جينالىس ۇستىندە باسقارما باسشىسىن ۇستاپ اكەتتى

Сыбайлас жемқорлық
Фото: egemen.kz

استانا. قازاقپارات - شىمكەنتتە اكىمنىڭ توراعالىعىمەن ءوتىپ جاتقان جينالىس كەزىندە سىبايلاس جەمقورلىققا قارسى قىزمەت وكىلدەرى كەلىپ، ازات مومىنوۆتى تەرگەۋ شارالارىن جۇرگىزۋ ءۇشىن الىپ كەتكەن.

وقيعا ورنىنان تۇسىرىلگەن ۆيدەونى قالا اكىمى عابيت سىزدىقبەكوۆ Instagram جەلىسىندەگى پاراقشاسىندا جاريالادى. 

جينالىستا قالا اكىمى قىزمەتكەرلەردى ادال جۇمىس ىستەۋگە، بيۋدجەتتەن بولىنگەن قارجىنى قولدى ەتپەۋگە شاقىردى.

«بۇگىن مەنىڭ تاعايىندالعانىما تۋرا 5 اي بولدى. سىزدەردەن وسى ۋاقىت ارالىعىندا جۇمىستى ادال ىستەۋدى سۇراپ جاتىرمىن. مەن بىلەمىن ارالارىڭىزدا ادال، مەملەكەتشىل ازاماتتار بار. كوپ كىسى سونداي. سىزدەرگە سەنەمىن. سەندىم دە. سىزدەردى اۋىستىراتىن ەشقانداي ويىم بولعان جوق. ءبىراق كەتكەن كىسىلەر دە بولدى. ولار سوزگە كونبەگەننەن كەيىن كەتتى. وزدەرىنىڭ ارتىندا بىلىقتارى دا بار. وتكەن نارسەنى قالدىرىپ، قازىر جۇمىستى جاڭادان باستاۋ كەرەك. ارامىزدا ساتقىندار دا بار. وسى جەردەن الىپ كەتىڭىزدەر»،- دەدى شىمكەنت قالاسىنىڭ اكىمى.

جينالىس بارىسىندا تەرگەۋ باسقارماسىنىڭ وكىلى ءسوز الىپ، وتكەن جىلدان بەرى ەسكەرتۋدى ەلەمەگەن شەنەۋنىكتى تەرگەۋگە الاتىنىن مالىمدەدى.

ۆيدەودان وسى تۇستا سىبايلاس جەمقورلىققا قارسى ءىس-قيمىل اگەنتتىگى جينالىس ءوتىپ جاتقان كابينەتكە كىرىپ، زالدا وتىرعان شەنەۋنىكتى سۇراققا الىپ، ۇستاپ الىپ كەتكەنىن كورۋگە بولادى.

شىمكەنت قالاسى تۇرعىن ءۇي باسقارماسىنىڭ باسشىسى قالانىڭ سەيسميكالىق قاۋىپسىزدىگىن قامتاماسىز ەتۋگە بولىنگەن بيۋدجەت قاراجاتىن جىمقىردى دەگەن كۇدىككە ءىلىندى.

مەملەكەت باسشىسىنىڭ تاپسىرماسىن ورىنداۋ بارىسىندا سىبايلاس جەمقورلىققا قارسى قىزمەت سەيسميكالىق قاۋىپسىزدىك، تابيعي جانە تەحنوگەندىك سيپاتتاعى باسقا دا توتەنشە جاعدايلار سالاسىندا تەكسەرۋ جۇرگىزىپ جاتىر.

زالالدىڭ الدىن الا سوماسى - 120 ميلليون تەڭگە.

قاتار جۇرگەن قارجىلىق تەرگەۋ بارىسىندا شەنەۋنىكتىڭ اناسىنا رەسىمدەلگەن تۇركىستان وبلىسى قازىعۇرت اۋىلىندا مونشا كەشەنىن سالۋ ارقىلى جىمقىرىلعان قاراجاتتى زاڭداستىردى دەگەن نۇسقا تەكسەرىلەدى.

قازىرگى ۋاقىتتا ول شىمكەنت قالاسى پوليتسياسىنىڭ ۋاقىتشا يزولياتورىنا قاماۋعا الىندى.

تەرگەۋ جالعاسىپ جاتىر.

قىلمىستىق- پروتسەستىك كودەكسىنىڭ 201-بابىنا سايكەس وزگە اقپارات جاريالانبايدى.

https://24.kz

سوڭعى جاڭالىقتار