كولىكتى ۇزاق قىزدىرۋ: ىشكى ىستەر ورگاندارى جاپپاي ايىپپۇل سالۋدى ماقسات ەتپەيدى

استانا. KAZINFORM - اۆتوكولىك قوزعالتقىشىن ۇزاق قىزدىرىپ تۇرعاندارعا ايىپپۇل سالۋعا قاتىستى ماسەلە قوعامدا قىزۋ تالقىلانىپ جاتىر. دەگەنمەن، بۇل نورما قابىلدانعانىنا ءبىراز جىل بولعان. وسى ورايدا، ىشكى ىستەر مينيسترلىگى ماسەلەگە قاتىستى تۇسىنىك بەردى.

- ىشكى ىستەر مينيسترلىگى جاپپاي ايىپپۇل (اتالعان نورما بويىنشا) سالۋدى كوزدەمەيدى. قۇقىق بۇزۋ دەرەكتەرىنە قاتىستى ازاماتتاردان شاعىم تۇسكەندە عانا سول بويىنشا زاڭدى شارا قابىلدانادى، - دەپ جاۋاپ بەردى ىشكى ىستەر مينيسترلىگىنىڭ باسپا ءسوز قىزمەتى Kazinform اگەنتتىگىنە بەرگەن جاۋابىندا.

ۆەدومستۆونىڭ مالىمدەۋىنشە، شارانىڭ نەگىزى ماقساتى - قوعامدىق ءتارتىپتىڭ ساقتالۋى.

- كولىكتى بەس مينۋتتان ارتىق قىزدىرۋ دەگەن - شارتتى ۇعىم. ەڭ بىرىنشىدەن، ادامدار «تىنىشتىعىمىزدى بۇزدى، جارتى ساعاتتان بەرى كولىگىنىڭ قوزعالتقىشىن دارىلداتىپ مازامىزدى الدى» دەپ شاعىمدانۋى مۇمكىن. سونداي جاعدايدا تىنىشتىقتى بۇزعانى ءۇشىن بەلگىلەنگەن ەرەجەلەرگە سايكەس شارا قولدانىلادى. مۇنداعى ماقسات - ورتاق قوعامدىق ءتارتىپتى ساقتاۋ، حالىقتىڭ تىنىشتىعىن قورعاۋ، - دەپ تۇسىندىرەدى مينيسترلىكتەن.

قولدانىستاعى جول قوزعالىسى قاعيداسىنىڭ 88-تارماعى 5-تارماقشاسىنا سايكەس، تۇرعىن پۋنكتىلەرىندە قوزعالتقىشى جۇمىس ىستەپ تۇرعان مەحانيكالىق كولىك قۇرالدارىنىڭ تۇرعىندارعا قولايسىزدىق تۋدىرىپ توقتاپ تۇرۋىنا تىيىم سالىنادى. وسىنداي تالاپ ج ج ق- نىڭ 17- ءبولىمىنىڭ 122-تارماعى 4-تارماقشاسىندا دا كورسەتىلگەن.

- بۇل - جاڭا نورما ەمەس. ول جول ءجۇرىسى قاعيداسىندا 20 جىلدان استام ۋاقىتتان بەرى بار. ەگەر كولىك قۇرالى توقتاپ تۇرعان كەزدە قوزعالتقىشى 5 مينۋتتان ارتىق جۇمىس ىستەپ، تۇرعىندارعا قولايسىزدىق تۋدىرسا، بۇل جاعدايدا قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 597-بابى 1-بولىگىندە كوزدەلگەن قۇقىق بۇزۋشىلىقتىڭ قۇرامىنا سايكەس قاراستىرىلادى. ىشكى ىستەر ورگاندارى اتالعان قۇقىق بۇزۋشىلىق ءۇشىن ازاماتتارعا جاپپاي ايىپپۇل سالۋدى ماقسات ەتپەيدى. كورسەتىلگەن باپ بويىنشا اكىمشىلىك قۇقىق بۇزۋشىلىق تۋرالى ءىس ازاماتتاردىڭ شاعىمدارى تۇسكەن كەزدە عانا، كۋاگەرلەر قۇقىق بۇزۋشىلىق تۋرالى فوتوسى مەن بەينەماتەريالدارىن ۇسىنعان جاعدايدا عانا قوزعالادى، - دەپ اتالىپ وتكەن ۆەدومستۆو اقپاراتىندا.

ەسكە سالساق، تاياۋدا ءماجىلىستىڭ جالپى وتىرىسىندا دەپۋتات سەرىك ەرۋبايەۆ قاتتى ايازدى كۇندەرى اۆتوكولىكتى جىلىتۋعا 5 مينۋتتان كوپ ۋاقىت كەتەتىنىن ايتتى. وسى ورايدا ول كولىكتىڭ قوزعالتقىشىن ۇزاق قىزدىرعانى ءۇشىن ايىپپۇل سالۋ نورماسى قيسىنسىز ەكەنىن اتاپ ءوتتى.

ايتا كەتەيىك، وسى نورما اياسىندا ايىپپۇل 5 ا ە ك سوماسىندا قاراستىرىلعان. ال وسى تالاپتى قايتادان بۇزعاندارعا 10 ا ە ك ايىپپۇل سالىنادى.

سەناتور مارات قوجايەۆ اتالعان ءتارتىپ كەزىندە كورشىلەر مەن باسقا دا ادامدارعا زيان كەلتىرمەۋ ماقساتىندا ەنگىزىلگەنىن ايتتى.

اۆتور

رۋسلان عابباسوۆ