كورشىم قالايشا باقىتتى؟

استانا. قازاقپارات - ءبىر شاعىن قالادا ەكى كورشى ەرلى-زايپتى بولىپتى. مىنا ءبىر جۇپ ەرلى-زايپتى ۇنەمى رەنجىسپ، وتباسىندا تىنىشتىق ورناماسا، ال ەندى ءبىر ەرلى-زايپتى ماڭگى بال جالاسقان، تاتۋ-ءتاتتى ءوتىپ جاتىپتى.

انا ەرلى-زايپتى مىنا ەرلى-زايپتىلاردىڭ بال جالاسقان ماحابباتىنا ءتانتى بولىپ جۇرەدى.

ءبىر كۇنى ايەلى كۇيەۋىنە: «سەن كورشىمىزدىڭ ۇيىنە ۇرلانىپ بارىپ كورىپ كەلشى، ولار نە ءۇشىن تىپ-تىنش، بەرەكەلى وتەدى»، - دەيدى. سونىمەن كۇيەۋى كورشى ءۇيدىڭ ماڭىنا كەلىپ، اشىق تۇرعان تەرەزەنىڭ جانىنا تىعىلادى.

قاراسا كورشىنىڭ ايەلى ءۇيىن جيناستىرىپ جاتىر ەكەن. ول قوناق بولمەدە وتە ساقتىقپەن ءبىر ادەمى قاشانى ءسۇرتىپ تۇرعان ەدى. كەنەت تەلەفون شىر ەتە قالعانى، كورشى ايەل دەرەۋ تەلەفون الماقشى بولىپ گۇل قاشانى ۇستەل ۇستىنە قويا سالادى.

سول كەزدە ءبىر نارسە ىزدەپ قوناق بولمەگە شىققان كۇيەۋى ابايسىزدا گۇل قاشانى قاعىپ كەتەدى دە، قاشا جەرگە ءتۇسىپ بىت-شىت بولادى. ەندى قىزىق كورەتىن بولدىم دەپ تەرەزە سىرتىندا تىعىلىپ تۇرعان كورشىسى ءماز بولادى. الايدا شالدىر ەتكەن داۋستى ەستي سالا جەتىپ كەلگەن كورشىنىڭ ايەلى، كۇيەۋىنە كومەكتەسىپ شاعىلعان گۇل قاشانى جيناسىپ جاتىپ، كۇرسىنە كەيىپ: «سۇيىكتىم، ءبارى مەنىڭ قاتەلىگىم، مەن ساسقالاقتاپ ءجۇرىپ، گۇل قاشانى ءوز ورنىنا اپارىپ قويماي كەتتىم، بولدى . . .» دەيدى.

تەرەزە سىرتىنداعى كورشىسى بۇل جاعدايدى كورىپ، ءبىر ءتۇرلى كۇي كەشىپ، اياعىن اۋىر باسا ۇيىنە بەتتەيدى. «سەن نەدەگەن ۇزاق ايلاندىڭ ؟ نەلەردى كوردىڭ ؟» دەپ ايەلى ارەڭ ورالعان كۇيەۋىنەن باستىرمالاتا سۇراپ جاتىر. «ەشتەمە جوق، ولار ۇيلەرىندە بولعان اعاتتىقتى ءار كىم ءوز باسىنان ىزدەسە، ال، ءبىزدىڭ ۇيدە، بارلىعىمىز دا بىتپەس سەبەپ ايتا بەرەدى ەكەنبىز» دەدى كۇيەۋى.
لي دۇڭمين
اۋدارعان: ارداق مولداسادىق قىزى، شاۋەشەك 6-ورتا مەكتەپ
قىتاي قازاق راديو تورابى. 2014