كونستيتۋتسيالىق كوميسسيا قۇرامىندا شەتەل ماماندارى جوق - پرەزيدەنت

- بارىڭىزگە ءمالىم، قازاقستان وتپەلى كەزەڭگە اياق باستى. ءبىز ەل تاعدىرىنا اسەر ەتەتىن اۋقىمدى وزگەرىستەردى جۇزەگە اسىرىپ جاتىرمىز. قىزىلوردادا وتكەن ۇلتتىق قۇرىلتاي وتىرىسىندا كونستيتۋتسيالىق رەفورمانىڭ ماڭىزدى تۇستارى تۋرالى ايتقانىمدى بىلەسىزدەر. قوعامدا كەشە عانا ەمەس، جارتى جىلدان بەرى كونستيتۋتسياعا قاتىستى جان-جاقتى پىكىر الماسۋ ءجۇرىپ جاتىر. بارلىق ۇسىنىستى جۇيەلەپ، سارالاۋ ءۇشىن 130 ادامنان تۇراتىن كونستيتۋتسيالىق كوميسسيا قۇرىلدى. بۇل - اۋقىمى جاعىنان دا، كاسىبي دەڭگەيى تۇرعىسىنان الىپ قاراساق تا، ەلىمىز ءۇشىن تەڭدەسى جوق كوميسسيا. وسى جولى كوميسسيا قۇرامىندا شەتەل ماماندارى جوق، - دەدى قاسىم-جومارت توقايەۆ.

بۇل تۇرعىدا پرەزيدەنت بىلتىر قازان ايىنان باستاپ ازاماتتارعا ءوز پىكىرىن بىلدىرۋگە تولىق مۇمكىندىك بەرىلگەنىن ەسكە سالدى. سول ۋاقىتتان بەرى eGov جانە eOtinish مەملەكەتتىك سيفرلىق پلاتفورمالارى ارقىلى بىرنەشە مىڭ ۇسىنىس كەلىپ ءتۇستى.

- كوميسسيا ءوتىنىشتىڭ ءبارىن مۇقيات قاراپ، قورىتىپ، ءتيىستى تۇزەتۋلەردى ازىرلەدى. كونستيتۋتسيالىق كوميسسيانىڭ جۇمىسى بارىنشا اشىق جۇرگىزىلدى. مۇنى ايتىپ ءوتۋ ماڭىزدى. سەبەبى ەلىمىزدەگى رەفورمالار بۇرىن- سوڭدى ەشقاشان ءدال وسىلاي جان- جاقتى تالقىلانىپ، تىكەلەي ەفير ارقىلى جۇرتشىلىقتىڭ نازارىنا ۇسىنىلماعان. ءبىز «حالىق ۇنىنە قۇلاق اساتىن مەملەكەت» رەتىندە سيفرلىق پلاتفورمالاردى كەڭىنەن قولداندىق. كونستيتۋتسيالىق رەفورماعا بايلانىستى ازاماتتارمەن بايلانىس جەلىلەرى ءتيىمدى جۇمىس ىستەدى. سونىڭ ارقاسىندا شىن مانىندە جالپى ۇلتتىق اۋقىمداعى تالقىلاۋ بولدى دەسەك، دۇرىس بولار. بۇل - ادىلەتتى قازاقستان قۇرىلىسىنىڭ ايقىن كورىنىسى، - دەدى مەملەكەت باسشىسى.

ايتا كەتەيىك، وسى ۋاقىتتا ۇكىمەتتىڭ كەڭەيتىلگەن وتىرىسى ءوتىپ جاتىر.