كانادادا جەمىس جينايتىن مامان تاپشى

استانا. KAZINFORM - جۇمىسشى قاي كەزدە دە سۇرانىسقا يە. اسىرەسە ماۋسىمدىق جيىن-تەرىنگە ادام قولى تاپشى. مىسالى ەۋروپا وزگە ەلدىڭ ازاماتتارىن جالداۋعا ءماجبۇر. كاناداڭىز دا قول جۇمىسىنا ءزارۋ.

بىلتىر مۇندا 3 ميلليون ميگرانت شەكارا اسىپ كەلگەن. ونىڭ جارتىسىنا جۋىعى ماۋسىمدىق جۇمىسقا شىقتى. ەندى بۇل ەلدەر تابىس تابۋ ءۇشىن شەكارا اسىپ كەلگەن ازاماتتارعا قانداي جاعداي جاساپ وتىر؟ جالدامالى جۇمىسشىلارعا تاعى قاي ەلدە سۇرانىس جوعارى؟

جيىن-تەرىن ماۋسىمىندا كانادادا جۇمىس كۇشىن تابۋ وتە قيىن. ويتكەنى جەمىس جيناۋ قول ەڭبەگىن قاجەت ەتەدى. ال جەرگىلىكتى حالىق مۇنداي جۇمىسقا قۇلىقسىز. سول سەبەپتى شارۋالار ماۋسىمدىق كادردى شەتەلدەن شاقىرادى. ۇكىمەت ۇسىنعان حالىقارالىق ەڭبەك باعدارلاماسىنا قاتىسۋ ءۇشىن 18 جاستان اسقان، ورتا ءبىلىمى بار، ءتىل بىلەتىن، تاجىريبەلى كەز-كەلگەن شەتەل ازاماتى ۆيزاعا ءوتىنىم بەرە الادى.

كومپانيالار جۇمىسشىنى جاتىن ورنى، تاماعىن بەرىپ تۇراقتى جۇمىسپەن قامتاماسىز ەتەدى. ال ءبىر جىلدىق جالاقى كولەمى بىزدىڭشە 15 ميلليون تەڭگە. بۇل ساعاتىنا 8 مىڭ تەڭگە شامالاس. جيىن-تەرىم جۇمىستارى كوكتەم، جاز، كۇز ايلارىندا قىزا تۇسەدى. ساۋىردە قۇلپىناي مەن شيە جيناۋ باستالادى. ال شىلدە-تامىز ايلارىندا ورىك، تاڭقۋراي، كوكجيدەك تەرۋ جالعاسادى. كۇز ايلارى - الما، المۇرت، ءجۇزىم جيناۋ ماۋسىمى. كاناداعا ادەتتە مەكسيكا، ورتالىق امەريكا جانە شىعىس ەۋروپا تۇرعىندارى جۇمىس ىزدەپ بارادى.

فينليانديادا جۇمىسشىلارعا سۇرانىس جوعارى

فينليانديادا شارۋالار تىنىم تاپپايدى. ويتكەنى مۇندا قىسى-جازى جەمىس جيناۋ جۇمىستارى توقتامايدى. فين بيلىگى جالدامالى مامانعا 3 ايدان 1 جىلعا دەيىن ماۋسىمدىق جۇمىس ۇسىنادى. تەك جەمىس تەرۋشى عانا ەمەس، تراكتورشى، سۋپەيۆايزەر سياقتى تەحنيكالىق كاسىپ يەلەرى دە سۇرانىسقا يە. ال ەڭبەكاقى جينالعان جەمىستىڭ كولەمىنە قاراي ەسەپتەلەدى. ءبىر كەلى قۇلپىناي ءۇشىن 1-1,2 ەۋرو، ياعني 550-660 تەڭگە كولەمىندە تولەم تولەيدى. ال قاپتاۋشىلاردىڭ ورتاشا جالاقىسى ساعاتىنا 6 مىڭ تەڭگە. تابىس كوزىن ىزدەۋشىلەردىڭ دەنى كورشى ەلدەردەن رۋمىنيا، پولشا، بولگاريادان ءجيى بارادى.

ءجۇزىم جيناۋعا جالدامالى جۇمىسشىلار تارتىلادى

ال كۇز ايلارىندا يسپانياعا كەلۋشىلەر قاتارى ارتادى. ويتكەنى بۇل ماۋسىمدا ءجۇزىم جيناۋ باستالادى. قول ەڭبەگىن قامتاماسىز ەتۋ ءۇشىن مۇندا كوبىنەسە مولدوۆالىقتار جالدانىپ جۇمىس ىستەيدى. ءجۇزىمنىڭ تۇرىنە قاراي تەرىم جۇمىستارى قيىنداي بەرەدى. ەسەسىنە جۇمىسشىنىڭ تاجىريبەسىنە قاراي تولەنەتىن اقى دا جوعارى بولادى. سونداي- اق كەي جۇمىس بەرۋشىلەر قاراماعىنداعىلاردىڭ تۇرعىن ءۇي، تاماق جانە كولىك شىعىندارىن دا قامتاماسىز ەتەدى. ولارعا ورتاشا ەسەپپەن ساعاتىنا 7-9 ەۋرو، شامامەن 4-5 مىڭ تەڭگە تولەنەدى. ال ءجۇزىم جيناۋ جۇمىستارى ءجيى جۇرگىزىلەتىن جەردە تولەم ءسال جوعارى بولۋى مۇمكىن.

