كەلەر جىلى «ورتالىق ازيا-ەۋرووداق» سامميتى وزبەكستاندا وتەدى
تاشكەنت. KAZINFORM - «ورتالىق ازيا - ەۋرووداق» فورماتىنداعى كەزەكتى سامميت كەلەر جىلى وزبەكستاندا وتپەك. بۇل تۋرالى «ورتالىق ازيا - گەرمانيا» سامميتىنە قاتىسقان كورشىلەس ەلدىڭ پرەزيدەنتى شاۆكات ميرزيەۆ ءمالىم ەتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
«ورتالىق ازيا +» فورماتىنداعى مەملەكەت باسشىلارىنىڭ كەزدەسۋى ىنتىماقتاستىقتى نىعايتۋعا تىڭ سەرپىن بەرىپ كەلە جاتقانىن اتاپ ءوتتى.
«ءبىز اشىق ءارى ناتيجەگە نەگىزدەلگەن ديالوگ قۇردىق، شەكارا، سۋ، ەنەرگەتيكا، ساۋدا جانە ترانزيت باعىتىنداعى كوپتەگەن ماسەلەنى ءوز بەتىمىزشە شەشىپ كەلەمىز. سونداي-اق، «ورتالىق ازيا +» فورماتى اياسىندا الەمنىڭ جەتەكشى ەلدەرىمەن ءوزارا ءىس-قيمىلدى تەرەڭدەتە تۇستىك. ءبىزدىڭ ايماقتىڭ ەرتەڭى، ونىڭ قاۋىپسىزدىگى مەن تۇراقتى دامۋى تەك ءبىزدىڭ ساياسي ەرىك-جىگەرىمىزگە بايلانىستى ەكەنىن انىق بىلەمىز»، - دەپ توقتالدى وزبەكستان پرەزيدەنتى.
شاۆكات ميرزيەۆتىڭ سوزىنشە، كەلەر جىلى وزبەكستان «ورتالىق ازيا-ەۋرووداق» فورماتىنداعى كەزەكتى سامميتتى قابىلداماق.
«ءبىز كەلەسى جىلى وزبەكستاندا «ورتالىق ازيا - ەۋرووداق» فورماتىنداعى كەزەكتى سامميتتى وتكىزۋگە دايىندالىپ جاتىرمىز. ول ءوڭىردىڭ بولاشاعى ءۇشىن ينۆەستيتسيا تارتۋ تاقىرىبىنا ارنالماق»، - دەپ ءمالىم ەتتى ش. ميرزيەۆ.
ەسكە سالايىق، بۇگىن استانادا «ورتالىق ازيا - گەرمانيا» سامميتى ءوتتى.
اۆتور
ءاليحان اسقار
