاقپارات - وڭتۇستىك كورەيادا كەشە قاماۋعا الىنعان ەل پرەزيدەنتى يۋن سوك يەلدىڭ تەرگەۋى جالعاسىپ جاتىر. ەسكە سالايىق، وعان بۇلىككە شاقىرۋ جانە وكىلەتتىگىن اسىرا پايدالانۋ ايىپتارى تاعىلعان.

سەبەبى بىلتىر 3-جەلتوقساندا يۋن ەلدە اسكەري جاعداي جاريالاعان بولاتىن. الايدا بىرنەشە ساعاتتان كەيىن پارلامەنت بۇل شەشىمدى جويدى. 14-جەلتوقساندا دەپۋتاتتار مەملەكەت باسشىسىنا يمپيچمەنت جاريالاپ، سوت ونى قاماۋعا الۋ وردەر بەردى. پرەزيدەنتكە تاعىلعان ايىپتار بويىنشا تەرگەۋ قالاي ءوتىپ جاتىر؟

كەشە تاڭەرتەڭ پرەزيدەنتتى جوعارى لاۋازىمدى شەنەۋنىكتەر اراسىنداعى سىبايلاس جەمقورلىقتى تەرگەۋ باسقارماسىنا جەتكىزگەننەن كەيىن، ونى تۇسكى ۇزىلىسپەن قوسا العاندا، شامامەن 10 ساعات 40 مينۋت بويى تەرگەدى. پروكۋراتۋرا كولەمى شامامەن 200 بەت سۇراقتار دايىنداعان. الايدا يۋن سوك مەل بۇل سۇراقتارعا جاۋاپ بەرمەي: «مەن سۇراقتارعا جاۋاپ بەرۋدەن باس تارتۋ قۇقىعىمدى پايدالانامىن»، - دەپ مالىمدەدى.

ەسكە سالا كەتەيىك، پرەزيدەنتتىك لاۋازىمىنا دەيىن يۋن باس پروكۋرور جانە سەۋلدىڭ ورتالىق اۋدانىنىڭ پروكۋرورى بولىپ قىزمەت اتقارعان. سول كەزدە بۇرىنعى پرەزيدەنتتەرگە 2018 -جىلى پاك كىن حەگە، ال 2020 -جىلى لي ميەن باكقا قاتىستى سىبايلاس جەمقورلىق ايىپتارىن جاريالاعان بولاتىن. سوندىقتان ول ءوزىنىڭ قۇقىقتارىن جاقسى بىلەدى جانە جاۋاپ بەرۋدەن باس تارتۋعا قۇقىعى بار ەكەنىن تۇسىنەدى. ت

تەرگەۋشىلەر يۋن سوك يەلدى بۇگىن دە تەرگەيدى. ءبىراق ول تاعى جاۋاپ بەرۋدەن باس تارتۋى مۇمكىن. تەرگەۋ ساعات 14:00-گە اۋىستىرىلدى. سەبەبى پروكۋراتۋرا يۋننىڭ دەنساۋلىعىنا بايلانىستى ونى كەيىنگە شەگەرۋ تۋرالى ءوتىنىشىن قاناعاتتاندىردى. ونىڭ ادۆوكاتىنىڭ ايتۋىنشا، پرەزيدەنتتىڭ دەنساۋلىعى ناشار، ال كەشە ول ءوزىنىڭ ۇستانىمىن جەتكىلىكتى تۇردە مالىمدەدى. ادۆوكات مەملەكەت باسشىسى قاماۋعا الىناردىڭ الدىندا جازعان حاتتى مەڭزەپ وتىر. ول حاتتا يۋن وپپوزيتسيانى پارلامەنت سايلاۋىنىڭ ناتيجەلەرىن بۇرمالادى دەپ ايىپتادى. سونداي-اق ەلدى توتەنشە جاعدايعا، ياعني اسكەري ۋاقىتقا تەڭەستىرىلگەن جاعدايعا جەتكىزگەن ءىرى وپپوزيتسيالىق پارتيانىڭ ارەكەتتەرىنە بايلانىستى اسكەري جاعداي ەنگىزۋگە شەشىم قابىلداعانىن تاعى دا مالىمدەدى.

سونداي-اق يۋننىڭ قورعاۋشىلارى سوتقا قاماۋعا الۋدىڭ زاڭدىلىعىن تەكسەرۋ تۋرالى ءوتىنىش بەرگەنىن اتاپ وتكەن ءجون. پرەزيدەنتتىڭ ادۆوكاتتارى سەۋلدىڭ باتىس اۋداندىق سوتىنىڭ قاماۋعا الۋ وردەرىن شىعارۋعا بۇل ءىستىڭ ايرىقشا يۋريسديكسياسى جوق ەكەنىن العا تارتتى. بۇگىن وسى ماسەلە بويىنشا سوت پروتسەسى ءوتۋ كەرەك. ەگەر قاماۋعا الۋ زاڭسىز دەپ تانىلسا، يۋن سوك يەل بوستاندىققا شىعۋى مۇمكىن.

سونىمەن قاتار، يۋننىڭ رەزيدەنسياسى ورنالاسقان حاننامدون اۋدانىنداعى ونىڭ جاقتاستارى كۆاچحون قالاسىنا كەلىپ، پرەزيدەنتتى دەرەۋ بوساتۋدى تالاپ ەتىپ ميتينگ وتكىزىپ جاتىر. پوليتسيا جوعارى لاۋازىمدى شەنەۋنىكتەر اراسىنداعى سىبايلاس جەمقورلىقتى تەرگەۋ باسقارماسىنا كىرەبەرىستەردى جاۋىپ تاستادى.

24.kz