«كەشىرمەيمىن، بالاڭ جاۋاپ بەرەدى»: قارجاۋباي نۇرىموۆ كيكىلجىڭ قالاي باستالعانىن ايتتى

تالدىقورعان. KAZINFORM - جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ عيماراتىندا شەرزات پولاتتىڭ ولىمىنە بايلانىستى سوت وتىرىسى ءوتىپ جاتىر.

سوت وتىرىسىندا شەرزاتتىڭ اكەسى قارجاۋباي نۇرىموۆ جابىرلەنۋشى رەتىندە ءسوز سويلەدى. ونىڭ ايتۋىنشا، 3 -قازان كۇنى ول جۇمىستان كەيىن دۇكەنگە بارىپ، جالعىز ءوزى ساۋدا جاساعان. كەشكى ۋاقىتتا دارحان اسكەنتاي كەلىپ، سىرا سۇراعان. ساتۋشى مەن ساتىپ الۋشى اراسىندا تولەمگە بايلانىستى تۇسىنبەۋشىلىك بولعان.

- دارحان كەلدى. ەكەۋمىزدىڭ ارامىزدا ەشقانداي ۇرىس-كەرىس بولعان جوق. تاعى 1-2 جىگىت كەلدى. سول ارالىقتا دارحان سىرا سۇرادى. مەن 23:00- دەن كەيىن سىرا ساتپايمىز دەپ ەسكەرتتىم. ءوتىنىپ قويماعاننان كەيىن بەردىم. ول بىرەۋگە حابارلاسىپ، اقشا اۋداردى، ونى WhatsApp-تان كورسەتتى. ول قالتايەۆا دەپ كورسەتتى. مەن سۆەتلانادان ءتۇستى دەدىم. ول ءوزى ونى تۇسىنگەن جوق. ءبىراق سول جەردە ەسەپتەسىپ شىعىپ كەتكەن. ول ماس بولدى، ىشىمدىكتىڭ ءيىسى شىعىپ تۇردى. سوندىقتان كوپ سالعىلاسپاي جىبەرە سالعىم كەلدى، - دەدى ول.

قارجاۋباي نۇرىموۆ ساۋدا جاسالعاننان كەيىن بالاسى شەرزات كەلگەنىن اتاپ ءوتتى. ايتۋىنشا، ول تەلەفونىن قۋاتتاعىشقا قويىپ، دۇكەندە دوسىن شىعارىپ سالۋ ءۇشىن قالعان. سول ارادا د. اسكەنتاي دۇكەنگە قايتا كەلگەن.

- دارحان قايتا اينالىپ كىردى. ارامىزدا تاعى دا اڭگىمە بولدى، تەلەفونىن قۋاتتاعىشقا قويىپ بەردىم. سونى بالا ەستىپ قالدى. سوسىن الدىمەن دارحان، ونىڭ ارتىنان بالا دالاعا شىقتى. تەرەزە اشىق بولاتىن، ەكەۋىنىڭ داۋىس كوتەرىپ سويلەسىپ جاتقانىن ەستىپ، شىعام دەگەنشە بالا ۇرىپ جىبەردى. ەكەۋىن اجىراتىپ، بالاما ەسكەرتۋ جاسادىم. دارحاننان كەشىرىم سۇرادىم. مەن سىرتتاي تانيتىنمىن، ءبىزدىڭ اۋىلدا اعامنىڭ دوسى بار، بۇل سونىڭ بالدىزى ەكەن. «ءجۇر اۋرۋحاناعا اپارايىن، اقىڭدى تولەيىن، بولماسا ىشىمدىگىڭدى بەرەيىن» دەپ ايتتىم. ول «كەشىرمەيمىن، بالالاردى شاقىرامىن، بالاڭ جاۋاپ بەرەدى، دەنساۋلىعىن قويىپ تاستايدى» دەدى، - دەپ ەسكە الدى جابىرلەنۋشى.

ونىڭ ايتۋىنشا، د. اسكەنتاي دۇكەن ارتىنا كەتىپ، الدەبىرەۋلەرگە تەلەفون ارقىلى حابارلاسقان. ال قارجاۋباي نۇرىموۆ ءىنىسى نۇرقاناتتى شاقىرعان.

- ءبىرىنشى نۇربول كەلدى، ول ماس ەكەن. كولىكتە جاس جىگىت بولدى. «كىم سوقتى» دەگەن اڭگىمەلەر بولدى. مەن بالاعا اشۋلانباسىن دەپ «مەن ۇردىم» دەدىم. نۇربول «تانىمايسىڭدار ما، مەن نۇربولمىن، حۋتورسكي» دەپ ايتتى. سوسىن «دارحان جەتىم بالا عوي، نەگە ۇراسىڭدار» دەپ ەسكەرتتى. تۇسىندىرگەننەن كەيىن ۇشەۋى كەتكەن سەكىلدى بولدى. ءبىراق 5-10 مينۋتتا قايتا اينالىپ كەلدى. تولەم تۋرالى سۇرادى، مەن ءتۇسىندىردىم. نۇربول تولەم جاسادى دا، كاسسا جاققا قاراي ءوتىپ كەتتى. دورەكى سويلەدى. مەن نۇربولعا تيىسكەم جوق. دۇكەندە ماي كەسەتىن پىشاق بولدى. سونى دالاعا الىپ شىعىپ دارحانعا باردىم. ول نۇربولعا دۇرىس ەمەس اقپارات بەرىپ تۇر عوي. بالام مەن نۇرقانات اجىراتىپ الدى. «كەشىرىم سۇرادىق، نە قالاپ تۇرسىڭ؟ دەنساۋلىعىن قويىپ تاستايدى دەگەن نە اڭگىمە» دەدىم. سوسىن كولىكتەن جاس بالا (د. ىسقاق) كەلدى، وعان ءتۇسىندىردىم، ول ساۋ بولدى. ول نۇربولعا ءمان-جايدى ءتۇسىندىردى. كەتكەن بولدى دا، تاعى اينالىپ كەلدى، - دەدى قارجاۋباي نۇرىموۆ.

ايتۋىنشا، سوتتالۋشىلار كەتكەن ساتتە نۇرقانات، شەرزات ۇشەۋى دۇكەن ىشىندە سويلەسكەن. نۇرقانات عايىپبايەۆ دۇكەندى جاۋىپ كەتۋگە قارسى بولعان. سەبەبى سوتتالۋشىلار ۇيلەرىنە بارادى دەپ كۇدىكتەنگەن. وسى وقيعالاردان كەيىن «قاماجاي» دۇكەنىنە بىرنەشە كولىك كەلىپ، ارتى قايعىلى وقيعاعا ۇلاسقان.

ەسكە سالايىق، بىلتىر 4-قازان كۇنى توبەلەستەن 16 جاستاعى جاس ءوسپىرىم قايتىس بولعانىن جازعان ەدىك.

2024 -جىلدىڭ 12 -قازانىندا قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

2024 -جىلدىڭ جەلتوقسان ايىندا تالعار ماڭىندا شەرزاتتىڭ اعاسى ءولى تابىلدى.

بيىل اقپان ايىندا شەرزات ىسىنە قاتىستى قىلمىستى تەرگەۋ اياقتالدى. قىلمىستىق ءىس 62 تومنان تۇرادى. تەرگەۋ بارىسىندا 40 سوت ساراپتاماسى جۇرگىزىلىپ، شامامەن 200 كۋاگەردەن جاۋاپ الىنعان.

اۆتور

دوسبول اتاجان