كوشپەندىلەر ۆيزاسىن الۋعا ءوتىنىش بەرۋشىلەرگە قانداي تالاپ قويىلادى
استانا. KAZINFORM - تۋريزم جانە سپورت مينيسترلىگى Neo Nomad Visa الۋعا ءوتىنىش بەرۋشىلەرگە قانداي تالاپ قويىلاتىنىن ايتتى.

«بۇگىنگى كۇنى Neo Nomad Visa ەنگىزۋ جوسپارلانۋدا. ول ءۇشىن مينيسترلىك مۇددەلى مەملەكەتتىك ورگاندارمەن بىرلەسىپ، ىسكە اسىرۋ تەتىكتەرىن جانە قاجەتتى قۇجاتتارىن پىسىقتاپ جاتىر. بۇل ۆيزانىڭ يەگەرى تابىسى كەمىندە 3 مىڭ ا ق ش دوللارىن قۇرايتىن توپ-50 دامىعان ەلدىڭ ازاماتتارى (ەلدەردىڭ تىزبەسى ناقتىلانۋى مۇمكىن)، سونداي-اق سوتتىلىعى جوق، قازاقستان اۋماعىندا جالعا الىنعان جىلجىمايتىن مۇلىك جانە جارامدى مەديتسينالىق ساقتاندىرۋى بار تۇلعالار بولا الادى. ۆيزانىڭ قولدانىلۋ مەرزىمىن تاعى ءبىر جىلعا ۇزارتۋ مۇمكىندىگى بەرىلەدى»، - دەپ اتاپ ءوتتى مينيسترلىكتەن اگەنتتىكتىڭ رەسمي ساۋالىنا وراي.
ۆەدومستۆونىڭ مالىمەتىنشە، اتالعان ۆيزانى الۋعا ءوتىنىش بەرۋشىلەرگە مىناداي نەگىزگى تالاپتار (ءتىزىم ءالى ناقتىلانادى) قويىلماق:
- 23 جاستان اسقان (وزگەرتىلۋى مۇمكىن)؛
- سوتتىلىقتىڭ بولماۋى؛
- شەتەلدەن 3 مىڭ دوللاردان كەم ەمەس زاڭدى تابىسىنىڭ بولۋى.
- قازاقستان اۋماعىندا جالعا الىنعان جىلجىمايتىن مۇلكىنىڭ بولۋى؛
- مەديتسينالىق ساقتاندىرۋدىڭ بولۋى.
ايتا كەتەيىك، تۋريزم جانە سپورت ءمينيسترى ەرمەك مارجىقپايەۆ قازىرگى زامانعى كوشپەندىلەردىڭ ۆيزاسىن ەنگىزۋ ماسەلەسى قارالىپ جاتقانىن ايتقان بولاتىن.
«ۆيزالىق كوشى- قون رەجيمى ماسەلەسى تۋريستەر تاراپىنان كوپتەگەن شاعىم تۋدىرادى. تۋروپەراتورلاردىڭ حابارلاۋىنشا، شەتەلدىك كەلۋشىلەر ۆيزالىق كوشى-قون پورتالىنىڭ تەحنيكالىق اقاۋىنا بايلانىستى ۆيزا الۋ كەزىندە قيىندىقتارعا تاپ بولادى. ناتيجەسىندە تۋروپەراتورلار شەتەلدىك تۋريستەر ءۇشىن بروندالعان بيلەتتەردى الىپ تاستاۋعا ءماجبۇر. وسىعان بايلانىستى ەلگە كەلگەننەن كەيىن ۆيزا الۋ بويىنشا اۋەجايلارداعى كوشى-قون قىزمەتتەرىندە پەرسونال سانىن كوبەيتۋ جانە ونىڭ پورتالىنىڭ ۇزدىكسىز جۇمىسىن قامتاماسىز ەتۋ ۇسىنىلادى»، - دەدى مينيستر.
ونىڭ اتاپ وتۋىنشە، مۇنان بولەك ۆيزا الۋ راسىمدەرىن سيفرلاندىرۋ جانە وڭايلاتۋ ارقىلى اتالعان رەجيمدى جەتىلدىرۋ قاجەت.
«مۇددەلى مەملەكەتتىك ورگاندارمەن بىرلەسىپ، شەتەلدىك ازاماتتارعا ەلدە ۇزاق مەرزىمدى بولۋ قۇقىعىن بەرە وتىرىپ، قازىرگى زامانعى كوشپەندىلەردىڭ ۆيزاسىن ەنگىزۋ ماسەلەسى قارالىپ جاتىر (جۇمىس اتاۋى - NEO Nomad Visa) . بۇل شارانى ەنگىزۋدەن كۇتىلەتىن ەكونوميكالىق ناتيجە جىل سايىن 3 ميلليارد تەڭگەدەن اسادى. قازىرگى ۋاقىتتا Neo Nomad Visa ەنگىزۋ تەتىگى ازىرلەنىپ، مۇددەلى مەملەكەتتىك ورگاندارعا جولداندى»، - دەگەن بولاتىن ەرمەك مارجىقپايەۆ.
اۆتور
مارلان جيەمباي