كاتونقاراعايداعى مال ۇرلىعى قالايشا ءماجىلىس مىنبەرىنە دەيىن جەتتى

وسكەمەن. KAZINFORM - شىعىس قازاقستان وبلىسى كاتونقاراعاي اۋدانىنداعى شىڭعىستاي اۋىلىنىڭ شىرقى كەتىپ تۇر. مال ۇرىلارىنىڭ مازا بەرمەي، توسكەيدەگى ءتورت تۇلىككە قىرعيداي تيۋ حالىقتى ابدەن قيناپ، ءبىر تارىنىڭ قاۋىزىنا سىيعىزعان.

ауыл
Фото Шыңғыстай ауылы тұрғындарынан

«باۋكەسپەلەرگە توقتاۋ بولماي تۇر»

تابيعاتتىڭ بار تاماشاسىن بويىنا سىڭىرگەن كاتونقاراعاي اۋدانىنىڭ بۇل اۋىلى دا تۋريستەر كوپتەپ كەلەتىن جەر.

سەبەبى شىڭعىستاي - قالامنىڭ قۇدىرەتىن، ءسوزدىڭ قاسيەتىن پاش ەتكەن قازاقتىڭ كلاسسيك جازۋشىسى ورالحان بوكەيدىڭ كىندىك قانى تامعان مەكەن.

الايدا بۇگىندە اۋىل ءىشى تولقىپ، حالىق اشۋعا بۋلىعىپ تۇر. وعان سەبەپ - مال ۇرلىعىنىڭ تىيىلماۋى.

- اۋىلدا 2013 -جىلدان بەرى مال ۇرلىعى بەلەڭ الىپ كەتتى. بۇرىن مال يەسى مەن ۇرى ءبىر-بىرىمەن تاتۋلاسىپ، ءىستى پوليتسياعا جەتكىزبەيتىن. وسىلاي ۇرى-قارىلار كوبەيىپ، قۇنىعا بەردى. سوندىقتان ءدال بيىل عانا ۇرلىق ءورشىپ كەتتى دەۋگە كەلمەس. ودان كەيىن حالىق اراسىندا پوليتسيانىڭ ءىستى تىركەمەيتىنىن ايتىپ جاتقاندار بار. ءسويتىپ، ابدەن اشىنعان حالىق جانايقايىن پرەزيدەنتكە ۇندەۋ رەتىندە جەتكىزۋگە ءماجبۇر بولدى، - دەيدى اۋداندىق ارداگەرلەر كەڭەسىنىڭ ءتوراعاسى جانىبەك قىزىر.

ауыл
Фото Шыңғыстай ауылы тұрғындарынан

شىڭعىستايلىق قوجاقان نۇرساپاروۆتىڭ ايتۋىنشا، وتكەن جىلدىڭ تامىز ايىندا ءبىر سيىرى مەن ءبىر بۇزاۋى جوعالعان. ال ونىڭ الدىڭعى جىلى 12 جىلقىسى ءىزىم-عايىم جوعالىپ، سول كۇيى تابىلمادى.

-ءتارتىپ ساقشىلارىنا تالاي باردىق. الايدا ەش ناتيجە جوق. ولارعا دەگەن ءۇمىت ءۇزىلدى. «جاۋ الىستان شاپپايدى» دەمەكشى، ۇرىلار وسى اۋدان ىشىندە دەپ ويلايمىز. ەل اراسىندا ۇرلانعان مالدىڭ ەتى وسىنداعى ءدامحانالارعا ساتىلعان دەگەن دە سىبىس بار، - دەيدى اۋىل حالقى.

جانىبەك قىزىردىڭ ايتۋىنشا، ءبىرلى-ەكىلى ۇرلانعان مالدىڭ ەسەبى جوق. ياعني، ءتورت-تۇلىكتىڭ سۇمەسىن قورەك ەتىپ وتىرعان جۇرت اراسىندا ۇرىمتال ءساتتى اڭدىعان ۇرىلاردىڭ كەسىرى ءتيىپ، كەساپاتىن سەزبەگەندەر نەكەن-ساياق.

- ابدەن باسىنعان ۇرىلار جىلقىلاردى ءۇيىر-ۇيىرىمەن اكەتىپ جاتىر. وسىعان توقتاۋ سالۋ كەرەك قوي! تەك شىڭعىستاي ەمەس، ورنەك، جاڭا ۇلگى، اققاينار، جامبىل، ەڭبەك اۋىلدارىنىڭ تۇرعىندارى دا باۋكەسپەلەردەن زارداپ شەگىپ وتىر، - دەيدى اۋداندىق ارداگەرلەر كەڭەسىنىڭ ءتوراعاسى.

