كەشكى التىدان كەيىن تاماق ىشپەگەن دۇرىس پا

الەۋمەتتىك جەلىلەردە ساعات 18:00-دەن كەيىن تاماق ىشپەۋگە كەڭەس بەرىلگەن حابارلاما تارادى. وندا مۇنداي ديەتا سالماقتى ازايتىپ قانا قويماي، ساۋىعۋعا كومەكتەسەتىنى ايتىلعان. Stopfake.kz بۇل اقپاراتتىڭ جالعان ەكەنىن ءمالىم ەتتى، دەپ حابارلايدى قازاقپارات.

 pixabay.com
Фото: pixabay.com

«18:00-دەن كەيىنگى تاماقتانۋ وتە زياندى جانە ارتىق سالماقتىڭ تەز وسۋىنە اكەلەدى دەگەن تەوريانىڭ عىلىمي نەگىزى جوق جانە 23:00-دە جاتىپ، 6:00-دە تۇراتىن قاراپايىم ادامنىڭ «كلاسسيكالىق» كۇن تارتىبىنە سۇيەنەدى. قازىردىڭ وزىندە ەسكىرگەن جانە جوققا شىعارىلعان تەورياعا سايكەس، وسى رەجيمدە سوڭعى رەت ساعات 18:00-دە تاماقتانۋ ارقىلى 12 ساعات بويى اش ءجۇرۋ كەزەڭى قالىپتاسادى. بۇل سالماق جوعالتۋعا ىقپال ەتەدى ەكەن. شىندىعىندا، بىرىنشىدەن، تاماق ءىشۋ مەن اش ءجۇرۋ ارقىلى سالماق جوعالتۋعا بولاتىنىنا عىلىمي نەگىز جوق. ەكىنشىدەن، ەگەر ادام 23:00-دە ەمەس، 2:00-دە جاتىپ، 10:00-دە تۇرسا، وندا 18:00-دەن باستاپ اش ءجۇرۋدىڭ ەشقانداي پايداسى جوق»، - دەپ جازىلعان حابارلامادا.

سونىمەن قاتار عالىمدار سالماق جوعالتۋ ءۇشىن ساعاتتى ەمەس، كالوريانى ەسەپتەگەن ءجون دەگەن قورىتىندىعا كەلدى. نۋتريتسيولوگتاردىڭ پىكىرىنشە، اقۋىزدار، مايلار جانە كومىرسۋلار اراقاتىناسىن ساقتاي وتىرىپ، ءار ەكى- ءتورت ساعات سايىن تۇراقتى تاماقتانعان دۇرىس. بۇل رەتتە تاعام تاۋلىك ۋاقىتىنا قاراماستان بىردەي قورىتىلادى.

«18:00-دەن كەيىن تاماقتان باس تارتۋ اعزانىڭ ساۋىعۋىنا ىقپال ەتەتىنىنە عىلىمي دالەل جوق. كەرىسىنشە، مۇنداي قاتاڭ شەكتەۋلەر تاماقتانۋ ءتارتىبىنىڭ بۇزىلۋىنا، «رۇقسات ەتىلگەن» ۋاقىتتا شامادان تىس تاماقتانۋعا جانە بۇزىلۋلارعا اكەلۋى مۇمكىن. ولاي بولسا، دەنساۋلىقتى جاقسارتۋ جانە ارتىق سالماقتان ارىلۋ ءۇشىن كەشكى التىدان كەيىن تاماق ىشپەۋ بويىنشا كەڭەس نەگىزسىز»، - دەلىنگەن حابارلامادا.

اۆتور

ەلميرا ورالبايەۆا

سوڭعى جاڭالىقتار