دۇكەن سورەسىندە وتاندىق ءونىم بولماسا كاسىپكەر جاۋاپقا تارتىلادى

ساۋدا سورەسىنە قانداي تاۋار قويىلسا دا، ءارقايسىسىندا وتاندىق ءونىمنىڭ ۇلەسى بولۋعا ءتيىس. 20 -قازاننان باستاپ وسىنداي تالاپ ەنگىزىلەدى. سالالىق مينيسترلىك ماماندارىنىڭ ايتۋىنشا، دۇكەندە ساتىلاتىن مىندەتتى تاۋار ءتىزىمى جوق. ياعني كاسىپكەر نە ساتسا دا، ءوز ەركى. الايدا تاڭداعان تاۋار تۇرىنەن ءوز ەلىمىزدە شىعارىلعان ءونىمدى قوسا ساتىپ الۋى كەرەك. وعان بەلگىلى ءبىر پايىزدىق مەجە بەكىتىلگەن.

ەرنۇر تۇراققازى، ق ر س ي م ىشكى ساۋدانى دامىتۋ دەپارتامەنتىنىڭ باسقارما باسشىسى:

 - ساۋدا وبەكتىسى بويىنشا ەسەپتەلەتىن كورسەتكىش 30 پايىز. ول جەردە نان، كۇندەلىكتى قولدانىلاتىن ءسۇت ونىمدەرى 30 پايىز بولسا، قازىر ودان بولەك تاۋارلارعا دا، ازىق-تۇلىك جانە ازىق-تۇلىك ەمەس تاۋارلاردىڭ دا ۇلەس پايىزىن 30 پايىزعا جەتكىزۋ مىندەتتەلىپ جاتىر. كاسىپكەر وتاندىق ونىمنەن نەگىزسىز باس تارتا المايدى ءوندىرۋشى نەمەسە دەلدالمەن شارت جاساۋ كەزىندە دۇكەن يەسى وتاندىق تاۋاردان نەگىزسىز باس تارتا المايدى. بۇعان تىيىم سالىندى. ق ر ءا ق ب تۋرالى كودەكسىنىڭ 462-بابىنا سايكەس نۇسقامانى ورىنداماعانى ءۇشىن 100-دەن 500-گە دەيىن ا ە ك مولشەرىندە كاسىپكەردىڭ ساناتىنا بايلانىستى ايىپپۇل كوزدەلگەن. سونىمەن قاتار وتاندىق تاۋارلاردىڭ ساۋدا جەلىلەرىندە جانە ءىرى ساۋدا وبەكتىلەرىندە قولجەتىمدىلىگىن شەكتەگەنى ءۇشىن 201-بابىنا سايكەس، 100 ا ە ك مولشەرىندە ايىپپۇل كوزدەلگەن.

جاڭا قۇجات كۇشىنە ەنگەننەن كەيىن تۇتىنۋشىلار تاراپىنان تۇسكەن شاعىم مەن مەملەكەتتىك ورگاندار جولداعان ماتەريال نەگىزىندە سالا ماماندارى تەكسەرىس جۇرگىزەدى. ەگەر زاڭبۇزۋشىلىق انىقتالسا، العاشىندا كاسىپكەرگە ولقىلىقتى جويۋ تۋرالى نۇسقاما بەرىلەدى. ال ەسكەرتۋدى ەلەمەسە، اكىمشىلىك جاۋاپقا تارتىلادى. 

ەلدە وندىرىلگەن ازىق-تۇلىك كولەمى %13- عا ارتتى

 ەلدە وندىرىلگەن ازىق-تۇلىك كولەمى ارتتى. اۋىل شارۋاشىلىعى مينيسترلىگىنىڭ مالىمەتىنە قاراعاندا، بيىل 9 اي ىشىندە تاۋاردىڭ جالپى قۇنى 3,2 تريلليون تەڭگەگە جەتتى. بۇل بىلتىرعى ءدال وسى كەزەڭدەگىدەن 13 پايىزعا كوپ. سونىڭ ىشىندە وسىمدىك مايى ءوندىرىسى 25, ۇن ءوندىرىسى 13 پايىزعا وسكەن. ىرىمشىك پەن سۇزبە 9, شوكولاد پەن قانت قوسىلعان كونديتەرلىك ونىمدەر كولەمى 10 پايىزعا ۇلعايدى. ال بالمۇزداق ءوندىرىسى بىردەن 51 پايىزعا ارتقان.

ازىق-تۇلىك وندىرۋشىلەرگە ₸96 ميلليارد نەسيە بەرىلدى ءوندىرىستىڭ ارتۋىنا جاڭا ينۆەستيتسيالىق جوبالاردىڭ جۇزەگە اسۋى ىقپال ەتتى. جىل باسىنان بەرى 200-دەن استام كاسىپورىننىڭ اينالىم قاراجاتىن تولىقتىرۋعا مەملەكەت تاراپىنان 96 ميلليارد تەڭگە ءبولىندى. اۋىل شارۋاشىلىعى شيكىزاتىن وڭدەۋگە ارنالعان جاڭا ءوندىرىس ورىندارى پايدا بولدى. اتاپ ايتقاندا، پاۆلودار وبلىسىندا مايلى داقىلدار، تۇركىستان وبلىسىندا باقشا داقىلدارى، جامبىل وبلىسىندا جۇگەرى جانە استانادا ەت وڭدەيتىن، ال الماتى وبلىسىندا سۋسىن وندىرەتىن كاسىپورىن ىسكە قوسىلدى.