كوشپەندىلەر ويىنى: رۋمىنيالىق جاس توعىزقۇمالاقشى ەلدى تامساندىردى
استانا. KAZINFORM - رۋمىنيادان كەلگەن جاس تالانت رازۆان اندرەي مۋچيتسا استانادا ءوتىپ جاتقان دۇنيەجۇزىلىك كوشپەندىلەر ويىندارىندا دارىنىمەن دارالانىپ، جۇرتتى تامساندىردى.
V دۇنيەجۇزىلىك كوشپەندىلەر ويىندارىن دايىنداۋ جانە وتكىزۋ ديرەكسياسى باسپا ءسوز قىزمەتىنىڭ حابارلاۋىنشا، توعىزقۇمالاق سايىسىنا قاتىسۋشىلاردىڭ ءبىرى - رۋمىنيادان كەلگەن 11 جاسار رازۆان اندرەي مۋچيتسا.
ول توعىزقۇمالاق ويىنى جايلى نەبارى ءبىر جىل بۇرىن، 4-سىنىپ وقىپ جۇرگەندە بىلگەن. ەجەلگى ويىننىڭ ستراتەگيالىق جاانە زياتكەرلىك تەرەڭدىگى وعان ەرەكشە اسەر قالدىرعان. اقىل-ويعا، تاپقىر تاسىلدەرگە نەگىزدەلگەن سپورتتىڭ بۇل ءتۇرى بالانى بىردەن باۋراپ العاندىقتان، ول ويىن ەرەجەلەرىمەن تانىسىپ، داعدىلاردى مەڭگەرە باستايدى.
رۋمىنيادا وسى زياتكەرلىك ويىندى ناسيحاتتاۋمەن يۋنەسكو بەلسەندى تۇردە اينالىسىپ كەلەدى. مەكتەپ باعدارلاماسىنا توعىزقۇمالاق ساباقتارىن ەنگىزۋ شارالارىن دا جۇزەگە اسىرعان. اندرەي وقيتىن مەكتەپتە ءتۇرلى ويىندار مەن شەبەرلىك دارىستەرىنىڭ ءوتۋى ونىڭ ءبىلىم الۋىنا عانا ەمەس، سىنىپتاستارىن شابىتتاندىرۋعا دا اسەر ەتتى. سپورتشىنىڭ ءوزى ايتقانداي، بۇگىندە بىرگە وقيتىن 10 شاقتى وقۋشى ونى قولداپ، توعىزقۇمالاق ويناۋعا اۋەستەنە باستاعان.
ايتا كەتەرلىگى، Andrei الماتىدا وتكەن توعىزقۇمالاقتان الەم چەمپيوناتىنا قاتىسقان. دايىندىق ۋاقىتى از بولعاندىقتان، مۇنداي ماڭىزدى دودادا 4-ورىنعا ىلىگۋىن دە زور جەتىستىك، جوعارى كورسەتكىش دەپ سانايدى.
بالينت كلاۋديا- كرينا مۇعالىمىنىڭ ايتۋىنشا، يۋنەسكو- نىڭ توعىزقۇمالاق ويىنىن ۇيرەتۋ جوباسى رۋمىنياداعى كوپتەگەن مەكتەپتە جۇزەگە اسقان جانە قازىردىڭ وزىندە 60 مىڭنان اسا بالانى قامتيدى.
«اي سايىن مەكتەپتە اتا- انالار ءۇشىن توعىزقۇمالاق ويىنىن ۇيرەنۋگە جانە ءتۇرلى سايىستارعا قاتىسۋعا مۇمكىندىك بەرەتىن اشىق ساباقتار ءوتىپ تۇرادى. ناعىز مەرەكەگە اينالىپ كەلە جاتقان بۇل ءىس- شارانى وتباسى مەن قوعامداستىقتى سپورت پەن مادەنيەتتىڭ توڭىرەگىنە توعىستىراتىن كوشپەندىلەر ويىندارىمەن سالىستىرۋعا دا بولادى»، - دەيدى وقىتۋشى.
اۆتور
مۇحتار قاليموللا ۇلى
