كولىگىن وتىرىك تەحنيكالىق تەكسەرۋدەن وتكىزگەندەرگە ايىپپۇل 370 مىڭ تەڭگەگە دەيىن وسەدى
استانا. KAZINFORM - كولىك مينيسترلىگى اۆتوموبيلىن جالعان تەحنيكالىق تەكسەرۋدەن وتكىزگەندەرگە ايىپپۇل 100 ا ە ك- كە دەيىن ۇلعايتىلاتىنىن حابارلادى.
زاڭ جوباسى شەڭبەرىندە اكىمشىلىك قۇقىق بۇزۋ تۋرالى كودەكستە اۆتوكولىكتى جالعان تەحنيكالىق تەكسەرۋدەن وتكىزۋگە ايىپپۇلدى 30 ايلىق ەسەپتىك كورسەتكىشتەن 100 ا ە ك- كە (369200 تەڭگە) دەيىن ۇلعايتۋ كوزدەلگەن.
كولىكتى جالعان تەحنيكالىق تەكسەرۋدەن وتكىزۋدىڭ سالدارى اقاۋى بار كولىكتىڭ جول قوزعالىسىنا جىبەرىلۋىنە مۇمكىندىك بەرىپ، كەيىن بۇل جول اپاتىنا، ونىڭ ىشىندە سوڭى ولىمگە ۇلاساتىن وقىس وقيعالار دەڭگەيىنىڭ وسۋىنە اكەپ سوعادى.
مامانداردىڭ ايتۋىنشا، سالىناتىن ايىپپۇل كولەمى جاسالعان قۇقىق بۇزۋشىلىقتارعا پروپورتسيونالدى بولۋى ءتيىس جانە بۇزۋشىلىقتاردىڭ ودان ءارى جاسالۋىنىڭ الدىن الۋى كەرەك.
اكىمشىلىك جازا قولدانىلعاننان كەيىن ءبىر جىلدىڭ ىشىندە قايتالاپ جاسالسا، تەحنيكالىق تەكسەرۋدەن وتكىزەتىن وپەراتور قىزمەت كورسەتۋ قۇقىعىنان 3 جىلعا دەيىنگى مەرزىمگە ايىرىلادى.
سونداي-اق اتالعان زاڭ جوباسى شەڭبەرىندە اۆتوكولىكتى تەحنيكالىق تەكسەرۋدەن وتكىزەتىن وپەراتورلاردىڭ قىزمەتىنە قويىلاتىن تالاپتاردى كۇشەيتۋ كوزدەلگەن.
جوعارىدا اتالعان وزگەرتۋلەر مەن تولىقتىرۋلاردى ەنگىزۋ اۆتوكولىك قۇرالدارىن مىندەتتى تەحنيكالىق بايقاۋدان وتكىزۋ ساپاسىن جاقسارتۋعا جانە جوسىقسىز تەحنيكالىق قاراپ تەكسەرۋ وپەراتورلارىنىڭ سانىن 2 ەسەگە قىسقارتۋعا مۇمكىندىك بەرەدى.
ايتا كەتەرلىگى، بۇگىنگى تاڭدا نارىقتا 950-قا جۋىق وپەراتور كولىكتى تەحنيكالىق تەكسەرۋدەن وتكىزۋ قىزمەتىن كورسەتەدى.
اۆتور
جانات قاپالبايەۆا
