ۋكراينا توڭىرەگىندە باستالعان كەلىسسوز وڭ ناتيجە بەرەدى دەپ ۇمىتتەنەمىز - شاۆكات ميرزيەۆ

تاشكەنت. KAZINFORM - الەمنىڭ ءتۇرلى ايماعىندا بولىپ جاتقان قاقتىعىستار جاھاندىق جانە ايماقتىق بەيبىتشىلىك پەن قاۋىپسىزدىككە ۇلكەن قاتەر توندىرەدى.

بۇل تۋرالى پارلامەنتارالىق وداقتىڭ مەرەيتويلىق اسسامبلەياسىندا ءسوز سويلەگەن وزبەكستان پرەزيدەنتى شاۆكات ميرزيەۆ ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

بۇگىن وزبەكستان استاناسىندا پارلامەنتارالىق وداقتىڭ 150- اسسامبلەياسى ءوتتى. ونىڭ بارىسىندا ءسوز سويلەگەن پرەزيدەنت شاۆكات ميرزيەۆ الەمدەگى گەوساياسي جاعداي مەن شيەلەنىستەرگە توقتالدى.

- وزبەكستان كەز-كەلگەن قاقتىعىس پەن شيەلەنىستى تەك بەيبىت كەلىسسوز ارقىلى شەشۋ پرينتسيپىن قولدايدى. ۋكراينا توڭىرەگىندەگى جاعدايعا قاتىستى باستالعان كەلىسسوزدەر وڭ ناتيجە بەرەدى دەپ ۇمىتتەنەمىز. ءبىز ەڭ وتكىر ماسەلەلەردىڭ شەشىمىن ب ۇ ۇ جارعىسى مەن قارارلارى نەگىزىندە تابۋ ماڭىزدى دەپ سانايمىز. سونىمەن، پالەستينا-يزرايل قاقتىعىسىنىڭ جالعىز جانە ءادىل شەشىمى - «ەكى حالىق ءۇشىن ەكى مەملەكەت» قاعيداتىن ۇستانۋ جانە ونى ىسكە اسىرۋ، - دەدى ش. ميرزيەۆ.

بۇعان قوسا وزبەكستان باسشىسى اۋعانستانداعى جاعدايدى تۇراقتاندىرۋدىڭ ماڭىزدىلىعىن اتاپ ءوتتى.

- كورشىمىز اۋعانستاندى دا ۇمىت قالدىرماۋىمىز كەرەك. بۇل ەلدىڭ حالىقارالىق ارەنادان وقشاۋلانۋىنا جول بەرمەي، قازىرگى بيلىكپەن سىندارلى ديالوگ ورناتىپ، اۋعانستاندى ورتالىق ازيا ايماعىنىڭ اجىراماس بولىگى رەتىندە قاراستىرۋ ماڭىزدى دەپ سانايمىز، - دەيدى شاۆكات ميرزيەۆ.

ەسكە سالايىق، تاياۋدا «ورتالىق ازيا-ەۋروپا وداعى» سامميتىنە قاتىسقان پرەزيدەنت قاسىم-جومارت توقايەۆ ۋكرايناعا قاتىستى كەلىسسوزدەرگە توقتالعان ەدى. ول جولى مەملەكەت باسشىسى شيەلەنىستىڭ وڭ شەشىمىن تاباتىنىنا سەنىم ءبىلدىردى.

اۆتور

ءاليحان اسقار