كاسپيدە ەكى اسكەري قىزمەتشىنى ىزدەۋ وپەراتسياسىنا جۇزدەگەن ادام جۇمىلدىرىلدى

ىزدەستىرۋ-قۇتقارۋ جۇمىستارىنا وقيعا ورنىندا تىكەلەي باسشىلىقتى قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆ جۇزەگە اسىرۋدا. قۇرىلعان جەدەل شتابتىڭ قۇرامىنا قورعانىس مينيسترلىگىنىڭ، ۇ ق ك شەكارا قىزمەتىنىڭ، توتەنشە جاعدايلار مينيسترلىگىنىڭ، ىشكى ىستەر مينيسترلىگىنىڭ، سونداي-اق ماڭعىستاۋ وبلىسىنىڭ جەرگىلىكتى اتقارۋشى ورگاندارىنىڭ وكىلدەرى كىردى.

ۆەدومستۆونىڭ مالىمەتىنشە، اۋقىمدى ىزدەستىرۋ-قۇتقارۋ وپەراتسياسىنا 252 اسكەري قىزمەتشى مەن قىزمەتكەر، 34 بىرلىك ارنايى جەر ءۇستى تەحنيكاسى، 37 اسكەري سۇڭگۋىر، 14 كەمە مەن كاتەر، سونداي-اق 4 تىكۇشاقتى قوسا العاندا، 20-دان استام اۋە كەمەسى جۇمىلدىرىلدى. ۆەدومستۆولاردىڭ كۇشتەرى مەن قۇرالدارىمەن سۋ ايدىنى، جاعالاۋ ايماعى جانە وعان ىرگەلەس اۋماقتار اۋەدەن ۇزدىكسىز باقىلانىپ، تەكسەرىلىپ جاتىر.

وقيعا فاكتىسى بويىنشا قىلمىستىق ءىس قوزعالدى. ارنايى كوميسسيا وقيعانىڭ بارلىق سەبەپتەرى مەن ءمان-جايلارىن انىقتاۋ ماقساتىندا تەرگەۋ ءىس-شارالارىن جۇرگىزۋدە. قازا بولعانداردىڭ وتباسىلارىنا جانە زارداپ شەككەن اسكەري قىزمەتشىلەرگە قاجەتتى ماتەريالدىق جانە پسيحولوگيالىق كومەك كورسەتىلەدى.

ەسكە سالايىق، 2026 -جىلعى 24-قىركۇيەكتە كاسپيدەگى اسكەري وقۋ-جاتتىعۋ كەزىندە 9 اسكەري قىزمەتشى قازا تاپقانىن حابارلاعانبىز. ءۇش اسكەري قىزمەتشى قۇتقارىلدى. ولاردىڭ بىرەۋى اۋرۋحاناعا جاتقىزىلدى.

كەيىننەن كاسپيدە قازا بولعان اسكەري قىزمەتشىلەردىڭ سانى 12-گە جەتىپ، ەكەۋى ىزدەستىرىلىپ جاتقانى حابارلاندى.

قورعانىس مينيسترلىگى وقۋ-جاتتىعۋ كەزىندە قازا تاپقان اسكەري قىزمەتشىلەردىڭ ءتىزىمىن جاريالادى.

اسكەري قىزمەتشىلەردىڭ قازا بولۋ فاكتىسى بويىنشا قىلمىستىق ءىس قوزعالىپ، تەرگەلىپ جاتقانىن جازدىق.