كەلەر جىلدان وزبەكستانداعى سيركتەردە جابايى جانۋارلاردى پايدالانۋعا تىيىم سالىنادى

تاشكەنت. KAZINFORM - وزبەكستاننىڭ مينيسترلەر كابينەتى كەلەر جىلدىڭ 1 -قاڭتارىنان باستاپ ۇيدە ۇستاۋعا جانە سيرك قويىلىمدارى ءۇشىن پايدالانۋعا تىيىم سالىناتىن جابايى جانۋارلاردىڭ ءتىزىمىن بەكىتتى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

قۇجاتقا ساي، تىزىمگە ورمەكشى، جىلان، اكۋلا جانە تاسباقالاردىڭ كەيبىر تۇرلەرى ەنگەن. بۇل رەتتە جولبارىس، ارىستان، تۇلكى، قاسقىر، شيمپانزەلەردىڭ بارلىق ءتۇرىن ۇيدە ۇستاۋعا جانە سيركتە پايدالانۋعا تىيىم سالىنادى.

تىزىمدەگى جانۋارلاردى ەكولوگيا مينيسترلىگىنىڭ رۇقساتى نەگىزىندە حايۋاناتتار باعىندا جانە ارنايى جاساقتالعان ورىنداردا (تەرراريۋم، وكەاناريۋم جانە تاعى دا باسقا) ۇستاۋعا بولادى.

وزبەكستان ۇكىمەتىنىڭ قاۋلىسىنا ساي، تىزىمگە ەنگەن جانۋارلاردى ارنايى ورىندارعا تابىستاۋ، ورنالاستىرۋ 2026 -جىلدىڭ 1 -قاڭتارىنا دەيىن اياقتالۋى ءتيىس.