«كوكشەتاۋ-پەتروپاۆل» تاس جولىن كەڭەيتۋ ىسىنە كىرىسۋ كەرەك - توقايەۆ

- ءبىز قازاقستاننىڭ بارلىق ايماعىن بايلانىستىراتىن، ياعني، ەلىمىزدىڭ ترانزيتتىك الەۋەتىن كۇشەيتەتىن زاماناۋي، وتە دامىعان تەمىرجول جانە كولىك جولدارىنىڭ تۇتاس جەلىسىن قۇرۋىمىز كەرەك. بۇل - ستراتەگيالىق مىندەت. ەلىمىز ارقىلى تاسىمالداناتىن جۇك كولەمى جىل سايىن ۇلعايىپ كەلەدى. دەمەك ءبىزدىڭ الدىمىزدا جول ينفراقۇرىلىمىن جاقسارتا ءتۇسۋ مىندەتى ءالى دە تۇر. بۇل، اسىرەسە، سولتۇستىك ايماقتارعا قاتىستى وزەكتى ماسەلە. سوندىقتان ەندىگى كەزەكتە «كوكشەتاۋ-پەتروپاۆل» تاس جولىن كەڭەيتۋ ىسىنە كىرىسۋ كەرەك، - دەدى قاسىم-جومارت توقايەۆ.

پرەزيدەنتتىڭ ايتۋىنشا، اۆتوكولىكپەن جۇك تاسىمالدايتىن وتاندىق كاسىپكەرلەرىمىزگە جاردەم كورسەتۋ قاجەت. سەبەبى قازاقستان ارقىلى وتەتىن اۆتوكولىك ترانزيتىنىڭ جارتىسىنان كوبى شەتەلدىكتەرگە تيەسىلى.

- وسى سالانى دا رەتكە كەلتىرەتىن ۋاقىت كەلدى، ۇكىمەت ءتيىستى ءىس-ارەكەتتەردى قولدانادى. نەگىزگى ماقسات - ەلىمىزدىڭ جولدارىنىڭ الەۋەتىن نىعايتىپ، ازاماتتارىمىزدىڭ تابىسىن ارتتىرۋ، - دەدى مەملەكەت باسشىسى.

بۇعان دەيىن پرەزيدەنت قاسىم-جومارت توقايەۆ قۇرىلتاي وتىرىسىندا «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىن جاريالاپ جاتقانىن جازعان ەدىك.