كولىك سالاسىندا كادر تاپشى، 2030 -جىلعا قاراي 8,8 مىڭ مامان قاجەت بولادى
استانا. KAZINFORM - ق ر پرەمەر-ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن ۇلتتىق كاسىپتىك بىلىكتىلىك كەڭەسىنىڭ كەزەكتى وتىرىسى ءوتتى. ونىڭ شەڭبەرىندە سالالىق بىلىكتىلىك جۇيەلەرىن دامىتۋ، كاسىپتىك ستاندارتتاردى ازىرلەۋ جانە وزەكتەندىرۋ جونىندەگى شارالار مەن جوسپارلار قارالادى.

قازىرگى ۋاقىتتا ورتالىق مەملەكەتتىك ورگاندار جانىنان سالالىق كەڭەستەر قۇرىلىپ، وعان ساراپشىلار، وقۋ ورىندارىنىڭ وكىلدەرى مەن جۇمىس بەرۋشىلەر تارتىلدى.
ولاردىڭ ازىرلەگەن كاسىبي ستاندارتتارى نەگىزىندە جوعارى وقۋ ورىندارى مەن كوللەدجدەردەگى ءبىلىم بەرۋ باعدارلامالارى تۇزەتىلەدى.
بۇل رەتتە تۇلەكتەردىڭ قۇزىرەتىن تاۋەلسىز سەرتيفيكاتتاۋ ورتالىقتارى باعالايدى. وسىلايشا، ەڭبەك نارىعىنىڭ سۇرانىسىنا سايكەس كەلەتىن ساپالى كادر دايارلاۋ پروتسەسى جەتىلدىرىلۋدە.
وتىرىس بارىسىندا كولىك جانە قارجى مينيسترلىكتەرىنىڭ وسى باعىتتا اتقارىپ جاتقان جۇمىستارى قارالدى.
كولىك ۆيتسە-ءمينيسترى ءساتجان ابلاليەۆ ۆەدومستۆو جانىنان 6 سالالىق كەڭەس جۇمىس ىستەيتىنىن حابارلادى.
ولار تەمىرجول، سۋ، اۆتوموبيل كولىگى جانە جولدار، سونداي- اق ازاماتتىق اۆياتسيا سالالارىن قامتيدى.
كەڭەس قازىردىڭ وزىندە 711 كاسىپتى قامتيتىن 101 كاسىبي ستاندارت ازىرلەگەن. بيىل تاعى جاڭادان 19-ىن ازىرلەپ، 31- ءىن وزەكتەندىرۋ جوسپارلانۋدا.
كولىك مينيسترلىگىنىڭ بولجامىنا سايكەس، 2030 -جىلعا دەيىن اتالعان سالالارعا 8,8 مىڭعا جۋىق مامان قاجەت بولادى.
قازىر كادرلار 49 جوعارى وقۋ ورنىندا جانە 280-دەن استام كوللەدجدە دايارلانۋدا.
ۆيتسە- مينيستر وقۋ ورىندارىنىڭ سانى كوپ كورىنگەنىمەن، كەيبىر ماماندىقتار بويىنشا مىسالى، كوپىر مەن تەمىرجول قۇرىلىسى بويىنشا وقيتىن ستۋدەنتتەر از ەكەنىن اتاپ ءوتتى.
سوندىقتان عىلىم جانە جوعارى ءبىلىم مينيسترلىگىمەن بىرلەسىپ گرانتتى قايتا ءبولۋ ماسەلەسى قارالۋدا.
قارجى ۆيتسە-ءمينيسترى داۋرەن كەڭبەيىلدىڭ مالىمەتىنشە، جەتەكشىلىك ەتەتىن سالادا «بۋحالتەر» ماماندىعى بويىنشا ءبىر كاسىبي ستاندارت پايدالانىلادى.
ونى وزىق جوعارى وقۋ ورىندارىنىڭ ءبىلىم باعدارلامالارى بويىنشا وزەكتەندىرۋ كوزدەلىپ وتىر.
بۇل رەتتەر اسسا (Association of chartered certified accountants) حالىقارالىق بىلىكتىلىگى بويىنشا ستۋدەنتتەردى وقىتۋ جانە سەرتيفيكاتتاۋ ماسەلەسى قاراستىرىلۋدا.
وسىلايشا، ديپلوم العان جانە ءوز بىلىكتىلىگىن راستاعان تۇلەكتەردى جۇمىسقا ورنالاستىرۋ پروتسەسىن جەڭىلدەتۋ جوسپارلانعان.
«سەرتيفيكات تاۋەلسىز ورتالىقتار تاراپىنان بەرىلۋى ماڭىزدى. ول بويىنشا جۇمىس بەرۋشىنىڭ مامان بىلىكتىلىگىنە قاتىستى پىكىرى قالىپتاسادى. وقۋ ورنىنىڭ ءيميدجى دە وسىعان تىكەلەي بايلانىستى. ءبىر سوزبەن ايتقاندا، ءبىز وسى نەمەسە باسقا ماماندىقتى يگەرىپ جاتقان ازاماتتى ساپالى جۇمىس ورنىمەن قامتاماسىز ەتۋ ءۇشىن جاعداي جاساۋىمىز كەرەك»، - دەپ اتاپ ءوتتى تامارا دۇيسەنوۆا.
اۆتور
جانات قاپالبايەۆا