كەدەي كۇش ىستەتەدى، باي كۇشتى ىستەتەدى

استانا. قازاقپارات - باياعى وتكەن زاماندا، دۇنيەنىڭ الىس ءبىر تۇكپىرىندە ءبىر كەدەي كىسى ءومىر ءسۇرىپتى. اۋىزى اسقا، ءيىنى كيىمگە جارىماپتى.

ول ءوزىنىڭ ءومىرىنىڭ وسىنشاما قيىن بولعانىنا ۇنەمى نالىپ، نالەت ايتىپ جۇرەدى ەكەن. كۇندە تاپقانى ەرتەڭگى كۇنىنە جەتپەي، زار شەگىپ بىلاي دەپتى: «بۇل قوعام وتە ادىلەتسىز، نە ءۇشىن بايلار كۇن سايىن سايران سالىپ تۇك جۇمىس اتقارمايدى، ال ءبىز كەدەي بايقۇستار تىنىم الماي ەڭبەك ىستەۋىمىز كەرەك؟».

ونىڭ مۇڭ-زارى جاراتۋشىنىڭ نازارىنا ىلىگىپتى.

جاراتۋشى ودان: «قالاي ىستەگەندە سەن تەڭدىكتى سەزىنەسىڭ؟» دەپ سۇراپتى.

الگى كەدەي ادام: «كەدەي ادام مەن باي ادام بىردەي بولۋى كەرەك، بىردەي جۇمىس اتقارۋى كەرەك، ەگەر باي ادام سول دەڭگەيدە تۇرىپ بايىپ كەتسە مەن وسى زارلاۋىم مەن قارعاۋىمدى قويامىن!» دەپ ۋادە بەرىپتى.

سودان، باي مەن كەدەي ماڭدايىنا تاۋدىڭ الىس تۇكپىرىندەگى كومىر كەنىنەن جالاڭ قولدارىمەن ۇلكەن جۇك كولىگىنە كومىر تيەپ، بازارعا اپارىپ ساتۋ نەسىبى بۇيىرىپتى. ولار تاۋدىڭ ءبىر بۇرىشىنا تۇرىپ الىپ قازۋدى باستاپتى. كەدەيدىڭ جۇمىس ىستەۋى تىم ەبدەيسىز، قوپال ەكەن. اۋزى دا بوقتىقتان بوساماپتى.

ءبىراق، ول ءوز جۇك كولىگىن تەز ارادا تولتىرىپ ۇلگەرىپتى. بازارعا قاراي بەت العان كەدەي ىشىنەن ماساتتانىپ: «كور دە تۇر، مەن سەنەن اسىپ كەتەمىن!» دەپتى. كومىردىڭ اقشاسىنا ءدامدى اس، جىلى كيىم ساتىپ الىپ ءۇي-ءىشىن قارق قىلۋدى جوسپارلاپتى.

باي كىسى جاي كۇندەرى مۇنداي اۋىر جۇمىستى كوپ ىستەمەگەندىكتەن التى ايرىعىنان تەر اعىپ، كەش باتا ۇلكەن كولىكتى زورعا تولتىرىپتى. ءبىر اربا كومىرىن بازارعا اپارىپ ساتىپ، وزىنە تيەسەلى استى عانا الىپ، كەن باسىنا قايتىپ كەلىپتى.

ونىڭ قالتاسىندا ءبىراز اقشا ارتىلىپ قالىپتى. ەكىنشى كۇن بولعاندا كەدەي كىسى سول باياعى اۋەنىمەن جالعىز ءوزى كومىر قازۋعا كىرىسىپتى. ال، باي ادام بىردەن بازارعا كەتىپتى. كوپ وتپەي الگى كەدەي كىسى سياقتى ەكى ادامدى الىپ كەلىپ، كەشەگى تاپقان اقشاسىن سول ەكەۋىنە ءبولىپ بەرىپ، كومىر تيەتىپ قويىپتى.

بۇل ەكى ادام ءماز بولىپ، كەش باتقانشا باي ادامنىڭ جۇك كولىگىن 4-5 رەت تولتىرىپ بەرىپتى. باردام كىسى بۇل ەكى ادامعا ەڭبەك اقىلارىن ارتىعىمەن تولەۋدەن سىرت، ءوز قالتاسىندا دا مولىنان قارجى ءتۇسىپتى. ول وسىلاي جارتى جىل قىزمەت اتقارىپ شالقىعان بايعا اينالىپ شىعا كەلىپتى.

ۋاقىت وتە كەلە، وسىنى تۇسىنگەن اۋەلگى كەدەي كىسىمىز ءوز تاعدىرىنا نالىپ، قوعامدى كىنالاي بەرۋىن قويىپتى دەيدى.

massaget.kz