كولىك ءمينيسترى «ق ت ج» باسشىسىن وتستاۆكاعا جىبەرۋ تۋرالى ۇسىنىسقا پىكىر ءبىلدىردى

ۇكىمەت وتىرىسىنان كەيىن ءوتىپ جاتقان باسپا ءسوز كونفەرەنسياسىندا كولىك ءمينيسترى مارات قارابايەۆ «قازاقستان تەمىرجولى» ۇلتتىق كومپانياسىنىڭ باسقارما ءتوراعاسى نۇرلان ساۋرانبايەۆتى وتستاۆكاعا جىبەرۋ تۋرالى ۇسىنىسقا پىكىر ءبىلدىردى، دەپ حابارلايدى Kazinform.

«ءسىز تەمىرجول سالاسىنىڭ ەكى جىلداعى جاعدايىن نەمەن باعالاپ وتىرسىز؟ جالپى بيىل تاسىمال كولەمى 5 پايىز ءوستى. ترانزيت كولەمى بيىلدىڭ وزىندە 25 ميلليون تونناعا جەتكەنىن ايتتىم. ءوسىم 20 پايىز دەڭگەيىندە بولىپ تۇر. «ق ت ج» - دا بار پروبلەمالار جىلدار بويى قوردالانعان. سوندىقتان «ق ت ج» ۇلتتىق وپەراتورى مينيسترلىكپەن بىرگە شارالار قابىلداپ جاتىر. ول تۋرالى ءسىز جاقسى بىلەسىز دەپ توپشىلايمىن. بۇعان دەيىن دە بىزدەگى جۇك ۆاگون پاركىنىڭ توزۋ كورسەتكىشى 60 پايىزدان اسقانىن بىرنەشە رەت ايتتىق. سوندىقتان بيىل 3 مىڭ جاڭا ۆاگون ساتىپ الۋ تۋرالى كەلىسىم بەكىتىلگەن. جولاۋشى ۆاگوندارىنىڭ توزۋ كورسەتكىشى 50 پايىزدان اسقانىن ايتتىق. سوندىقتان بيىل 64 جولاۋشى پاركىن ساتىپ الدىق. لوكوموتيۆتەر دە توزعان. ونى جوققا شىعارىپ وتىرعان جوقپىن. جازدا پروبلەمالار بولدى. ءبىراق بۇل ترانزيت ەمەس، ەكسپورتتىڭ كولەمدەرىمەن بايلانىستى. سوندىقتان بيىل 114 لوكوموتيۆ ساتىپ الدىق»، - دەدى مينيستر.

ونىڭ پايىمىنشا، ماسەلە قادام- قاداممەن شەشىلىپ جاتىر.

«كولىك ءمينيسترى رەتىندە ن. ساۋرانبايەۆتىڭ جۇمىسىن «جاقسى» دەپ باعالايسىز با؟ »، - دەپ سۇرادى جۋرناليست.

«مەن كولىك مينيسترلىگىنىڭ باسشىسى رەتىندە قازاقستانداعى تەمىرجولداردىڭ قىزمەتىندەگى پروبلەمالار جىلدار بويى قوردالانعان جانە قادام- قاداممەن شەشىلىپ جاتىر دەپ باعالايمىن»، - دەدى مارات قارابايەۆ.

اۆتور

ەسىمجان ناقتىباي