كولىكتى تەحنيكالىق بايقاۋدان وتكىزۋ تالابى كۇشەيتىلەدى
استانا. قازاقپارات - سوڭعى 3 جىلدا ەلدەگى كولىكتەردىڭ تەحنيكالىق تەكسەرۋدەن وتكىزىلگەنىن راستايتىن 3,5 مىڭعا جۋىق قۇجات جالعان دەپ تانىلىپ، زاڭدى كۇشىن جويدى. 350 ورتالىقتىڭ جۇمىسى توقتاتىلدى. ويتكەنى وسى كۇنگە دەيىن كوپ جۇرگىزۋشى تەمىر تۇلپارىن ارنايى ستەندكە كىرگىزبەي-اق، قاشىقتان جالعان قۇجات جاساتىپ كەلگەن.

وسىعان بايلانىستى بيىل ءساۋىر ايىنان باستاپ ەلدەگى مىڭعا جۋىق ورتالىققا قاتىستى تەحنيكالىق بايقاۋ تالابى قايتا كۇشەيتىلەدى. جولاۋشىلار تاسىمالدايتىن اۆتوبۋستار، تاكسي جانە قاۋىپتى جۇك تاسيتىن كولىكتەر ءار 6 اي سايىن تەحنيكالىق بايقاۋدان وتكىزىلىپ تۇرۋى قاجەت. ال 2018 -جىلعا دەيىن شىعارىلعان باسقا كولىكتەردى جىلىنا ءبىر مارتە تەكسەرەدى.
جۇك كولىگى سانالاتىن بۇل مانيپۋلياتوردىڭ جۇرگىزۋشىسى - ەلوردالىق ۆلاديمير كۋحاريك. ول تەحنيكاسىنىڭ جارامدىلىعىن راستاۋ ءۇشىن جىل سايىن وسى ورتالىققا كەلەدى. ۋاقىتتى ۇنەمدەۋ نەمەسە تەمىر تۇلپاردىڭ اقاۋىن جاسىرۋ ماقساتىندا قاشىقتان قۇجات جاساتا سالاتىنداردى مۇلدەم تۇسىنبەيمىن، دەيدى. ونىڭ ايتۋىنشا، قاۋىپسىزدىك ءبىرىنشى كەزەكتە جۇرگىزۋشىنىڭ وزىنە كەرەك.
ۆلاديمير كۋحاريك، جۇرگىزۋشى:
- كولىگىمدى وسى جەردە تەحنيكالىق بايقاۋدان وتكىزۋگە تىرىسامىن. ويتكەنى ماتەريالدىق بازاسى جاقسى قامتىلعان. قىزمەت كورسەتۋ ساپاسى كوڭىلىمنەن شىعادى. شىنتۋايتىنا كەلگەندە كولىگىم سىر بەرە باستاسا، تەحنيكالىق بايقاۋ ورتالىقتارىنا جىلىنا ءبىر ەمەس، بىرنەشە رەت بارۋعا دايىنمىن. قاۋىپسىزدىك مەن ءۇشىن ءبىرىنشى كەزەكتە تۇر.
تەكسەرۋ كەزىندە قۇجاتتاعى اۆتوموبيل فوتوسۋرەتىنىڭ ارنايى باعدارلاما ارقىلى وڭدەلگەنى نەمەسە بەلگىلى ءبىر باپتاۋلارىنىڭ وزگەرتىلگەنى انىقتالسا، تاپسىرىس بەرۋشى دە، ونى ورىنداۋشى دا اكىمشىلىك جاۋاپكەرشىلىككە تارتىلادى. سونداي-اق، تەحنيكالىق بايقاۋ ورتالىقتارى كولىكتىڭ جارامدىلىعىن راستاۋعا ارنالعان قۇرىلعىلاردىڭ، بىلىكتى مامانداردىڭ جانە جالپى ستاندارتقا ساي عيماراتتىڭ بارىن جەرگىلىكتى جەردەگى قۇزىرلى ورگاندارعا دالەلدەۋى ءتيىس. كەرى جاعدايدا ولاردىڭ قىزمەتى زاڭسىز سانالادى.
باۋىرجان شايدوللا، «ق ر تەحنيكالىق بايقاۋ وپەراتورلارىنىڭ وداعى» زاڭدى تۇلعالار مەن جەكە كاسىپكەرلەر بىرلەستىگى قاۋىمداستىعىنىڭ پرەزيدەنتى:
- 2012 -جىلدان باستاپ، سول پارامەترلەر بارلىعى كىرىپ وتىر. قازىرگى بۇيرىقپەن «حابارلاندىرۋ» تالابى كەتەدى دە، «رۇقساتناما» تالابى كەلەدى. عيماراتتى كەلىپ، تەكسەرىپ، قابىلدايدى. سودان كەيىن عانا رەەسترگە كىرگىزەدى. تەجەگىش ستەندتەرىنىڭ بولۋى زاڭدىلىق. ودان باسقا گاز تالداۋىش، ءتۇتىن ولشەۋىش، اۆتوموبيل اسپاسىن تەكسەرۋشى ستەند، فوتو تىركەۋ جانە بەينەباقىلاۋ قۇرالدارى مىندەتتى تۇردە بولۋى كەرەك.
2015 -جىلدان بەرى ورتالىق اشقان زاڭدى تۇلعالار مەن جەكە كاسىپكەرلەر ءۇشىن وڭىرلىك كولىك باقىلاۋ ينسپەكتسياسىنا ماتەريالدىق- تەحنيكالىق بازانىڭ بار-جوعىن كورسەتپەي-اق، حابارلاندىرۋ جونەلتسە جەتكىلىكتى ەدى. بۇدان بىلاي بۇل پروتسەدۋرا وڭىرلىك كولىك باقىلاۋ ينسپەكسياسى رۇقساتىمەن عانا قابىلدانادى. ال ورتالىقتى اشۋعا رۇقسات الۋ ءۇشىن ءتيىستى قۇرىلعىلاردىڭ بارىن تەك قۇجاتپەن عانا ەمەس، ءىس جۇزىندە دە كورسەتۋى قاجەت.
تالاپ بويىنشا ءار تەحنيكالىق بايقاۋ ورتالىعىندا وسىنداي ارنايى ور بولۋى كەرەك. ونىڭ ەنى 90 س م كەم بولماۋى ءتيىس. سونداي-اق جەڭىل كولىكتەردى تەكسەرەتىن ورتالىقتاردىڭ بيىكتىگى 4 مەتر، ال جۇك كولىكتەر بويىنشا 5,5 مەتر بولۋى قاجەت. سوڭعى 3 جىل ىشىندە جوعارىدا ايتىلعانداي كولىك جۇرگىزۋشىلەردىڭ 3 مىڭنان استام تەحنيكالىق بايقاۋ قۇجاتى جالعان دەپ تانىلدى. ولاردىڭ كۇشى جويىلدى. وسىعان بايلانىستى كولىك مينيسترلىگى جۇرگىزۋشىلەر مەن وپەراتورلاردى زاڭعا نەمقۇرايلى قاراماۋعا شاقىرادى. ال جوعارىدا ايتىلعان شارالار نارىقتىڭ كولەڭكەلى تۇستارىن ءبىرشاما ازايتادى، - دەيدى ماماندار.