كورەيا قازاقستاندىق تالاپكەرلەردى ءبىلىم الۋعا شاقىرادى
استانا. قازاقپارات - وڭتۇستىك كورەيا قازاقستاندىق تالاپكەرلەردى جوعارعى وقۋ ورىندارىندا ءبىلىم الۋعا شاقىرادى. بۇل تۋرالى وڭتۇستىك كورەيا شەتەلدىك ستۋدەنتتەر اكىمشىلەرى قاۋىمداستىعىنىڭ باس ديرەكتورى چون بون گۋ سەۋلدە وتكەن سيمپوزيۋمدا ءمالىم ەتتى.
جيىندا كورەيا رەسپۋبليكاسى مەن ورتالىق ازيا ەلدەرىنىڭ وسى سالاداعى ىنتىماقتاستىعى تالقىلاندى. ماسەلەن، تاڭعى شىق ەلىندە بالا تۋۋدىڭ تومەندەۋىنەن جوعارى وقۋ ورىندارىندا ستۋدەنتتەر سانى ازايعان. جەرگىلىكتى بيلىك وسى سەبەپتى شەتەلدىكتەردى وقۋ ورىندارىنا كوپتەپ قابىلداۋدى كوزدەپ وتىر. قازىر بۇل ەلدە ورتالىق ازيا ەلدەرىنىڭ ىشىندە وزبەك ستۋدەنتتەر كوپ. ولاردىڭ سانى 10 مىڭعا جۋىقتايدى. ال قازاقستاننان 1 مىڭ 255 جاس ءبىلىم الىپ ءجۇر.
اسەل بولەكبايەۆا، ق ر عىلىم جانە جوعارعى ءبىلىم مينيسترلىگىنىڭ ءبولىم باستىعى:
- بىزدە جىل سايىن 500 قازاقستاندىق عالىم الەمنىڭ ۇزدىك عىلىمي ورتالىقتارى مەن ۋنيۆەرسيتەتتەرىنە جىبەرىلەدى. سوندىقتان وڭتۇستىك كورەيانىڭ دا جەتەكشى ينستيتۋتتارى مەن ۋنيۆەرسيتەتتەرى عالىمدارىمىزدىڭ تاعىلىمدامادان ءوتۋىن ۇيىمداستىرۋعا بەلسەندى قاتىسسا دەيمىز. وسى رەتتە قارجىلاندىرۋ تولىعىمەن قازاقستاندىق تاراپتىڭ ەسەبىنەن جۇزەگە اسىرىلاتىنىن ايتا كەتكىمىز كەلەدى.
چون بون گۋ، وڭتۇستىك كورەياداعى شەتەلدىك ستۋدەنتتەر اكىمشىلەرى قاۋىمداستىعىنىڭ باس ديرەكتورى:
- وڭتۇستىك كورەيانىڭ ادىلەت مينيسترلىگى شەتەلدەن كەلگەن ۇزدىك تۇلەكتەرگە كورەيادا تۇرۋ ىحتيارحاتىن بەرەتىن جۇيەنى دايىنداپ جاتىر. وسىعان بايلانىستى قازاقستاندىق ستۋدەنتتەر دە ءبىزدىڭ جوعارعى وقۋ ورىندارىندا ءبىلىم الۋ جاعىن قاراستىرسا دەيمىز. ت م د ەلدەرىنىڭ ستۋدەنتتەرى كورەيادا ەش كەدەرگىسىز وقي الادى. ەڭ باستىسى ۇمىتكەر كارىس نەمەسە اعىلشىن ءتىلىن جوعارى دەڭگەيدە ءبىلۋى قاجەت.
