كاليفورنيا گۋبەرناتورى ءولىم جازاسىنا كەسىلگەن 548 ادامنىڭ ۇكىمىن تۇرمە جازاسىنا اۋىستىردى
استانا. KAZINFORM — كاليفورنيا گۋبەرناتورى گەۆين نيۋسوم ا ق ش شتاتىندا ءولىم جازاسىنا كەسىلگەن بارلىق 548 قىلمىسكەردىڭ ءولىم جازاسىن جەڭىلدەتىپ، ءومىر بويى باس بوستاندىعىنان ايىرۋ جازاسىنا اۋىستىردى. بۇل تۋرالى BBC جازدى.
شارتتى- مەرزىمىنەن بۇرىن بوستاندىققا شىعۋ قۇقى بەرىلمەيدى.
نيۋسوم ءوز شەشىمىن تۇسىندىرە وتىرىپ، ءولىم جازاسى كاليفورنيانىڭ قۇندىلىقتارىنا قايشى كەلەتىنىنە جانە قۇقىقتىق جۇيەنىڭ نەگىزىن بۇزاتىنىنا سەنەتىنىن ايتتى. ول ءولىم جازاسىن قولدانۋ ءادىل ەمەس ەكەنىن جانە كىناسىز ادامداردى سوتتاپ جىبەرۋ قاۋپى بارىن مالىمدەدى. گۋبەرناتور شارتتى تۇردە مەرزىمىنەن بۇرىن بوساتىلماي ءومىر بويى باس بوستاندىعىنان ايىرۋ مەملەكەت زاڭ مەن ەتيكالىق قاعيداتتارعا سايكەس تاعايىنداي الاتىن ەڭ قاتال جازا ەكەنىن اتاپ ءوتتى. نيۋسوم ءوزىنىڭ بۇل قادامى كەيبىر تۇرعىنداردىڭ نارازىلىعىن تۋدىرۋى مۇمكىن ەكەنىن ەسكەرىپ، شەشىم ءۇشىن تولىق جاۋاپكەرشىلىكتى ءوزى ارقالايتىنىن دا جەتكىزدى.
— گۋبەرناتور رەتىندە مەن بۇل شەشىم مەن ونىڭ سالدارى ءۇشىن تولىق جاۋاپكەرشىلىكتى ءوز موينىما الامىن، سونىمەن قاتار ءار ادامنىڭ ءومىرى ءۇشىن دە تولىق جاۋاپكەرشىلىكتى سەزىنەمىن. وسى سەبەپتى مەن ار- ۇجدانىما سۇيەنۋگە جانە كونستيتۋتسيامىز رۇقسات ەتكەندەي، كاليفورنيانىڭ يگىلىگى ءۇشىن وسى قادامدى جاساۋعا مىندەتتىمىن، — دەدى گۋبەرناتور.
ءولىم جازاسىنا كەسىلگەندەردى كەشىرۋ تۋرالى شەشىم كاليفورنيادا سيمۆولدىق سيپاتقا يە. ويتكەنى شتاتتا ءولىم جازاسى 2006 -جىلدان بەرى ورىندالماعان ءارى ءولىم جازاسى قايتا ەنگىزىلگەن 1978 -جىلدان بەرى نەبارى 13 قىلمىسكەرگە شىعارىلعان ۇكىم ورىندالدى. سونىمەن قاتار كاليفورنيا ەلدەگى ءولىم جازاسىنا كەسىلگەندەر سانى ەڭ كوپ شتات بولىپ وتىر.
دەگەنمەن، ساراپشىلاردىڭ باعالاۋىنشا، ءولىم جازاسى شتاتقا جىل سايىن سوت شىعىندارىنان ميلليونداعان دوللار ۇنەمدەۋگە مۇمكىندىك بەرەدى.
نيۋسومنىڭ شەشىمى ول 2028 -جىلعى پرەزيدەنت سايلاۋىنا ءتۇسۋى مۇمكىن دەگەن حابار تاراعان تۇستا قابىلداندى.
سونىمەن قاتار فەدەرالدى دەڭگەيدە ا ق ش پرەزيدەنتى دونالد ترامپ ءولىم جازاسىن ساقتاپ قالۋدى جاقتاپ، ونى ەڭ اۋىر قىلمىستاردىڭ الدىن الۋ قۇرالى دەپ اتادى. ەكىنشى مەرزىمىنىڭ ءبىرىنشى كۇنىندە ول فەدەرالدى دەڭگەيدە ءولىم جازاسىن قالپىنا كەلتىرۋ تۋرالى جارلىققا قول قويعان.
ايتا كەتۋ كەرەك، ا ق ش- تا قىلمىستاردى قۋدالاۋ جانە ۇكىم شىعارۋ بويىنشا ءار شتاتتىڭ ءوز وكىلەتتەرى بار. Death Penalty Information Center ۇيىمىنىڭ مالىمەتى بويىنشا، بۇل جازا 27 شتاتتا رۇقسات ەتىلگەن، ال 23 شتات جانە كولۋمبيا فەدەرالدى وكرۋگىندە (ۆاشينگتون، D. C. ) تاعايىندالمايدى.
ەسكە سالايىق، الدىڭعى ايدا تەننەسسي شتاتىندا كريستا پايك ءولىم جازاسىن ورىنداۋ ارەكەتىنەن امان قالعان ەدى.