ارنايى رەيد جۇرگىزىلۋى ءتيىس

بارا جاتقاننىڭ بالتاسىن، كەلە جاتقاننىڭ كەتپەنىن قويماعان شىڭعىستايلىق ۇرىلار جايلى ماسەلەنى تاياۋدا مىنبەردەن پارلامەنت ءماجىلىسىنىڭ دەپۋتاتى ماقسات تولىقبايەۆ تا كوتەردى.

- اۋىلداعى جۇرت ازىن-اۋلاق مالىنىڭ ارقاسىندا كۇن كورىپ، جان باعىپ ءجۇر. ءبىراق ەلدەگى بۇقارا باۋكەسپە ۇرىلاردان ابدەن زارە-ءزاپ بولىپ، پرەزيدەنتتەن كومەك سۇراۋعا ءماجبۇر. شىعىس قازاقستان وبلىسى قاتونقاراعاي اۋدانى تۇرعىندارىنىڭ الەۋمەتتىك جەلىگە شىققان ۆيدەو ۇندەۋلەرىن كورگەن شىعارسىزدار؟ شىڭعىستايدىڭ شىرقىن وسى ۇرىلار بۇزىپ ءبىتىردى. الاقانداي اۋىل حالقىنا ۇرى-قارىنىڭ قورلىعى ابدەن وتكەن. اۋرە سارساڭعا تۇسكەن حالىق اۋداندىق، وبلىستىق ىشكى ىستەر ورگاندارىنىڭ تابالدىرىعىن توزدىرىپ، باستارىن تاۋعا دا، تاسقا دا سوعىپ ابدەن قاجىعان، - دەدى دەپۋتات.

ءوز سوزىندە ول ىشكى ىستەر ءمينيسترى ەرجان سادەنوۆكە بۇل ماسەلەنى ءجىتى قاداعالاپ، قاتونقاراعاي اۋدانىندا ارنايى رەيد جۇرگىزىپ، مال ۇرلىعىنىڭ الدىن الۋ مەن ۇرىلاردى ۇستاۋ بويىنشا كەشەندى شارالاردى قولعا الۋدى سۇرادى.

قىلمىستىق ءىس قوزعالدى

Kazinform رەداكسياسىنىڭ رەسمي ساۋالىنا جاۋاپ بەرگەن ش ق و پوليتسيا دەپارتامەنتىنىڭ باستىعى ەرلان وماربەكوۆ كاتونقاراعاي اۋدانىنىڭ پوليتسيا بولىمىندە 2024 -جىلى مال ۇرلىعى بويىنشا 4، ال وسى جىلدىڭ باسىنان بەرى 3 قۇقىق بۇزۋشىلىق تىركەلگەنىن ءمالىم ەتتى.

- شىڭعىستاي اۋىلى تۇرعىندارى بيىلعى قاڭتار ايىندا 2003-2024 -جىلدار ارالىعىندا 13 باس جىلقى جانە 7 باس ءىرى قارا مالىنىڭ ۇرلانعانى جونىندە 12 ارىز جازىپ، سول بويىنشا 1 قىلمىستىق ءىس تىركەلگەن. قازىرگى ۋاقىتتا ءىستىڭ ءمان-جايى جان-جاقتى جانە تولىق جۇرگىزىلۋىن قامتاماسىز ەتۋگە، قىلمىستى اشۋعا باعىتتالعان قاجەتتى تەرگەۋ امالدارى قولعا الىنعان، - دەدى ول.

تەرگەۋ بارىسى دەپارتامەنت باسشىلىعىنىڭ باقىلاۋىندا. اۋداندا جەدەل تەرگەۋ توبى جۇمىس ىستەپ جاتىر.

ерлан омарбеков
Фото: ШҚО ПД

- تۇرعىنداردىڭ بارلىق ءوتىنىشى مۇقيات تەكسەرىلەدى. جالپى وبلىس بويىنشا جىل سايىن مۇلىكتى قورعاۋ جونىندەگى ۆەدومستۆولىق باعدارلاما شەڭبەرىندە مال ۇرلىعىنا قارسى ءىس-قيمىل ماقساتىندا پروفيلاكتيكالىق جانە جەدەل-ىزدەستىرۋ شارالارى جۇرگىزىلەدى. سونداي-اق مال ۇرلىعىنىڭ الدىن الۋ ماقساتىندا مال جايۋ جانە ەت ونىمدەرىن ساتۋ ەرەجەلەرىنىڭ ساقتالۋىن باقىلاۋ بويىنشا تۇراقتى ءتۇرلى ءتيىستى شارالار وتكىزىلۋدە، - دەدى ەرلان وماربەكوۆ.

ەسكە سالساق، وسىعان دەيىن شىعىس قازاقستان وبلىسى زايسان اۋدانىندا ەر ادام ءوزى جۇمىس ىستەگەن قوجالىقتىڭ 20-عا جۋىق جىلقىسىن ۇرلاعانىن جازعانبىز.

اۆتور

تالعاتجان مۇحامەتبەك ۇلى

سوڭعى جاڭالىقتار