كەلەر جىلدارى بالالاردىڭ شوتىنا اۋدارىلاتىن قاراجات وسەدى

استانا. KAZINFORM – ق ر قارجى ۆيتسە-ءمينيسترى داۋرەن تەمىربەكوۆ «ۇلتتىق قور - بالالارعا» جوباسى اياسىندا بالالاردىڭ شوتىنا اۋدارىلاتىن قاراجاتقا قاتىستى تۇسىنىك بەردى.

بۇگىن سەناتتا تىلشىلەر ۆيتسە-مينيستردەن بۇعان دەيىن 18 جاسقا تولماعاندارعا 150-160 دوللار تۇسەتىنى ايتىلعانىن جانە نەلىكتەن قازىر 100 دوللاردان ءتۇسىپ جاتقانىن سۇرادى.

ءوز كەزەگىندە قارجى ۆيتسە-ءمينيسترى داۋرەن تەمىربەكوۆ وسىعان دەيىنگى ەسەپتەۋلەر بويىنشا 160 دوللار ءتۇسۋى ءتيىس ەكەنىن راستادى.

«2022 -جىلعى پرەزيدەنت ءتيىستى تاپسىرما بەردى. سول ۋاقىتتاعى ەسەپتەۋگە سايكەس، ول كەزدە بالالاردىڭ سانى 6 ميلليون 400 مىڭ بولاتىن. قازىر ەلىمىزدەگى بالالاردىڭ سانى 6 ميلليون 900 مىڭنان استى. ءبولىنىپ جاتقان قاراجاتتىڭ سوماسى 695 ميلليون دوللارعا جەتتى. وسى سومانى 6 ميلليون 919 مىڭ 131 بالاعا بولسەك، سوندا 100 دوللار 52 سەنت شىعادى. كەلەر جىلدارى بولىنەتىن قاراجات ارتا تۇسەدى»، - دەدى د. تەمىربەكوۆ.

سونىمەن قاتار ۆيتسە- مينيستر 18 جىل ىشىندە بالانىڭ ەسەپ شوتىندا 3,5 مىڭ دوللار جينالاتىنىن ايتتى.

«قازىر ءتۇسىپ جاتقان 100 دوللارعا ينۆەستيتسيالىق كىرىس قوسىلادى. بۇل قاراجات ەسەپ شوتتا قۇر جاتپايدى. ال بيىل 18 جاسقا تولاتىن بالالاردا 100 ا ق ش دوللارىن بۇگىننەن باستاپ ءتيىستى ماقساتتا پايدالانا الادى»، - دەدى ول.

اۆتور

رۋسلان عابباسوۆ