جۇمىس كۇشى جەتىسپەيتىن وڭىرلەرگە قونىس اۋدارعاندارعا ءۇي الۋعا 5 ميلليون بەرىلەدى
استانا. قازاقپارات - ەلدە 1-قاڭتاردان باستاپ جۇمىس كۇشى جەتىسپەيتىن وڭىرلەرگە ەرىكتى تۇردە قونىس اۋدارۋدىڭ جاڭا ەرەجەسى كۇشىنە ەنەدى. مەملەكەت كوشۋگە، تۇرعىن ءۇي جالداۋ اقىسىن وتەۋگە جانە باسپانا ساتىپ الۋعا كومەك كورسەتەدى. قونىس اۋدارۋشىلارعا ءبىر جولعى سۋبسيديا، جالداۋ اقىسى مەن كوممۋنالدىق قىزمەتتەرگە اي سايىنعى وتەماقى جانە باسپانا ساتىپ الۋعا سەرتيفيكات بەرىلۋى مۇمكىن.
باعدارلاماعا جۇمىسسىزدار، قانداستار، شارۋا قوجالىقتارىنىڭ باسشىلارى، سۇرانىسقا يە ماماندىق يەلەرى، وڭىرلەردەن جۇمىسشى تارتاتىن جۇمىس بەرۋشىلەر قاتىسا الادى.
دينا تەمىربولات، ق ر ە ح ا ق م كوشى-قون كوميتەتى باسقارماسىنىڭ باسشىسى:
- سەگىز ايماق ايقىندالعان. ونىڭ ىشىندە، اقمولا، اباي، قوستاناي، قاراعاندى، پاۆلودار، س ق و كىرەدى. 1 وبلىس ىشىندە دە قونىس اۋدارۋ شاراسى كوزدەلگەن. اۋىل، ەلدى مەكەندەرگە جانە شەكارا ماڭىنداعى اۋىلدارعا قونىس اۋدارۋ كوزدەلگەن. ال كوشىپ شىعاتىن وڭىرلەر قاتارىنا الماتى، ماڭعىستاۋ، تۇركىستان جانە جامبىل وبلىستارى، سونداي-اق استانا، الماتى جانە شىمكەنت قالالارى ەنگىزىلدى.
تۇركىستان وبلىسىنىڭ تۇرعىندارى بۇل باعدارلاماعا قاتىستى ءوز پىكىرىن ءبىلدىردى.
بليتس: 1. سولتۇستىك تە قازاقستان جەرى. سوندىقتان كوشىپ بارعاندى قولدايمىن. ءبىراق ول جەردە ءبىر ماسەلە بار. تانىمايتىن اۋىلعا 1-2 وتباسىنى اپارادى. ولاردىڭ ءسىڭىسىپ كەتۋى قيىن بولىپ جاتىر. سوندىقتان مەنىڭ جەكە ويىمشا، 10-15 وتباسىنى اپارسا، بىرىگىپ جۇمىس ىستەپ كەتەر مە ەدى دەگەن ويىم بار.
2. مەملەكەت بەلگىلەنگەن مولشەردە قاراجات ءبولىپ جاتىر. قاراجاتپەن قوسا باسپانامەن قامتاماسىز ەتسە، ودان كەيىن تۇراقتى جۇمىس ورنىمەن. ويتكەنى كوپ ادام بارادى دا تۇراقتى جۇمىس ورنىمەن قامتاماسىز ەتىلمەي، قايتا كەرى قايتىپ جاتقان جاعدايلاردى ەستىپ جاتامىز.
3. مىسالى، مەنىڭ جاسىم 50-دەن استى. ماعان ول جاققا بارىپ ورنالاسۋ وتە قيىن. قازىر الماتىدا وقىپ جاتقان بالالارىم سولتۇستىككە بارىپ جۇمىس ىستەيمىن دەسە مەن ءارقاشان قولدايمىن.
4. بۇل ماسەلەنى شەشۋ ءۇشىن كوبىرەك جاستاردى تارتۋ كەرەك سەكىلدى. ۇلكەن ادامداردىڭ بەيىمدەلۋى كىشكەنە قيىنداۋ عوي. جۇمىس پەن ءۇي دەگەن ماسەلە شەشىلەر بولسا، قۋانا-قۋانا بارار ەدىم.
وتباسىنىڭ ءار مۇشەسىنە كوشۋ شىعىندارىن وتەۋگە ارنالعان ءبىر جولعى سۋبسيديا 302750 تەڭگە تولەنەدى. تۇرعىن ءۇيدى جالداۋ جانە كوممۋنالدىق قىزمەتتەر اقىسىن وتەۋگە ارنالعان تولەم 12 ايعا دەيىن بەرىلەدى. تۇرعىن ءۇي ساتىپ الۋعا نەمەسە يپوتەكالىق نەسيە بويىنشا باستاپقى جارنا تولەۋگە ارنالعان ەكونوميكالىق موبيلدىك سەرتيفيكاتىنىڭ قۇنى 7 ميلليون 28 مىڭ 125 تەڭگەگە تەڭ.
دينا تەمىربولات، ق ر ە ح ا ق م كوشى-قون كوميتەتى باسقارماسىنىڭ باسشىسى:
- سولتۇستىك وڭىرلەردە دەنساۋلىق ساقتاۋ، اۋىل شارۋاشىلىعى، ينجەنەر مەن ايتي ماماندار سۇرانىسقا يە. وسى جىلدىڭ باسىنان جوسپار بويىنشا 8 مىڭ 278 ادام، ونىڭ 95 پايىزى، ياعني 7 مىڭنان استام ادام كوشىپ، سول وڭىرلەرگە بەيىمدەلىپ تۇرىپ جاتىر. 5 جىلدىڭ قورىتىندىسى بويىنشا بىزدە تەك 3 پايىزى كەلگەن وڭىرلەرىنە قايتىپ، تۇرىپ جاتىر.
وزگە وڭىرلەردەن جۇمىسشى تارتاتىن جۇمىس بەرۋشىلەرگە 1 ميلليون 730 مىڭ ت گ مولشەرىندەگى سۋبسيديا ۇسىنىلادى. بۇل قولداۋدى الۋ ءۇشىن جۇمىس بەرۋشى قىزمەتكەردى كەمىندە ەكى جىل مەرزىمگە تۇراقتى جۇمىسقا قابىلداپ، ونىڭ كوشۋ جانە تۇرعىن ءۇي جالداۋ شىعىندارىن تولەۋى كەرەك. ەكىنشىدەن، باسپانا ساتىپ الۋ شىعىنىنىڭ %50- ىن وتەۋ قاجەت. بۇل رەتتە وتەماقى مولشەرى 5017000 تەڭگەدەن اسپايدى. جۇمىس بەرۋشى باسپانا ساتىپ الىپ، بەلگىلەنگەن تالاپتار ورىندالعاننان كەيىن ونى قىزمەتكەردىڭ مەنشىگىنە بەرەدى. قىزمەتكەر تۇراقتى جۇمىسقا 5 جىلدان استام مەرزىمگە ورنالاسۋى كەرەك.
24.kz
