كەلەسى قازاق عارىشكەرى قاشان عارىشقا شىعادى

الماتى. KAZINFORM - الماتىدا IQ BBQ عىلىمي-مۋزىكالىق فەستيۆالى ءوتتى. اۋقىمدى ءىس-شارانىڭ قوناعى بولعان ق ر ۇشقىش-عارىشكەرى، ق ر حالىق قاھارمانى ايدىن ايىمبەتوۆ كەلەسى قازاق عارىشكەرى قاشان شىعۋى مۇمكىن ەكەنىن ايتتى.

ونىڭ سوزىنشە، بۇگىنگى كۇنى قازاقستاندىق عىلىمي ينستيتۋتتار عارىشتىڭ عىلىمي-زەرتتەۋ باعدارلاماسىن دايىنداپ جاتىر.

- قازىرگى ۋاقىتتا عىلىمي-زەرتتەۋ باعدارلاماسى دايىندالىپ جاتىر. ونسىز عارىشكەردى جاي عانا عارىشقا جىبەرۋدىڭ ءمانى بولمايدى. وسى عىلىمي باعدارلاما دايىن بولعان كەزدە كەلەسى عارىشكەردىڭ اتى اتالادى. ۇمىتكەرلەردى تابۋ قيىن بولمايدى دەپ ويلايمىن. ويتكەنى قازىرگى جاستار مىقتى. ءبىزدىڭ كەزدە كوبى سالاۋاتتى ءومىر سالتىن ۇستانا بەرمەسە، بۇگىنگى جاستار سپورتقا جاقىن جانە عىلىم-بىلىمگە ۇمتىلادى، - دەدى ول.

سونداي-اق ايدىن ايىمبەتوۆ قازاقستان بەيبىت ماقساتتا عارىشتى زەرتتەۋگە كوبىرەك كوڭىل ءبولۋى كەرەك ەكەنىن اتاپ ءوتتى.

- عارىشقا بىرنارسە جىبەرگەندە «ونىڭ نە قاجەتى بولدى، ودان دا اقشانى بارىنە ءبولىپ بەرەيىك» دەگەن اڭگىمەلەر بولادى. ونى تاراتقاندا ءارى كەتسە 10 مىڭ تەڭگەدەن بولىنەر، ادامدار ونى ءبىر كۇندە ءىشىپ-جەپ قويادى. اي باعدارلاماسىن الايىق، وندا ەشقاشان اتموسفەرا بولعان جوق. ءبىراق سول جەردە جينالعان ماتەريالدار الەمنىڭ پايدا بولۋىنىڭ قۇپياسىن اشۋى مۇمكىن. عارىشتاعى استەرويدتار تاس كۇيىندە عانا ەمەس، تەمىردەن نە التىننان قۇرالعان بولۋى مۇمكىن. مىنە، وسىنداي نارسەلەردى زەرتتەۋىمىز كەرەك. ال ەگەر «ونى قايتەمىز، اقشانى تاراتىپ بەرەيىك» دەپ جۇرە بەرسەك، وندا دامىعان ەلدەردىڭ ارتىنان عانا جۇرەمىز، - دەدى عارىشكەر.

ايتا كەتكەن ءجون، ايدىن ايىمبەتوۆ 2015 -جىلعى 2-قىركۇيەكتە عارىشقا ۇشىپ، وندا 10 كۇن بولدى. وسىلايشا ول ءۇشىنشى قازاق عارىشكەرى اتاندى.

اۆتور

دوسبول اتاجان