مەلچور كاسا، جۇمىسشى:

- مىنە، كورىپ تۇرعاندارىڭىزداي ءبارى قول ەڭبەگىن قاجەت ەتەدى. جەمىستەر ءۇزىپ الۋ وڭاي بولماي تۇر. ال بۇعان تەحنيكانى قولدانۋ مۇمكىن ەمەس.

الگەيرا فەرناندو گونسالەس، شارۋا:

- ءجۇزىم شارۋاشىلىعى ۇزدىكسىز كۇتىمدى قاجەت ەتەدى. ال ونى تەرۋ جۇمىستارىنا كەز-كەلگەن ادام شىداي بەرمەيدى. تەك قىزىعۋشىلىعى بارلار عانا ماۋسىمدىق جۇمىسقا اتسالىسادى.

نيدەرلاندتا گۇل تەرۋ ساعاتىنا - 8 مىڭ تەڭگە

گۇل شارۋاشىلىعىمەن الەمگە تانىمال نيدەرلاندقا جىل سايىن ەكى قولعا ءبىر كۇرەك ىزدەگەن مىڭداعان شەتەل ازاماتى اعىلىپ كەلەدى. گۇلگە ورانعان ايماققا ساياحاتتاپ، ءارى تابىس تابۋ ءۇشىن وسىنداي قادامعا باراتىن شەتەلدىكتەردىڭ كوبى - پولشا، رۋمىنيا، بولگاريا ازاماتتارى. ولارعا ۇسىنىلاتىن جىلدىق ورتاشا جالاقى - شامامەن 17 ميلليون تەڭگە.

جيىن-تەرىن جۇمىستارىن قۇلتەمىر اتقارادى

بريتاندىق شارۋالار جيىن-تەرىن جۇمىستارىنا روبوت كومەكشىلەردى پايدالانا باستادى. جەرگىلىكتى Dogtooth كومپانياسى قۇراستىرعان قۇلتەمىر كۇنىنە 200 كەلىگە دەيىن قۇلپىناي جينايدى. سونداي-اق جەمىستىڭ تولىق ءپىسىپ-پىسپەگەنىن الدىن الا انىقتاي الادى. سەبەت تولعان كەزدە ونى جاۋاپتى مامانعا اۆتوماتتى تۇردە حابارلايدى. فەرمەرلەردىڭ ايتۋىنشا قاراپايىم حالىق قول كۇشىن قاجەت ەتەتىن ۇساق جۇمىستاردى ىستەگىسى كەلمەيدى. سول سەبەپتى ادامداردى روبوتپەن اۋىستىرۋعا ءماجبۇر.

دۋنكان روبەرتسون، Dogtooth كومپانياسىنىڭ باس ديرەكتورى:

- بۇعان دەيىن ءبىز مامانداردى پولشا، رۋمىنيا، بولگاريا، مولدوۆادان الدىراتىنبىز. قازىر بۇل ايماقتاردان جۇمىسشى شاقىرۋ قيىنعا سوعىپ وتىر. سول سەبەپتى ماۋسىمدىق جۇمىستارعا سوناۋ وزبەكستان مەن قارا قۇرلىقتاعى ۋگاندادان ادام شاقىرۋعا ءماجبۇرمىز. ءبىراق بولاشاقتا ادامنىڭ ورنىن ءبىرىڭعاي قۇلتەمىرمەن اۋىستىرماقپىز. ويتكەنى تەمىر كومەكشىگە ۆيزانىڭ كەرەگى جوق. تۇرمىستىق قاجەتتىلىككە ءزارۋ ەمەس.

شەتەلدە ەڭبەك ەتۋ بۇگىندە تاڭداۋ ەمەس، قاجەتتىلىككە اينالىپ بارادى. جۇمىس ىزدەۋ ءۇشىن وزگە ەلگە اتتاناتىن قازاقستاندىقتار دا بار. ۇلتتىق ستاتيستيكا بيۋروسىنىڭ مالىمەتىنە سايكەس 2023 -جىلى 13 مىڭنان استام وتانداسىمىز جۇمىس ىستەۋ ءۇشىن شەت مەملەكەتكە قونىس اۋدارعان. ولاردىڭ تاڭداۋى رەسەي، پولشا، وڭتۇستىك كورەيا مەن ۇلى بريتانيا ەلدەرى.

24.kz