كەدەي ەلدە بالا كوپ: دامۋ ما، داعدارىس پا؟

جاپونيادا كەيىنگى ءبىر جىلدا ەڭبەككە جارامدى ادام سانى 230 مىڭعا كەمىدى. قازىر مۇنداعى حالىقتىڭ 29 پايىزى - قارت كىسى. سوندىقتان جۇمىس كۇشى ازايدى. كولىك، ەلەكترونيكا سالاسىندا مامان تاپشى.

بۇلاي كەتە بەرسە، كۇنشىعىس ەلى الەمنىڭ ەڭ ءىرى ەكونوميكالارىنىڭ ءبىرى دەگەن اتاۋدان الىس قالاتىن ءتۇرى بار. قازىر جاپوندار بالا باعۋدان دا قاشادى. تۋۋ كورسەتكىشى ەڭ تومەن مەملەكەتتەردىڭ ءبىرى. بىلتىر 125 ميلليون ازاماتى بار مەملەكەتتە 800 مىڭعا جەتەر-جەتپەس قانا ءسابي دۇنيەگە كەلگەن. بۇعان الاڭداعان ءىرى كومپانيالار كەڭسەلەردە بالالار بولمەسىن جاساقتاپ، بۇلدىرشىندەرگە دە قارايلاساتىن ارنايى قىزمەتكەرلەردى دە جۇمىسقا تارتا باستاعان.
كارى قۇرلىقتا قارتتار كوپ
ەۋروپالىقتار دا ءسابي سۇيگەننەن كورى مانساپتى ءتاۋىر كورەدى. ونىڭ ۇستىنە قىمباتشىلىق بار. بالانى باعىپ- قاعۋدىڭ ماشاقاتى، ودان قالدى شىعىنىنان قاشادى كوبى. يتاليادا بىلتىر حالىق سانى 1,7 پايىزعا كەمىدى. بۇل بۇرىن سوڭدى بولماعان مينيمۋم. 1861 -جىلدان بەرى مۇنداي داعدارىس وسىمەن 14- رەت قايتالانعان. وعان تۋۋ كورسەتكىشىنىڭ تومەندەۋى سەبەپ. ونىڭ ۇستىنە ەۋرووداقتىڭ ءاربىر بەسىنشى تۇرعىنى 65-ءتى القىمداعان قاريا. مۇنداي جاسى 80-نەن اسقان تۇرعىندار يتاليا، گرەكيا، گەرمانيا، پورتۋگاليا مەن فرانسيادا كوپ.
كەدەي ەلدە بالا كوپ
2050-جىلعا قاراي الەم حالقىنىڭ تورتتەن ءبىرى افريكالىقتار بولۋى ابدەن مۇمكىن. 130 جىل بۇرىن مۇنداعى ادام سانى 140 ميلليون بولسا، قازىر ءبىر ميللياردتان استى. ءتىپتى قۇرلىققا سىيماي، حالىقتىڭ ءبىرازى شەت ەل اسىپ، بوسقىنعا اينالعان. ويتكەنى بۇل ەلدە كەدەيلىك كەبىن كيگەندەر كوپ. ءبىلىم ساپاسى ناشار. مەديتسينا مۇلدەم دامىماعان. سوندا حالىق قالاي كوبەيىپ جاتىر.
ءبىر عانا نيگەر ەلىن الايىق. مۇندا قىز بالالاردىڭ 76 پايىزى 18-گە جەتپەي، تۇرمىس قۇرادى. ءبىر ايەلدىڭ ەڭ تومەنگى تۋۋ كورسەتكىشى - 7 بالا. ءتىپتى جاقىندا عانا 70-كە كەلگەن كەيۋانا، ەگدە تارتقان شاعىندا ەگىز بوسانىپ، قارا قۇرلىقتاعى قارت انا اتاندى. وسىعان دەيىن، 74 جاسىندا دۇنيەگە ءسابي اكەلگەن ءۇندىستاندىق اجەي رەكورد ورناتىپ ەدى.
سافينا نامۋكۆايا، 70 جاستاعى انا:
- ەكى بىردەي ەگىزدى اسىرايتىنداي تۇرمىسىم كەرەمەت دەپ ايتا المايمىن. ءتىپتى جۇمىس ىستەۋگە قاۋقارىم دا جوق. قارتايسام دا، قاتتى ءسابيلى بولعىم كەلدى.
كوش باسىندا ءۇندىستان
ءۇندىستان دەمەكشى، كەدەي ەلدەر ىشىندە بۇل ەل دە بار. ءشاي مەن ءپىلدىڭ وتانى - الەم بويىنشا حالىق سانى ەڭ كوپ مەملەكەت ەكەنى بەلگىلى. قىتايدىڭ ءوزىن باسىپ وزىپ، ءبىرىنشى ورىنعا شىقتى. مۇنداعى حالىق سانى - 1428627663. مىنەكي ءبىزدىڭ ەل كەدەي بولساڭ كوشىپ كور دەۋشى ەدى. ال ءۇندى جۇرتى بالا-شاعاسىنىڭ كوپتىگىمەن ماقتانادى. تۇرمىس تاۋقىمەتىنە مويىپ جاتقان ەشكىم جوق ءسىرا؟!
www.24.kz