كارىم ءماسىموۆتىڭ ءزاۋلىم سارايى قايتا ساتىلىمعا قويىلدى

استانا. KAZINFORM - ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆكە تيەسىلى ءزاۋلىم ءۇي تاعى ساۋداعا شىعارىلدى.

- اۋكسيون اياسىندا استانا قالاسى، نۇرا اۋدانى، قاراوتكەل شاعىن اۋدانى، ەرەيمەنتاۋ كوشەسى، 1-قۇرىلىس مەكەنجايىندا ورنالاسقان جەرتولەسى بار تۇرعىن ءۇي ساتىلىمعا قويىلادى. نىسان بارلىق قاتىسۋشى ءۇشىن تەڭ قولجەتىمدىلىكتى قامتاماسىز ەتەتىن اشىق جانە باسەكەگە قابىلەتتى شارتتاردا جۇزەگە اسىرىلادى، - دەپ جازىلعان كومپانيانىڭ رەسمي سايتىندا.

ايتا كەتسەك، بيىل 10-اقپاندا كارىم ءماسىموۆتىڭ استاناداعى سارايى 1,8 ميلليارد تەڭگەگە ساتىلىمعا شىعارىلعان ەدى.

الايدا 25- اقپاندا وتكەن اۋكسيوندا كارىم ءماسىموۆتىڭ ءزاۋلىم سارايىن ەشكىم ساتىپ المادى.

ەسكە سالايىق، ۇ ق ك بۇرىنعى ءتوراعاسى كارىم ءماسىموۆ 2022 -جىلى 8 -قاڭتاردا ۇستالدى.

ۇ ق ك تاراتقان مالىمەت بويىنشا، ءماسىموۆتىڭ پرەمەر-مينيستر لاۋازىمىندا بولۋى كەزەڭىندە بيزنەس-قۇرىلىمنىڭ بىرىنەن استانادا قۇنى 2,5 ميلليارد تەڭگە ەليتالىق تۇرعىن ءۇي مەن جەر تەلىمىن الۋ فاكتىسى بويىنشا تەرگەۋ جۇرگىزىلدى.

اۆتور

داۋلەت ىزتىلەۋ