كوللەدج وزاتتارىن ج و و- عا ەمتيحانسىز قابىلداۋ تاجىريبەسىن قايتارۋ كەرەك - تامارا دۇيسەنوۆا
استانا. KAZINFORM - بىلىكتى كادرلار تەك جوعارى وقۋ ورىندارىندا عانا ەمەس، تەحنيكالىق جانە كاسىپتىك ءبىلىم بەرۋ ۇيىمدارىندا دا دايىندالۋى كەرەك.
بۇل تۋرالى ق ر پرەمەر-ءمينيسترىنىڭ ورىنباسارى تامارا دۇيسەنوۆا «Digital Kazakhstan: زاماناۋي ءبىلىم بەرۋ» رەسپۋبليكالىق تامىز سامميتىندە ايتتى.
«بىلىكتى كادرلار تەك جوعارى وقۋ ورىندارىندا عانا ەمەس، تەحنيكالىق جانە كاسىپتىك ءبىلىم بەرۋ ۇيىمداردا دا دايىندالۋى كەرەك. وكىنىشكە وراي، بۇل ءبىلىم بەرۋ جۇيەسىنىڭ ەڭ وسال بۋىنى بولىپ قالۋدا. دۇنيەجۇزىلىك ەكونوميكالىق فورۋمنىڭ 2019 -جىلعى مالىمەتىنشە، ءبىز الەمنىڭ 141 ەلى اراسىندا تۇلەكتەردىڭ داعدىلارى بويىنشا 95- ورىندا تۇرمىز. پرەزيدەنت تاپسىرماسىمەن ۇكىمەت بارلىق ت ج ك ب ۇيىمدارىن تۇگەندەۋدى اياقتادى جانە پروفيلدەۋدى جۇرگىزۋدە. كەلەسى كەزەڭ - جوعارى وقۋ ورىندارىندا جوسپارلانعان وزگەرىستەرمەن ساباقتاستىقتى قامتاماسىز ەتۋگە باعىتتالعان ترانسفورماتسيا بولۋى كەرەك»، - دەدى تامارا دۇيسەنوۆا.
سونداي-اق، ۆيتسە- پرەمەر ءبىلىم بەرۋدىڭ حالىقارالىق سالالىق ستاندارتتارى ەنگىزىلەتىن تىرەك كوللەدجدەر تىزبەسىن ايقىنداۋ قاجەتتىگىن ايتتى.
«بۇدان ءارى ولاردىڭ بازاسىندا باسقا ت ج ك ب تۇلەكتەرىن وقىتۋدىڭ جانە سەرتيفيكاتتاۋدىڭ جاڭا باعدارلامالارىن ترانسفەرتتەۋ ءۇشىن كادرلاردى وزىق دايارلاۋ ورتالىقتارىن قۇرۋ قاجەت. مۇنداي مىسالدار قازىردىڭ وزىندە بار. مىسالى، اتىراۋ APEC PetroTechnic كوللەدجىندە مۇناي-گاز سالاسىندا ءبىلىم بەرۋدىڭ 3 حالىقارالىق ستاندارتى ەنگىزىلدى (ەلەكتر ەنەرگەتيكاسى، بۇرعىلاۋ كەزىندە ۇڭعىمانى باسقارۋ، مۇناي وڭدەۋ تۇرلەرى بويىنشا تەحنولوگ). بۇل كوللەدجدىڭ سەرتيفيكاتتالعان تۇلەكتەرى بىزدە دە، شەتەلدە دە سۇرانىسقا يە»، - دەدى ت. دۇيسەنوۆا.
سونداي-اق، سپيكەر جوعارى وقۋ ورىندارى مەن كوللەدجدەردىڭ ءبىلىم بەرۋ باعدارلامالارى اراسىنداعى ساباقتاستىقتى قامتاماسىز ەتۋ قاجەت ەكەنىن ايتتى.
«مىسالى بۇعان تارتىلعان بەدەلدى جوعارى وقۋ ورىندارى جوعارى دەڭگەيدەگى ينجەنەرلەردى دايارلاسا، وندا كوللەدجەر تيىسىنشە تەحنيكتەرمەن، تەحنولوگتارمەن، جاڭا بۋىن مەحانيكتەرىمەن ج و و- نى تولىقتىرۋعا ءتيىس. مۇندا بۇرىن تەحنيكۋمداردى ۇزدىك اياقتاعان تۇلعالار ج و و- نىڭ ءۇشىنشى كۋرسىنا ەمتيحانسىز قابىلدانعانىن ەسكە سالعىم كەلەدى. بۇل تاجىريبە مامانداردىڭ بىلىكتىلىگىنە قويىلاتىن جاڭا تالاپتاردى ەسكەرە وتىرىپ، جاڭارتىلۋى ءتيىس»، - دەدى تامارا دۇيسەنوۆا.
ايتا كەتەيىك، ەلوردادا «Digital Kazakhstan: زاماناۋي ءبىلىم بەرۋ» اتتى تامىز كەڭەسى ءوتتى. وعان 500 مىڭنان استام ءبىلىم بەرۋ قىزمەتكەرى ونلاين جانە وففلاين قاتىستى.
اۆتور
ايجان سەرىكجان قىزى
